ހޮފެންހައިމް ބަލިކޮށް، ބަޔާނުން ފަރަގު ކުޑަ ކޮށްފި

ޖަރުމަނު ލީގުގައި ހޮފެންހައިމާ ދެކޮޅަށް ކުޅުނު މެޗުން މޮޅުވެ، ބަޔާން މިއުނިކުން އެއް ވަނައިގައި އޮތް ބަޔާ ލެވަކޫސަނާ ދެމެދު އޮތް ފަރަގު އެއް ޕޮއިންޓަށް ކުޑަ ކޮށްފި އެވެ.

ލީގުގައި ހުކުރު ދުވަހުގެ ރޭ ބަޔާންގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 3-0 އިންނެވެ. މެޗުގެ ފުރަތަމަ ހާފުގައި ބަޔާނުން އެއް ލަނޑު ޖެހިއިރު، އަނެއް ދެ ލަނޑު ޖެހީ ދެ ވަނަ ހާފުގަ އެވެ.

މެޗު ފަށައިގެން 18 ވަނަ މިނެޓުގައި ބަޔާނުން ވަނީ ލަނޑު ޖަހައި ލީޑު ނަގައިފަ އެވެ. އެ ޓީމަށް ލީޑު ނަަގައިދިނީ ޒުވާން ކުޅުންތެރިޔާ ޖަމާލް މުސިއާލާ އެވެ. އޭނާ އެ ލަނޑު ޖެހީ، ލެރޯއީ ސާނޭގ ތަނަވަސްކޮށްދިން ފުރުސަތެއްގަ އެވެ. ބަޔާންގެ ދެ ވަނަ ލަނޑު މުސިއާލާ ދެ ވަނަ ހާފުގައި، މެޗުގެ 70 ވަނަ މިނެޓުގަ އެވެ. އެ ލަނޑު ޖަހަން ވެސް އޭނާ އަށް ފުރުސަތު ތަނަވަސްކޮށްދިނީ ސާނޭ އެވެ. ބަޔާންގެ ފަހު ލަނޑު، މެޗުގެ 90 ވަނަ މިނެޓުގައި ޖެހީ އެ ޓީމުގައި މޮޅަށް ކުޅެމުން އަންނަ އިންގްލެންޑުގެ ކެޕްޓަން ހެރީ ކޭން އެވެ. މިއީ ޓޮޓެންހަމް ދޫކޮށް ބަޔާނަށް ބަދަލުވި ފަހުން ކޭން އެ ޓީމަށް ޖަހައިދިން 26 ވަނަ ލަނޑެވެ. އޭގެ ތެރެއިން 22 ލަނޑަކީ އޭނާ ޖަރުމަނު ލީގުގައި ޖަހާފައިވާ ލަނޑުތަކެވެ.

މޮޅާއެކު ބަޔާން އޮތީ ލީގު ތާވަލްގެ ދެ ވަނަ މަގާމުގަ އެވެ. އެއީ މިހާތަނަށް ލީގުގައި ކުޅުނު 16 މެޗުން 41 ޕޮއިންޓު ހޯދައިގެންނެވެ. ހަމަ އެ އަދަދަށް މެޗު ކުޅެގެން އެއް ވަނައިގައި ލެވަކޫސަނަށް ލިބެނީ 42 ޕޮއިންޓެވެ.