ބަޔާން މިއުނިކަށް ކުޅެމުން އަންނަ ޖަރުމަނުގެ ޒުވާން ކުޅުންތެރިޔާ ޖަމާލް މުސިއާލާ އަކީ އެ ކުލަބުގައި ޚާއްސަ ކުޅުންތެރިޔެއް ކަމަށް، ބަޔާންގެ ޑައިރެކްޓަރު ފްރެއުންޑް ވިދާޅުވެއްޖެ އެވެ.

އޭނާ މިހެން ވިދާޅުވީ، ބަޔާންގައި މުސިއާލާގެ ކުރިމަގާ ގުޅޭ ގޮތުން ވާަހަކަ ދައްކަވަމުންނެވެ. ޖަރުމަނު ލީގުގައި ބަޔާނުން އެންމެ ފަހު ހޮފެންހައިމާ ދެކޮޅަށް ކުޅުނު މެޗުގައި ވެސް މުސިއާލާ ވަނީ މޮޅު ކުޅުމެއް ދައްކައިފަ އެވެ. ތިން ލަނޑުގެ މޮޅެއް ބަޔާނުން ހޯދި އެ މެޗުގައި މުސިއާލާ ވަނީ ދެ ލަނޑު ޖަހައިފަ އެވެ.

ޖަރުމަނުގެ މީޑިއާއަކާ ވާހަކަ ދައްކަވަމުން ފްރެއުންޑް ވިދާޅުވީ، ބަޔާންގައި ދިގު މުއްދަތަކަށް މުސިއާލާ ބެހެއްޓުމަކީ އެ ކުލަބަށް ލިބޭނެ ވަރަށް އުފާވެރިކަމެއް ކަމަށެވެ. އޭނާ އަކީ ޚާއްސަ ކުޅުންތެރިޔެއްކަން ފާހަގަކޮށް އޭނާ އިތުރަށް ބުނީ، މުސިއާލާ އަކީ ބަޔާންގެ ވައްޓަފާޅި އަށް ފެތޭ، ހުނަރުވެރި އަދި މޮޅު ކުޅުންތެރިޔެއް ކަމަށެވެ.

މީގެ އިތުރުން އޭނާ ބުނީ، ބަޔާނުން ބޭނުންވަނީ އެ ކުލަބުގެ އެންމެ މޮޅު އެއް ކުޅުންތެރިޔާ އަށް މުސިއާލާވުން ކަމަށެވެ. އަދި ޚާއްސަކޮށް، ދިގު މުއްދަތަކަށް ބަޔާންގައި މަޑުކުރާނެ ކުޅުންތެރިޔަަކަށް އޭނާ ވުމަށް ވެސް ބޭނުންވާ ކަމުގައި އޭނާ ބުންޏެވެ. އެކަމުގެ މަސައްކަތް ބަޔާނުން ކުރަމުން އަންނަ ކަމަށް ވެސް އޭނާ ވަނީ ފާހަގަކޮށްފަ އެވެ.

ބަޔާނާއެކު މުސިއާލާ ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. އެއްބަސްވުމުގައި ބާކީ ދެ އަހަރު އޮތް ނަމަވެސް، ދުރާލާ ބަޔާނުން ވަނީ އޭނާގެ އެއްބަސްވުން އައު ކުރުމުގެ މަސައްކަތް ފަށައިފަ އެވެ. ޖަރުމަނުގެ މީޑިއާތަކުން ބުނެފައިވާ ގޮތުގައި، ބަޔާނުން އަންނަނީ މުސިއާލާ އާއެކު މަޝްވަރާތައް ކުރިއަށް ގެންދަމުންނެވެ.