ކަމާ ބެހޭ ފަރާތްތަކުން މަޝްވަރާ ކުރުމަށްފަހު ރޯދައިގެ ފަހުން މަޖިލިސް އިންތިޚާބު ބާއްވަން ނިންމާފައިވަނިކޮށް، ސަރުކާރުގެ ނުފޫޒުން، ރޯދަ މަހުގެ ތެރޭގައި މަޖިލިސް އިންތިޚާބު ބާއްވަން އުޅޭކަމުގެ ތުހުމަތު އެމްޑީޕީން ކޮށްފިއެވެ.

އެކަމުގެ ކަންބޮޑުވުން ފާޅުކޮށް އެމްޑީޕީން ބުރަސްފަތި ދުވަހު، އިލެކްޝަންސް ކޮމިޝަން (އީސީ)ގެ ރައީސް ފުއާދު ތައުފީގަށް އެޑްރެސްކޮށް ފޮނުވި ސިޓީއެއްގައި ވަނީ 2024 ވަނަ އަހަރުގެ މަޖިލިސް އިންތިޚާބު ބާއްވާނެ ތާރީޚަކާ ގުޅިގެން ކޮމިޝަނުން މަޖިލީހަށް ލަފައަކަށް އެދުމުން، އެ އަހަރުގެ ރޯދައިގެ ފަހުން އިންތިޚާބު ބޭއްވުމަށް ލަފާދީފައިވާ ކަމަށެވެ.

އަދި އޭގެ އިތުރުން، އެ ކޮމިޝަނުން އުފައްދާފައިވާ ގައުމީ ލަފާދޭ ކޮމެޓީގައި ވެސް އިންތިޚާބު ބާއްވާނެ ތާރީޚަކާ ގުޅިގެން ލަފައަކަށް އެދުމުން، ސަރުކާރު ހިންގާ ކޯލިޝަން ޕާޓީތައް ފިޔަވަހި ދެން ބައިވެރިވި ހުރިހާ ފަރާތްތަކުން ވެސް އެދުނީ ރަމަޟާން މަހުގެ ފަހުން އިންތިހާބު ބޭއްވުމަށެވެ.

އެ ފަރާތްތަކުގެ ތެރޭގައި ސިޔާސީ ޕާޓީތަކުގެ އިތުރުން، އެންޓި ކޮރަޕްޝަން ކޮމިޝަން، ހިއުމަން ރައިޓްސް ކޮމިޝަން އަދި ޓްރާންސްޕޭރެންސީ މޯލްޑިވްސް ފަދަ ޖަމިއްޔާތައް ވެސް ހިމެނެއެވެ.

އެހެން ނަމަވެސް، އެ ލަފާތަކާ ޚިލާފަށް ސަރުކާރުގެ ނުފޫޒުން، ކުރިއަށް އޮތް މަޖިލިސް އިންތިހާބު ރަމަޟާން މަހުގެ ތެރޭގައި ބޭއްވުމަށް އީސީން ނިންމަންއުޅޭ ކަމަށް އެމްޑީޕީން ވަނީ ތުހުމަތުކޮށްފައެވެ.

އޭގެ ސަބަބުތަކެއް ކަމުގައި އެމްޑީޕީން ބުނީ، ގައުމީ ލަފާދޭ ކޮމެޓީގައި އިންތިޚާބު ބާއްވާނެ ތާރީޚާ މެދު ޚިޔާލު ތަފާތުވީ ސަރުކާރުގައި ހިމެނޭ ޕީއެންސީ އަދި ޕީޕީއެމް އެކަނި ކަމަށް ވާތީއެވެ.

އެހެންކަމުން ގިނަ ޖަމިއްޔާތަކާއި އަދި ރައްޔިތުންގެ މަޖިލީހުން ވެސް ލަފާދިން ގޮތަށް، މިއަހަރު ބާއްވާ މަޖިލީސް އިންތިހާބު ރޯދައިގެ ފަހުން ބޭއްވުމަށް އެމްޑީޕީން ވަނީ އެދިފައެވެ.