މިހާރު އޮތް މާލެ ސިޓީ ކައުންސިލުން ވަނީ މާލެއަށް ދިމާވެފައިވާ މައްސަލަތަކަށް އިހުމާލުވެފައި
ކުރީގެ ރައީސް އަދި އެމްޑީޕީގެ ރައީސް އިބްރާހީމް މުޙައްމަދު ޞާލިޙު
މޭޔަރުކަމުގައި ހުންނަވައިގެން ރައީސް ޑރ. މުހައްމަދު މުއިއްޒާއި، މާލެ ސިޓީ ކައުންސިލުން ބޭނުންވީ ބާރުތައް ޖަމާކޮށްގެން ސަރުކާރެއް ހިންގަން ކަމަށާއި، މާލެ ސިޓިއަށް އިހުމާލުވެފައިވާ ކަމަށް ކުރީގެ ރައީސް އަދި އެމްޑީޕީގެ ރައީސް އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.
އެމްޑީޕީގެ ފަރާތުން މާލެ ސިޓީގެ ހުސްވެފައިވާ މޭޔަރު އަދި ދާއިރާތަކުގެ ބައި އިލެކްޝަންގައި ވާދަކުރައްވާ ކެންޑިޑޭޓުންގެ ކެމްޕޭން ނިންމުމަށް ބޭއްވި 'ފެހި. ތަނަވަސް. މާލެ' ކެމްޕޭން ނިނުމުގައި ހަރަކާތުގައި، ރައީސް ޞާލިހް ވިދާޅުވީ މާލޭގެ ރައްޔިތުން ބޭނުންވަނީ މާލެއަށް ދިމާވެފައި ހުރި ދަތި އުނދަގޫ އެތައް ކަމެއް ހައްލުކުރަން ކަމަށެވެ. އޭގެ ތެރޭގައި ބޯހިޔާވަހިކަމާއި، މާލޭގެ ޓްރެފިކާއި، ޕާކިންއަށް ހައްލު ހޯދައި ދިނުން ކަމަށެވެ. އަދި ސާފުތާހިރު ތަނަކަށް މާލެ ހަދައިދިނުމަށް ކަމަށެވެ. މީގެއިތުރުން ބުޅަލުގެ މައްސަލަ ހައްލުކުރުމާއި، އެއަށްވެސް އުޅެވޭނެ ގޮތެއް ހަދައިދީ ރައްޔިތުންނަށް ފަަސޭހައިން މާލޭގެ މަގުމަތީގައި އުޅެވޭނެ ގޮތެއް ހެދުން ކަމަށެވެ.
ރައީސް ޞާލިހް ވިދާޅުވީ، މި ކަންކަމުގެ ތެރެއިން ގިން ކަންތައްތަކަކީ ގާނޫނީ ގޮތުން ސިޓީކައުންސިލަށް މަތިކޮށްފައިވާ ކަންކަން ކަމަށެވެ. ޓްރެފިކް މައްސަލަކަމުގައި ވިޔަސް، މަގުތައް ސާފުކުރުމުގެ މައްސަލަކަމުގައި ވިޔަސް، މި ކަންކަމަކީ ގާނޫނީ ގޮތުން އެއިރަކު އޮތް ކައުންސިލަކަށް ލާޒިމްކޮށް، މަތިކޮށްފައިވާ ކަންކަން ކަމަށެވެ.
ނަމަވެސް މިހާތަނަށް އައި އިރުގައި، އަދި މިހާރު އޮތް މާލެ ސިޓީ ކައުންސިލުން އެކަމަށް އިހުމާލުވެފައިވާ ކަމަށް ރައީސް ސާލިޙު ވިދާޅުވިއެވެ. އެމަނިކުފާނު ވިދާޅުވީ މާލެއަށް ރަނގަޅު ބަދަލެއް ގެނެވޭތަނެއް ނުފެންނަ ކަމަށާއި، ސަބަބުތައް ވަރަށް ސާފު ކަމަށެވެ. އަދި މިހާތަނަށް މާލޭގެ މޭޔަރަކަށް ހުންނެވި ބޭފުޅަކު އަދި ކައުންސިލް ބޭނުންވީ ގާނޫނުގައި ބުނާ ކައުންސިލް ހިންގަން ނޫން ކަމަށެވެ. އެ ބޭފުޅުން ބޭނުންވީ ސަރުކާރެއް ހިންގަން ކަމަށް ރައީސް ޞާލިހް ވިދާޅުވިއެވެ.
ރައީސް ޞާލިހް ވިދާޅުވީ މޭޔަރަކަށް އާދަމް އާޒިމް ނުކުމެ ހުންނެވީ ގާނޫނީގޮތުން ކައުންސިލަށް މަތިކޮށްފައި ހުރި މަސައްކަތްތައް ކުރެއްވުމަށް ކަމަށެވެ. އިތުރު ސަރުކާރެއް ހަދައިގެން ވަކި ވެރިކަމެއް ކުރައްވަން ނޫން ކަމަށާއި، އަދި މިހާރު އޮތް ސަރުކާރަށް ޖެއްސުން ކުރައްވާކަށް ވެސް ނޫން ކަމަށެވެ. ރައްޔިތުންނަށް ހިދުމަތް ކުރުމަށް ކަމަށާއި، ހައްލު ހޯދައި ދިނުމަށް ކަމަށެވެ.
ރައީސް ޞާލިހް ވިދާޅުވީ ނިމިގެންދިޔަ އެމްޑީޕީ ސަރުކާރުގައި މާލޭގެ ރައްޔިތުންނަށް ދިމާވެފައިވާ އެންމެ ބޮޑު ދަތި އުނދަގުލަށް ހައްލެއް ހޯދުމަށް މަސައްކަތްތަކެއް ކުރެވުނު ކަމަށެވެ. ކޮވިޑްގެ ބޮޑު އާލަމީ ވަބާއާއި ދަތި އުނދަގުލަށް ފަހުގައި މާލެއަށް ރަނގަޅު ހައްލެއް ހޯދައި ދިނުމަށް މަސައްކަތްތަކެއް ކުރެވުނު ކަމަށެވެ.
ރައީސް ޞާލިހު ވިދާޅުވީ މާލެއަށް ހައްލު ހޯދުމަށް މާލޭގައި ހަމައެކަނި ފުލެޓްތަކެއް އެޅުމުން ނުވާނެ ކަމަށެވެ. މުޅި ރާއްޖެ ތަރައްގީވާން ޖެހޭނެ ކަމަށާއި، މާލެއަށް މީހުން ޖަމާވިޔަ ނުދިނުމަށް މާލެ ނޫން ރާއްޖޭގެ ކަންކޮޅުތަކުގައި ހިދުމަތް ފޯރުކޮށްދޭން ޖެހޭ ކަމަށެވެ. އެނޫން ގޮތަކަށް މާލެއަށް ދާއިމީ ހައްލެއް އަދިވެސް ނުލިބޭނެކަމަށް ރައީސް ޞާލިހް ވިދާޅުވިއެވެ.
ރައީސް ޞާލިހް ވިދާޅުވީ އެމްޑީޕީގެ ވެރިކަމުގައި ކުރަމުންދިޔައީ އެ މަސައްކަތް ކަމަށާއި، ރާއްޖޭގެ އެކި ރަށްރަށުގައި ލިބެން ނެތް އަސާސީ ހިދުމަތްތައް ފޯރުކޮށްދިނުމުގެ މަސައްކަތް ފެށި، ގިނަ މަސައްކަތްތަކެއް ނިމުނު ކަމަށެވެ. ބޯހިޔާވަހިކަމާއި، ސިއްހީ ހިދުމަތް ރަށްރަށުން ލިބޭނެ ގޮތް ހަދާ ދަރިވަރުންނަށް ރަނގަޅު ތައުލީމެއް ލިބޭނެގޮތް ހެދުމަށް މަސައްކަތްތަކެއް ފެށުނު ކަމަށެވެ.
ނަމަވެސް ހިތާމައަކީ މިއަދު މިހާހިސާބަށް އައި އިރުގައި މި ސަރުކާރުން, އެމްޑީޕީގެ ސަރުކާރުން ކުރަން ފެށި އެތައް މަސައްކަތެއް ހުއްޓާލާފައިވާ ކަމަށެވެ. މިއީ ހަމައެކަނި މާލެ ވަށައިގެން ހިއްކައިގެން ހައްލު ލިބޭނެ ކަމެއް ނޫން ކަމަށާއި، މުޅި މައްސަލައަށް ހައްލު ލިބޭނީ މުޅި ރާއްޖެ ތަރައްގީކޮށްގެން ކަމަށެވެ.
