ކޭ ޕާކް މައްސަލައިގައި ހިމެނޭ ޖައިޝާން ޝަހުސު އޮޅުވާލައިގެން ކައިވެންޏެއް ކޮށްދިން މައްސަލައެއް
03 މެއި 2019 ދުވަހު، ސައްޙަ ކައިވެނިކުރުމުގެ ހުއްދަ އޮންނަ ޝަރުޢީ މައުޒޫނެއްކަމަށް ހެދިގެން ކައިވެއްޏެއް ކޮށްދީފައިވޭ
ޕްރޮސެކިއުޓަރ ޖެނެރަލް އޮފީސް
ހުޅުމާލޭގައި ތަރައްގީކުރަމުން އަންނަ ކޭ-ޕާކް ފްލެޓްތަކުގެ މައްސަލާގައި ދައުވާ އުފުލާފައިވާ ޖައިޝާން ސައީދް ޝަހުސުއޮޅުވާލައިގެން ކައިވެންޏެއްކޮށްދިންކަން ހާމަވެއްޖެއެވެ.
މިކަން ހާމަވެފައިވަނީ ހުޅުމާލޭގައި ތަރައްގީކުރަމުން އަންނަ ކޭ-ޕާކް ފްލެޓްތަކުގެ މައްސަލައިގައި ރާއްޖެއެމްވީން މައުލޫމާތު ހޯދުމުން، ޕްރޮސެކިއުޓަރ ޖެނެރަލްގެ އޮފީހުން ދިން މައުލޫމާތުންނެވެ. އެގޮތުން ހުޅުމާލޭގައި ތަރައްގީކުރަމުން އަންނަ ކޭ-ޕާކް ފްލެޓްތަކުގެ މައްސަލާގައި ގިނަ ތުހުމަތުތަކެއް އަމާޒުވެފައިވާ ހަސަން މަމްދޫހު (މަންޑޭ) އާއެކު ދެން އެ މައްސަލައިގައި ދައުވާ އުފުލާފައިވަ ޖައިޝާން ސައީދަށް މީގެ ކުރިންވެސް އެހެން މައްސަލައެއްގައި ދައުވާކޮށްފައިވާއިރު، ޝަހުސު އޮޅުވާލުމުގެ ކުށުގެ ދައުވާއެއް، އެއީ ކޮން މައްސަލައެއްތޯ އަދި އެ މައްސަލައިގައި ދައުވާ އުފުލާފައިވާ ސަބަބަކީ ކޮބައިތޯ އަދި އެ މައްސަލަ މިހާރު އޮތީ ކިހާ ހިސާބެއްގައިތޯ ކުރެވުނު ސުވާލުގައި ޕީޖީ އޮފީހުން ބުނީ ޖައިޝާން ސައީދަށް މީގެ ކުރިންވެސް އެހެން މައްސަލައެއްގައި ދައުވާކޮށްފައިވާ ކަމަށެވެ.
އެ މައްސަލައަކީ، ޖައިޝާން ސަޢީދު، 03 މެއި 2019 ދުވަހު، ސައްޙަ ކައިވެނިކުރުމުގެ ހުއްދަ އޮންނަ ޝަރުޢީ މައުޒޫނެއްކަމަށް ދައްކައިގެން ޝަޚުޞު އޮޅުވާލައިގެން ކައިވެނިކޮށްދިނުމުން ދިވެހިރާއްޖޭގެ ޤާނޫނުލްޢުޤޫބާތުގެ 312 ވަނަ މާއްދާގެ (ހ) ގެ 1 ވަނަ ނަންބަރުގެ (iii) އާއި 2 ވަނަ ނަންބަރުގެ (i) އާ ޙަވާލާދީ، އެ މާއްދާގެ (ނ) ގެ 2 ވަނަ ނަންބަރުގެ ދަށުން ޝަޚްޞު އޮޅުވާލުމުގެ ކުށުގެ ދައުވާ ކުރެވިފައިވާ މައްސަލައެކެވެ.
އެމައްސަލައިގައި އެންމެ ފަހުން އަޑުއެހުމެއް ޝެޑިއުލް ކުރައްވާފައި އޮތީ 11 ޑިސެމްބަރ 2023 އަށެވެ. އެދުވަހުގެ އަޑުއެހުން ބޭއްވިފައެއް ނުވެއެވެ. އެއީ އެމައްސަލައިގައި ހިމެޏޭ މީހަކު ބަލިވެގެން ކޯޓަށް ސިޓީ ލާފައިވާތީއެވެ.
އެމައްސަލައިގައި އެންމެ ފަހުން އަޑުއެހުމެއް ބޭއްވުނީ 22 ނޮވެމްބަރ 2023 ދުވަހުއެވެ. އެދުވަހުގެ އަޑުއެހުމުގައި އޮތީ ހެކިންގެ ހެކިބަސް ނެގުމެވެ. އެހެންކަމުން، މިމައްސަލަ އޮތީ ހެކިންގެ ހެކިބަސް ނެގުމުގެ މަރްޙަލާގައެވެ.
ރ. އަލިފުށީ، ކިނާރާ، ޖައިޝާން ސައީދުގެ މައްޗަށް 97 ދައުވާއެއް ކުރުމަށް ކޯޓަށް ހުށަހަޅާފައިވެއެވެ. މި ދައުވާތަކުގައި، މީހަކަށް ކަމެއް އޮޅުވާލުމުގެ ނިޔަތުގައި، އެނގިހުރެ، ސައްހަނޫން ލިޔުމެއް ދިނުމުގެ ކުށުގެ ދައުވާތައް ކޮށްފައިވަނީ ހަންބޯ ކޮމްޕެނީ ޕްރައިވެޓް ލިމިޓެޑްގެ %95 ހިއްސާދާރު، ޖިން ޝިހޫގެ ހުއްދަ ނެތި، އޭނާގެ ނަމުގައި ސައްހަނޫން ސޮއިކޮށްފައިވާ ލިޔުންތަކެއް ބީއެމްއެލަށް ހުށަހަޅާފައިވާތީއެވެ.
ޕީޖީން ބުނީ، ޓެކުމާއި، ޓެކުމުގައި ބައިވެރިވުމުގެ ކުށުގެ ދައުވާ ކޮށްފައިވަނީ ކޭ-ޕާކް ރެޒިޑެންސްގެ ނަމުގައި ހުޅުމާލޭގައި 110 (ސަތޭކަ ދިހައެއް) އެޕާޓްމަންޓް ހިމެނޭ ރެޒިޑެންޝަލް ކޮމްޕްލެކްސްއެއް އިމާރާތްކުރުމަށް ފަށައި، މި ޕްރޮޖެކެޓް ހިންގާކަން އާންމުކޮށް އިއުލާންކޮށް، އާންމުންނަށް މި އެޕާޓްމަންޓްތައް ވިއްކިއިރު، އެއް އެޕާޓްމަންޓެއް އެކަކަށްވުރެ ގިނަ މީހުންނަށް ވިއްކައި، އެމީހުންގެ އަތުން ފައިސާ ނަގާފައި ވާތީކަމަށެވެ. އަދި އޮޅުވާލުމުގެ ދައުވާކޮށްފައިވަނީ އެއް އެޕާޓްމަންޓެއް އެކަކަށްވުރެ ގިނަ މީހުންނަށް ވިއްކިއިރު އެކަން އެޕާޓްމަންޓް ގަތް މީހުންނަށް އޮޅުވާލާފައި ވާތީކަމަށެވެ.
