ކޮމިޝަނަރު ވެސް އެންގީ ވެލެންސިއާގެ ޗެއާމަނަކީ އަޒްމީން ކަމަށް!

ކުލަބު ވެލެންސިއާގެ ޗެއާމަނަކީ ޢަބްދުﷲ އަޒްމީން ކަމަށް، ކޮމިޝަނަރ އޮފް ސްޕޯޓްސް މުހައްމަދު ޠަލާލް (ޠަލާ) އަންގަވައިފި އެވެ.

ޠަލާ ސޮއި ކުރައްވާ، ބުދަ ދުވަހު ވަނީ ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އަށް ސިޓީއެއް ފޮނުވައިފަ އެވެ. އެ ސިޓީގައި ބުނެފައި ވަނީ، އެ ކޮމިޝަންގައި ފެންނަން ހުރި ލިޔެ ކިޔުންތަކަށް ބަލާއިރު، ވެލެންސިއާގެ ޗެއާމަނަކީ އަޒްމީން ކަމަށެވެ.

ދާދި ފަހުން ވެލެންސިއާގެ ހިންގާ ކޮމެޓީގެ ބައެއް މެމްބަރުން ވަނީ އަޒްމީންގެ އިތުބާރު ނެތް ކަމަށް ނިންމައިފަ އެވެ. ނަމަވެސް، އެކަން ކޮށްފައި ވަނީ ވެލެންސިއާގެ ހިންގާ ޤަވާއިދާ ޚިލާފަށް ކަމަށް ވެސް ވަނީ ބުނެފަ އެވެ. އެގޮތުން، ކުލަބުގެ މަގާމުތަކަށް މެމްބަރުން އިންތިޚާބު ކުރުމުގެ ބާރު ލިބިގެން ވަނީ، އެކަމަށްޓަކައި ބާއްވާ އާންމު ޖަލްސާއެއްގައި ކަމަށް ވަނީ ބަޔާކޮށްފަ އެވެ. އެހެންކަމުން، އެފަދަ މަގާމަކުން މެމްބަރަކު ވަކި ކުރެވޭނީ ވެސް އެފަދަ ޖަލްސާއެއް ބާއްވައިގެން ކަމަށް ބުނެފައިވެއެވެ.

މީގެ އިތުރުން އެ ސިޓީގައި ބުނެފައި ވަނީ ކުލަބުގެ އެންމެހައި ކަންކަމެއްގައި ބަސް ބުނުމުގެ ފުރުސަތު އޮންނާނީ ޗެއާމަން އަށް ކަމަށް ވަނީ ބުނެފަ އެވެ. ހަމައެހެންމެ، ކުލަބު ތަމްސީލުކުރުމުގެ ބާރު އަދި ކުލަބުގެ ފަރާތުން ސިޓީގައި ސޮއި ކުރުމުގެ ބާރު އޮންނާނީ ޗެއާމަނަށް ކަމަށް ވެސް ވަނީ ބުނެފަ އެވެ. ކުލަބުގެ ޗެއާމަން ހުއްޓާ، ވައިސް ޗެއާމަނަށް އެކަންކަން ކުރުމުގެ ފުރުސަތު ލިބިގެން ނުވާ ކަމަށް ވެސް ބުނެފައިވެއެވެ.

އެހެންކަމުން، އަޒްމީންގެ އިތުބާރު ނެތް ކަމަށް ބުނެ ހުށަހަޅާފައިވާ ލިޔުން ބަލައި ގަނެވެން ނެތް ކަމަށް ކޮމިޝަނަރު ވަނީ ވިދާޅުވެފައެވެ. އަދި އެ ލިޔުންތައް ބަލައި ނުގަތުމަށް އެފްއޭއެމަށް ވެސް ވަނީ އަންގައިފައެވެ.