މާފަރު އެއާޕޯޓުން "ޖެޓު ފިއުލް" ހުސްވެ ޖެޓުތަކަށް ނުފުރިފައި އޮތްކަމަށް މީޑިއާތަކުން ރިޕޯޓުކުރުމުން އެކަން ޙައްލުކުރަން ފަށައިފި
7 ޖެނުއަރީ 2024 | އާދީއްތަ 08:46ޖެޓު ފިއުލް ހުސްވެ ހަތަރު ދުވަސްވީއިރު، ފަސް ޖެޓެއް ނުފުރިފައި އޮންނަންޖެހުނު
މާފަރު އެއަރޕޯޓް
މާފަރު އެއާޕޯޓުން "ޖެޓު ފިއުލް" ހުސްވެފައިވާތާ ހަތަރު ދުވަސްވެފައިވާކަމަށް މީޑިއާތަކުން ރިޕޯޓުކުރުމުން އެކަން ޙައްލު ކުރަން ފަށައިފިއެވެ.
މި ދުވަސްވަރަކީ ރާއްޖެއަށް ފަތުރުވެރިން އެންމެ ގިނައިން އަންނަ، އެންމެ ބާރުބޮޑު، ރާއްޖޭގެ ޕީކް ދުވަސްވަރަށް ވެފައި މި ދުވަސްވަރު އެފަދަ ހާލަތަކަށް ރާއްޖޭގެ ބައިނަލްއަގުވާމީ އެއާޕޯޓެއް ދިޔުމަކީ ކަންބޮޑުވުން ބޮޑު ކަމެކެވެ.
އެކަމާ ގުޅޭގޮތުން އެމްއޭސީއެލްގެ ކުރީގެ ބޯޑު މެންބަރު، މުޙައްމަދު ފިރާގް ވިދާޅުވީ މާފަރު އެއާޕޯޓުން ޖެޓުތަކަށް އަޅާ "ޖެޓު ފިއުލް" ހުސްވެފައިވާތާ ހަތަރު ދުވަސް ވެފައިވާ ކަމަށެވެ.
ފަތުރުވެރިކަމުގެ ދާއިރާގެ އިތުރުން، އޭވިއޭޝަން ދާއިރާގައި ހަރަކާތްތެރިވެވަޑައިގަންނަވާ ފިރާގް ވަނީ އޭރުވެސް ފަސް ޖެޓު ނުރުފިފައި އެބައޮތްކަން ފާހަގަ ކުރައްވައި، އެކަމުގެ ކަންބޮޑުވުން ފާޅު ކުރައްވާފައެވެ.
މައުލޫމާތު ލިބިފައިވާ ގޮތުގައި މީޑިއާތަކުން ފިރާގުގެ އެ ވާހަކަތައް ރިޕޯޓު ކުރުމުން ފިއުލް ލިބޭނެކަމަށް ބުނެ ސަރކިއުލަރއަކުން ވަނީ ކަމާބެހޭ ފަރާތްތަކަށް އަންގާފައެވެ.
ކޮންމެ އަހަރެއްގެ ވެސް މި ދުވަސްވަރަކީ ރާއްޖެއަށް ފަތުރުވެރިން އެންމެ ގިނައިން އަންނަ ދުވަސްވަރެވެ. މި ދުވަސްވަރު ޕްރައިވެޓް ޖެޓުތަކުގައި ރާއްޖެއަށް އަންނަ ފަތުރުވެރިންގެ އަދަދު ވެސް އިތުރުވެފައިވާއިރު، މިފަދަ ދުވަސްވަރަކަށް ރާއްޖޭގައިވާ ބައިނަލްއަގުވާމީ ކޮންމެ އެއާޕޯޓަކުން ވެސް ތައްޔާރުވެއެވެ. އެހެން ނަމަވެސް މި ފަހަރު ޕްލޭނިންގ ދަށް ކަމަށް ފިރާގު ވެސް ވިދާޅުވިއެވެ.
އަނެއްކޮޅުން މާފަރު އެއާޕޯޓަކީ އެފަދަ ޖެޓުތައް، ރާއްޖޭގައި އެންމެ ގިނައިން ޕާކު ކުރާ އެއް އެއާޕޯޓު ވެސް މެއެވެ.
އެހެން ކަމުން ސަރުކާރުގެ މަގާމުތަކުގައި ތިއްބެވި ބޭފުޅުން 24 ގަޑިއިރު ސޯޝަލް މީޑިޔާގައި ހަރަކާތްތެރިވުމަށް ވުރެ، އެބޭފުޅުންނާ ހަވާލުކުރެވިފައިވާ ޒިންމާތައް އަދާކުރުން މުހިންމު ކަމަށް ފިރާގް ވިދާޅުވިއެވެ.
