އަސްކަރީ ބާރާއި އެކު ރާއްޖެ އަރާ ރާއްޖެ ހިފަން ގޮވާލާ، އިންޑިއާގެ ގާނޫނު ހަދާ މަޖިލީހުގެ ކުރީގެ މެމްބަރު ސުބްރަމާނިޔަން ސްވާމީގެ ދެއްކި ވާހަކަތައް އެމްޑީޕީން ކުށްވެރިކޮށްފިއެވެ.
ސުބްރަމާނިޔަން ކުރި ޓްވީޓެއްގައި ބުނެފައި ވަނީ ރައީސުލްޖުމްހޫރިއްޔާ ޑރ.މުހައްމަދު މުއިއްޒު ޗައިނާ އަށް ކުރެއްވި ދަތުރުފުޅަށް ފަހު 15 މާރޗްގެ ކުރިން އިންޑިއާ ސިފައިން ރާއްޖެއިން ފައިބަން ގޮވާލާފައިވާ ކަމަށެވެ. އެހެން ނޫން ނަމަ އެކަމުގެ ސަބަބުން އުގޫބާތްތަކަކާއި ކުރިމަތިލާން ޖެހޭނެ ކަމަށް ވެސް ބުނެފައިވެއެވެ. އަދި ރާއްޖެ އަކީ ކޮށްދޭ ކަންތައްތައް ބަލައިނުގަންނަ ތަނެއް ކަަމަށް ބުނެ އޭނާ ވަނީ ފާޑު ކިޔާފައެވެ. އެހެންކަމުން އިންޑިއާގެ އަސްކަރިއްޔާ އަދި ވައިގެ އަސްކަރީ ބާރުތައް ބޭނުންކޮށްގެން ރާއްޖެ އަރާ މުއިއްޒުގެ ވެރިކަން ބަދަލުކުރަން ޖެހޭ ކަމަށް އޭނާ ވަނީ ބުނެފައެވެ.
ސުބްރަމާނިޔަން އެހެން ބުނި ނަމަވެސް ރާއްޖެ އިން އިންޑިއާ ސިފައިން 15 މާރޗްގެ ކުރިން ނުބާލައިފި ނަމަ ވަކި ގޮތަކަށް އަމަލުކުރާނެ ކަަމަށް ދިވެހި ސަރުކާރުން ބުނެފައިވާކަން އިންޑިއާ އާއި ރާއްޖޭގެ ސަރުކާރުން ވެސް ހާމަކޮށްފައެއް ނެތެވެ.
ސުބްރަމާނިޔަންގެ ޓުވީޓާ ގުޅިގެން އެމްޑީޕީން ނެރުނު ބަޔާނެއްގައި ބުނެފައި ވަނީ އެފަދަ ބަޔާނެއްގެ ސަބަބުން ނަފްރަތު އުފެދޭ ކަމަށެވެ. އެއީ ރާއްޖެ އާއި އިންޑިއާގެ ގުޅުން ގޯސްވެދާނެ ކަމެއް ކަމަށް ފާހަގަކޮށް އެއީ ޢައިރު ޒިންމާދާރު ވާހަކަތަކެއް ކަމަށް ވެސް އެމްޑީޕީން ވަނީ ބުނެފައެވެ. މީގެ އިތުރުން އެމްޑީޕީން ބުނެފައި ވަނީ ރާއްޖެ އާއި އިންޑިއާގެ ގުޅުން ޤާއިމްވެ އޮތީ އެއް ޤައުމު އަނެއް ޤައުމަށް ކުރާ އިޚުތިރާމްގެ މައްޗަށް ކަަމަށެވެ.
ސުބްރަމާނިޔަންގެ އެ ވާހަކަތަކަކީ އެއްވެސް ވަރަކަށް ބަލައިގަނެވޭ ވާހަކަތަކެއް ނޫން ކަަމަށް އެމްޑީޕީން ވަނީ ބުނެފައެވެ. އަދި އެ ވާހަކަތަކާއި މެދު ވިސްނަން ޖެހޭ ކަމަށް ވެސް އެމްޑީޕީން ވަނީ ބުނެފައެވެ. އަދި އިންޑިއާގެ އެތެރޭގެ ސިޔާސީ ކަންކަމާއި މެދުގައި ވާހަކަދައްކަން ވާނީ ރާއްޖެ އެކަމުގައި ޝާމިލް ނުވާ ގޮތަށް ކަމަށް ވެސް ވަނީ ބުނެފައެވެ.
އަދި ރާއްޖެ އާއި އިންޑިއާގެ ގުޅުމާއި މެދު ރައީސް މުއިއްޒުގެ ވާހަކަތައް ބެހެއްޓެވި ގޮތުން ސުބްރަމާނިއަން ފަދަ މީހުންނަށް އެކަމުގެ ނާޖާއިޒް ފައިދާ ހޯދަން މަސައްކަތް ކުރަން ފުރުސަތު ލިބިދީފައިވާ ކަމަށް ވެސް އެމްޑީޕީން ވަނީ ބުނެފައެވެ.
