ވޯލްޑްކަޕް ކޮލިފައިންގައި ބަންގްލަދޭޝްއާ ދެކޮޅަށް ރާއްޖެ ކުޅުނު މެޗުގައި ގަވާއިދާ ހިލާފުވުމުން ރާއްޖެއަށް އިންޒާރުދީ ކުޅުންތެރިއަކު ޖޫރިމަނާކޮށްފި އެވެ.

ފީފާއިން ރާއްޖެއަށް އިންޒާރު ދީފައިވަނީ މިދިޔަ އަހަރުގެ އޮކްޓޫބަރު 17ގައި ބަންގްލަދޭޝްގައި ކުޅުނު މެޗުގައި ފީފާގެ ގަވާއިދުގެ 15 ވަނަ މާއްދާއާ ހިލާފަށް ޗޭންޖިން ރޫމަށް އިމެއްނެތި ވަނުމުގެ ހުއްދަދީފައިވާތީ އެވެ.

ރާއްޖެއިން ޖޫރިމަނާކޮށްފައިވަނީ އެ މެޗުގައި ރަތްކާޑު ދެއްކި އަހްނަފް ރަޝީދެވެ. އެއް މެޗަށް ސަސްޕެންޑްކޮށް އޭނާ ޖޫރިމަނާކޮށްފައިވަނީ 5000 ސްވިސް ފްރޭންކް (89431.96) ދިވެހި ރުފިޔާއިންނެވެ. ސަބަބަކީ ގޯލެއް ޖަހަން އިދިކޮޅު ކުޅުންތެރިއަކަށް ލިބުނު ފުރުސަތަކަށް ގަސްތުގައި ހުރަސް އެޅުމުން ކަމަށް ފީފާގެ ޕްރެސްރިލީޒްގައި ބުނެފައިވެ އެވެ.

ރާއްޖޭގެ އިތުރުން ރާއްޖެ މެޗުގައި ބަންގްލަދޭޝްއިން ހަވާއަރުވައި ސެކިއުރިޓީ ގަވާއިދުތަކާ ހިލާފުވެފައިވާތީވެ 14000 ސްވިސް ފްރޭންކްއިން އަދި ކުޅުންތެރިން ކުޅިވަރުގެ ރޫހާ ހިލާފު އަމަލުތައް ހިންގާފައިވާތީވެ 5000 ސްވިސް ފްރޭކުން ވަނީ ޖޫރިމަނާކޮށްފަ އެވެ.

ވޯލްޑްކަޕް ކޮލިފައިންއިން ރާއްޖެ ކެޓުމުން މި އަހަރު ބައިނަލް އަގްވާމީ ފުޓްބޯޅައިގައި ރާއްޖެ އަށް މެޗެއް ނެތެވެ.