ޕީއެސްގެ މަޤާމަކީ ޑެޕިއުޓީ މިނިސްޓަރާ އެއްފަންތީގެ މަޤާމެއްކަމަށް ބަޔާންކުރާ މާއްދާ އުވާލައިފި
އިސްލާޙުގައި ވަނީ ސިވިލް ސަރވިސް ޤަވާއިދުގެ 26 ވަނަ މާއްދާގެ (ށ) އުނިކުރާ ވާހަކަ
ވެލާނާގެއަކީ ސަރުކާރުގެ ގިނަ އޮފީސްތަކެއް ހިންގާ އިމާރާތެއް
ޕަރމަނަންޓް ސެކްރެޓަރީގެ މަޤާމަކީ ދަރަޖައިގެ ގޮތުން ޑެޕިއުޓީ މިނިސްޓަރާ އެއްފަންތީގެ މަޤާމެއްކަމަށް ބަޔާންކޮށް ދިވެހި ސިވިލް ސަރވިސްގެ ޤަވާއިދުގައި ހިމަނާފައިވާ މާއްދާ އުވާލައިފިއެވެ.
މި މާއްދާ އުވަލާފައިވަނީ ދިވެހި ސިވިލް ސަރވިސްގެ ގަވާއިދު 2014 އަށް 12 ވަނަ އިޞްލާޙު ގެނައުމުގެ ގަވާއިދުގެ ދަށުންނެވެ.
އެ އިސްލާޙުގައި ވަނީ ސިވިލް ސަރވިސް ޤަވާއިދުގެ 26 ވަނަ މާއްދާގެ (ށ) އުނިކުރާ ވާހަކައެވެ.
ސިވިލް ސަރވިސް ޤަވާއިދުގެ 26 ވަނަ މާއްދާއަކީ ޕާމަނަންޓް ސެކެޓަރީއާ ބެހޭ މާއްދާއެވެ. އެ މާއްދާގެ (ހ) ގައި ބަޔާންކޮށްފައިވަނީ ޕަރމަނަންޓް ސެކްރެޓަރީއަކީ އޭނާ ވަޒީފާ އަދާ ކުރާ އޮފީހުގެ އިސްވެރިޔާ ކަނޑައަޅާ ސިޔާސަތާއި އުސޫލުތަކާ އެއްގޮތްވާ ގޮތުގެ މަތީން އެ މަސްއޫލު އޮފީހާއި ދާއިރާގެ އެންމެހައި ކަންތައްތައް ހިންގުމުގައި ފުރިހަމައަށް އެހީތެރިވެ އެއްބާރުލައި، އިސްވެރިޔާގެ އިރުޝާދާ އެއްގޮތަށް އެ ކަންތައްތައް ތަންފީޛުކޮށް ހިންގައި ބެލެހެއްޓުމުގެ ޒިންމާދާރު އިސްވެރިޔާ ކަމަށެވެ.
އެ މާއްދާގެ (ށ) ގައި އޮންނަނީ ޕަރމަނަންޓް ސެކްރެޓަރީގެ މަޤާމަކީ ދަރަޖައިގެ ގޮތުން ޑެޕިއުޓީ މިނިސްޓަރާ އެއްފަންތީގެ މަޤާމެެއް ކަމަށެވެ. ނަމަވެސް އަލަށް ގެނައި އިސްލާޙާއެކު އެ މާއްދާ މިހާރު ވަނީ އުވާލާފައެވެ.
އެކަމާ ގުޅޭގޮތުން ރާއްޖެއެމްވީއާ ވާހަކަ ދައްކަވަމުން ސިވިލް ސާވިސް ކޮމިޝަންގެ ރައީސް މުހައްމަދު ނާސިހު ވިދާޅުވީ، ފުރަތަމަ 2008 ވަނަ އަހަރު ޕީއެސްއިން އައްޔަނުކުރިއިރު މުސާރަ ހަމަޖެއްސުމަށް އޭރު ބެލިއިރު، މިނިސްޓަރުން ފިޔަވައި ސިޔާސީ ގޮތުން އެންމެ މަތީ މަޤާމަކަށް އޮތީ، ޑެޕިއުޓީ މިނިސްޓަރުންގެ ދަރަޖަ ކަމަށެވެ. ވުމާއެކު އޭރު ބެލީ އެ މުސާރައާ އެއް ފެންވަރުގެ މުސާރައެއް ދިނުމަށް ކަމަށް ނާސިހު ވިދާޅުވިއެވެ.
މިހާރުގެ ޙާލަތަށް ބަލާއިރު، ސްޓޭޓު މިނިސްޓަރުން ފަދަ ޑެޕިއުޓީ މިނިސްޓަރުންނަށްވުރެ މަތީ ފަންތީގެ މަަޤާމުތައް ތިބޭކަން ފާހަގަ ކުރައްވައި ނާސިހު ވިދާޅުވީ، ސީއެސްސީގެ މުސާރައިގެ އޮނިގަނޑަށް ބަދަލު ގެންނައިރު ގެންނަންޖެހޭ ބަދަލުތައް ގެންނާނެކަމަށެވެ.
