ޒުވާން އިމާމު ކަމަށް 100 ޒުވާނުން ކުރިމަތިލައިފި، ރޯދަމަހަށް ތަމްރީނު ނިންމާލެވޭނެ: ޝަހީމް

ޒުވާން އިމާމުން ތަމްރީނު ކުރުމަށް ހިންގާ ޒުވާން ޚަތީބު މަޝްރޫއުގެ ތެރެއިން ޚުތުބާ ކިޔުމުގެ ހުއްދަ ނެގުމަށް 100 ޒުވާނުން ކުރިމަތިލައިފައިވާ ކަމަށާއި، އެ ޒުވާނުންނަށް ދޭންޖެހޭ ތަމްރީނުތައް މި އަންނަ ރޯދަ މަހުގެ ކުރިން ނިންމާލެވޭނެ ކަމަށް އިސްލާމީ ކަންތައްތަކާ ބެހޭ ވަޒީރު މުޙައްމަދު ޝަހީމް އަލީ ސައީދު ވިދާޅުވެއްޖެއެވެ.

އިސްލާމީ ކަންތައްތަކާ ބެހޭ ވުޒާރާއިން ގްރޭޑް 10, 11، 12 ގައި ކިޔަވާ ދަރިވަރުންނާއި ސްކޫލް ނިންމާފައިވާ ދަރިވަރުންނަށް އިމާމުވެ ހުކުރު ނަމާދު ކުރުމުގެ ހުއްދައަށް އެދުމުގެ ފުރުސަތު ހުޅުވާލީ މިދިޔަ ޑިސެމްބަރު މަހުގެ ތެރޭގައި އެވެ.

އެ މަސައްކަތުގެ އަދާހަމަ ދެއްވަމުން ހޯމަ ދުވަހު ވަޒީރު ޝަހީމް "އެކްސް"ގައި ކުރެއްވި ޕޯސްޓެއްގައި ވިދާޅުވީ ޚުޠުބާ ކިއުމުގެ ހުއްދަ ނަގަން 100 ޒުވާނުން ކުރިމަތިލައިފައިވާ ކަމަށާއި، އެ ޒުވާނުންގެ އިންޓަވިއުތައް މި އަންނަ ހަފުތާގެ ތެރޭގައި ފެށޭނެ ކަމަށެވެ. އަދި އޭގެ ފަހުން ފިގުހީ ތަމްރީނުތަކެއް ޒުވާނުންނަށް ދިނުމަށް ނިންމާފައިވާއިރު، އެ މަސައްކަތްތައް ރޯދަ މަހުގެ ކުރިން ނިންމާލެވޭނެ ކަމަށް ވަޒީރު ވިދާޅުވިއެވެ.

އެ ޕޯސްޓާއެކު ވަޒީރު ވަނީ ޒުވާން ޚަތީބު މަޝްރޫއު ރާވާފައިވާ ގޮތް ވެސް ހިއްސާކުރައްވާފައެވެ. އެގޮތުން އެކަމަށް ޝައުގުވެރިވާ ޒުވާނުން ފޯމު ހުށަހެޅުމަށްފަހު، އެ ބައިވެރިންގެ އިންޓަވިއު ނެގުން އޮންނަ އިރު، އިންޓަވިއު ބޭއްވުމަށް ހަމަޖެހިފައިވަނީ މާލޭގައި ނަމަ ހާޒިރުކޮށްގެން އަދި މާލެ ސަރަހައްދުން ބޭރުން ނަމަ އޮންލައިންކޮށެވެ.

އެގޮތުން އިންޓަވިއުގައި ޤުރްއާން ކިޔެވުން އަޑުއެހުމުގެ އިތުރުން، އިސްލާމީ ވުޒާރާގެ ވެބްސައިޓުގައިވާ ޚުތުބާތަކުން އެ ޒުވާނަކު އިޚްތިޔާރުކުރާ ޚުތުބާއެއް ކިޔުން އޮންނާނެއެވެ. އެ ޒުވާނުންނަށް ހުއްދަ ދޭނީ އެ އިންޓަވިއުއަށް ފަހުއެވެ.

އެގޮތުން ހުއްދަ ދެވޭ ޒުވާނުންނަށް އިމާމުކަމުގެ ޚަައްސަ ތަމްރީނެއް ދެވޭއިރު، މާލެ ސަރަހައްދުގައި ދިރިއުޅޭ ޒުވާނުންނަށް އެ ތަމްރީނު ކުރިއަށްދާނީ މާލޭގައެވެ. އަދި ރާއްޖޭގެ އެހެން ސަރަހައްދުތަކުގައި ތިބި ޒުވާނުން ނަމަ، އެ ސަރަހައްދުތަކެއްގައި އެ ތަމްރީނު ކުރިއަށްގެންދާނެއެވެ.

އެ ތަމްރީނުގައި މޮސްކް މެނޭޖްމެންޓް، ޚުޠުބާ ކިޔުމުގެ ފަންނު، ޖަނާޒާގެ ކަންކަން، އިމާމުގެ އަޚްލާގު، މިސްކިތުގެ ދައުރު، ނަމާދުގެ ފިގުހު ފަދަ ދާއިރާތަކުން ތަމްރީނު ދޭނެއެވެ. މި ޕްރޮގްރާމުގައި އިމްތިހާނެއް ނޯންނާނެއެވެ.

މި ޕްރޮގްރާމަށް ފުރުސަތު ހުޅުވާލަމުން އެ މިނިސްޓްރީން އޭރު ބުނި ގޮތުގައި އެ ފުރުސަތު ހުޅުވާލާފައިވަނީ ތަޖުވީދުގެ ހަމަތަކާ އެއްގޮތަށް ރީތިކޮށް ޤުރުއާން ކިޔަވައި، ނަމާދުގެ ފިޤުހުގެ ބައިތަކަށް އަހުލުވެރިވެފައިވާ ދަރިވަރުންނަށެވެ. އެގޮތުން އެ ފުރުސަތު ރާއްޖޭގެ ހުރިހާ ރަށެއްގެ ދަރިވަރުންނަށް ވެސް ހުޅުވާލިއެވެ.