އިސްލާމީ އަގީދާގެ މައްޗަށް މުޖްތަމައު ތަރުބިއްޔަތުކުރުމަށް ހިންގާ "ރިސާލާތު" ޕްރޮގްރާމް އިފްތިތާހްކޮށްފި

ދިވެހި ރައްޔިތުންގެ ހިތްތަކުގައި އިސްލާމްކަމާއި އީމާންކަމުގެ ރުކުންތައް ހަރުދަނާކޮށް ޢަޤީދާ ވަރުގަދަކުރުމާއެކު އިސްލާމްދީނުގެ މައިގަނޑު ރުކުންތަކަށް އަހުލުވެރިވެފައިވާ ޖީލެއް ބިނާކުރުމުގެ ބޭނުމުގައި އިސްލާމީ ކަންތައްތަކާ ބެހޭ ވުޒާރާއިން ކުރިއަށްގެންދިޔުމަށް ނިންމާފައިވާ "ރިސާލާތު" ޕްރޮގްރާމް ލޯންޗުކޮށްފިއެވެ.

ބުދަ ދުވަހު އިސްލާމީ މަރުކަޒުގެ ދަރުބާރުކުރާ ހޯލުގައި ބޭއްވި ހާއްސަ ރަސްމިއްޔާތެއްގައި މި ޕްރޮގްރާމު ލޯންޗުކޮށްދެއްވީ އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސައީދެވެ.

އެގޮތުން އެ ރަސްމިއްޔާތުގައި ވާހަކަފުޅު ދައްކަވަމުން ވަޒީރު ވިދާޅުވީ އެ ޕްރޮގްރާމް މިއަހަރުގެ ތެރޭގައި މުޅި ރާއްޖޭގައި ކުރިއަށް ގެންދިޔުމަށް ހަމަޖެހިފައިވާކަމަށާއި، އެ ޕްރޮގްރާމްގެ ފުރަތަމަ ޕްލޭންގައި އިސްލާމްދީނުގެ ރުކުންތަކާއި، އުންމަތައް ބޭނުންވާ މުހިންމު ފިލާވަޅުތަކެއް ގެނެސްދޭނެ ކަމަށެވެ.

އަދި އެ ޕްރޮގްރާމް އެންމެ މުހިންމުވާ ސަބަބަކީ އިސްލާމްދީނުގައި ކޮންމެހެން އެނގެންޖެހޭ ކަންކަންތައް އެ ޕްރޮގްރާމުން އަންގައިދިނުމުގެ އިތުރުން، އެކަމުގެ ސަބަބުން ދިވެހިންގެ ހިތްތަކުގައި އިސްލާމީ އަޤީދާ ވަރުގަދަވާތީ ކަމަށް ވެސް ވަޒީރު ވިދާޅުވިއެވެ.

ވަޒީރު ވިދާޅުވީ އެކަމުގެ ސަބަބުން އިސްލާމްދީނުގެ ތެރޭގައި ހުރި މުހިންމު ކަންކަމަށް ޒުވާނުންގެ ހޭލުންތެރިކަން އިތުރުވާނެ ކަމަށެވެ.

މި ފިލާވަޅުތައް ކުރިއަށް ގެންދިޔުމަށް ހަމަޖެހިފައިވަނީ މިސްކިތްތަކުގައި ދޭ ޚުތުބާތަކުގައާއި ދަރުސްތަކުގައެވެ. އަދި މިޑިއާ ޕްރޮގްރާމްތަކާއި، ފޯރަމްތަކާއި، ސެމިނާތަކުގައި ވެސް މިކަމާގުޅޭ މުހިއްމު މަޢުލޫމާތުތައް ހިއްސާ ކުރުމަށްވަނީ ހަމަޖެހިފައެވެ.

އެގޮތުން މި ޕްރޮގްރާމްގައި ޝަހާދަތުގެ ދެކަލިމަ، ނަމާދު، ޒާކާތް، ރޯދަ، ޙައްޖު، މާތް ﷲ އަށް އީމާންވުން، މަލާއިކަތުންނަށް އީމާންވުން، ފޮތްތަކަށް އީމާންވުން، ރަސޫލު ބޭކަލުންނަށް އީމާންވުން އަދި އިޙްސާންކަމުގެ މުހިއްމު ފިލާވަޅުތަކެއް ވަނީ ހިމަނާފައެވެ.