ޕްރައިމަރީއަކާ ނުލާ އެމްޑީޕީގެ މަޖިލިސް ޓިކެޓް 36 ފަރާތަކަށް
ޓިކެޓް ކަށަވަރުވި މެންބަރުންގެ ތެރޭގައި މިހާރުވެސް މަޖިލީހުގައި އެކި ދާއިރާތައް ތަމްސީލުކުރައްވާ 14 މެންބަރުން ހިމެނޭ
އެމްޑީޕީގެ 4 ވަނަ ދައުރުގެ ނުވަ ވަނަ ޤައުމީ މަޖިލީހުގެ ޖަލްސާގެ ތެރެއިން
20 ވަނަ ރައްޔިތުންގެ މަޖިލިސް އިންތިހާބުގައި، އެމްޑީޕީގެ ފަރާތުން ކުރިމަތިލުމަށް ހުޅުވާލި ފުރުސަތުގައި 36 ދާއިރާއަކަށް ކުރިމަތިލި ފަރާތްތަކަށް ޕްރައިމަރީއާއި ނުލައި ޓިކެޓް ކަށަވަރުވެއްޖެއެވެ.
އެމްޑީޕީން ބުނީ 2024 ވަނަ އަހަރު ބޭއްވުމަށް ހަމަޖެހިފައިވާ 20 ވަނަ ރައްޔިތުންގެ މަޖިލިސް އިންތިޚާބުގައި އެޕާޓީގެ ޓިކެޓްގައި ވާދަކުރަން ބޭނުންވާ އެމްޑީޕީގެ މެމްބަރުންނަށް ޝައުޤުވެރިކަން ފާޅުކުރުމުގެ ފުރުޞަތުގައި، އެއް ކެންޑިޑޭޓަކު ކުރިމަތިލާފައިވާ ދާއިރާތަކަށް ޕްރައިމަރީއަކާއި ނުލާ ޕާޓީ ޓިކެޓް ކަށަވަރުކުރެވިފާ ކަމަށެވެ. 36 ދާއިރާއެއްގެ ޓިކެޓް ޕްރައިމަރީއަކާއި ނުލާ ކަށަވަރުވެފައިވާ އިރު، އެއް ކެންޑިޑޭޓަަކަށްވުރެން ގިނަ ކެންޑިޑޭޓުން ކުރިމަތިލާފައިވާ ދާއިރާތައް ޤައުމީ މަޖްލީހުން ނިންމުމާއި އެއްގޮތަށް އެކަށައެޅިފައިވާ ވިލަރެސް ކޮމެޓީއިން ނިންމާގޮތެއް ފަހުގެ ތާރީހެއްގައި އިއުލާންކުރާނެ ކަމަށް އެމްޑީޕީން ބުނެއެވެ.
ޕްރައިމަރީއަކާ ނުލާ ޓިކެޓް ކަށަވަރުވި މެންބަރުންގެ ތެރޭގައި މިހާރުވެސް މަޖިލީހުގައި އެކި ދާއިރާތައް ތަމްސީލުކުރައްވާ 14 މެންބަރުން ހިމެނިވަޑައިގަންނަވައެވެ.
20 ވަނަ ރައްޔިތުންގެ މަޖިލީހުގެ އިންތިހާބުގައި އެމްޑީޕީން ކުރިމަތިލާން ބޭނުންވާ ފަރާތްތަކަށް އެ ފުރުސަތު ހުޅުވާލީ މިދިޔަ މަހުގެ 16 ވަނަ ދުވަހުއެވެ. އެ މުއްދަތު ހަމަވީ ޑިސެމްބަރު މަހުގެ 30 ވަނަ ދުވަހަށެވެ.
އެމްޑީޕީން ބުނެފައިވަނީ ޖެނުއަރީ 26 އަދި 27 ގައި ޕްރައިމަރީ ބާއްވަންޖެހޭ ދާއިރާތަކުގެ ޕްރައިމަރީ ބާއްވާނެކަމަށެވެ.
