ފާއިތުވި 24 ގަޑިއިރު ތެރޭގައި އެންމެ ގިނައިން ވާރޭ ވެހިފައިވަނީ ލ. ކައްދުއަށް ކަމަށް، މޫސުމާބެހޭ ގައުމީ އިދާރާއިން ބުނެފިއެވެ.

އެ އިދާރާއިން ބުނީ މިހާރު ރާއްޖެއަށް ކުރަމުންދާ ވިއްސާރައިގައި ހޮނިހިރު ދުވަހު ހެނދުނު 8:00ން ފެށިގެން އާދިއްތަ ދުވަހުގެ ހެނދުނު 8:00އާ ހަމައަށް، ކައްދުއަށް 119 މިލިމީޓަރުގެ ވާރޭ ވެހިފައިވާކަމަށެވެ. އަދި ދެވަނައަށް އެންމެ ގިނައިން ވާރޭ ވެހިފައިވަނީ މާލެއަށެވެ. އެއީ 73.7 މިލިމީޓަރުގެ ވާރެއެވެ.

މާލެ ފިޔަވައި ދެން އެންމެ ގިނައިން ވާރޭ ވެހުނު ކަމަށް ރިކޯޑް ކުރެވިފައިވަނީ އއ. ތޮއްޑުއާއި ހުޅުމާލޭގެ އިތުރުން ކާށިދުއަށެވެ. ރާއްޖެއަށް މިހާރު ކުރަމުންދާ ވިއްސާރާގައި ގިނަ ރަށްތަކުގައި ފެންބޮޑުވުމުގެ ހާދިސާތައް ހިނގައި، އެކިވަރުގެ ގެއްލުންތައް ދަނީ ލިބެމުންނެވެ. އަދި ފެންބޮޑުވެފައިވާ ރަށްތަކުގައި އެހީތެރިކަން ފޯރުކޮށްދީ، ފެން ބޮޑުވެފައިވާ ސަރަހައްދުތަކުގައި ފެންހިންދުމުގެ މަސައްކަތް ކަމާބެހޭ ފަރާތްތަކުން ދަނީ ކުރަމުންނެވެ.

މޫސުމާބެހޭ ގައުމީ އިދާރާއިން ވަނީ، ބޯކޮށް ވާރޭވެހި ގުގުރުން އެކަށީގެންވާ ކަމަށް ބުނެފައެވެ. އަދި ވިލާގަނޑުގައި ގަޑިއަކު 45 މޭލަށް ވައި ގަދަވެ، ކަނޑުތައް ގަދަވާނެ ކަމަށްވެސް ވަނީ ބުނެފައެވެ.

މޫސުން ގޯސްވެ، ކ އަތޮޅުން ފެށިގެން އދ އަތޮޅަށް އާދިއްތަ ދުވަހު ވަނީ އޮރެންޖް އެލަރޓްވެސް ނެރެފައެވެ.

ރާއްޖެއަށް މިހާރު ކުރަމުންދާ ވިއްސާރައާ ގުޅިގެން ކ އަތޮޅުން ފެށިގެން އދ އަތޮޅަށް ނެރެފައިވާ އޮރެންޖް އެލަރޓް ނެރެފައިވަނީ އާދިއްތަ ދުވަހުގެ 15:15އިން ފެށިގެން 17:30ށެވެ.

މޫސުމާބެހޭ ގައުމީ އިދާރާއިން ބުނީ، އެ ހިސާބުތަކަށް ގުގުރުމާއެކު ބޯކޮށް ވާރޭ ވެހޭނެ ކަމަށް ލަފާކުރެވޭ ކަމަށެވެ. އަދި މި ސަރަހައްދުތަކަށް ފެންބޮޑުވާނެ ކަމަށް ލަފާކޮށްފައިވެއެވެ.

އާދިއްތަ ދުވަހު ރާއްޖޭގެ އެކި ހިސާބުތަކަށް ބޯކޮށް ވާރޭ ވެހެމުންދާކަން ފާހަގަކޮށްލެވެއެވެ.

އެގޮތުން ރާއްޖެއަށް މޫސުން ގޯސްވުމާ ގުޅިގެން މީގެ ކުރިންވެސް ރާއްޖޭގެ ބޮޑު ބަޔަކަށް ވަނީ ޔެލޯ އެލަރޓް ނެރެފައެވެ.

މޫސުމާބެހޭ ގައުމީ އިދާރާއިން ޔެލޯ އެލަރޓް ނެރެފައިވަނީ ނ އަތޮޅުން ފެށިގެން ލ އަތޮޅަށެވެ. އެއީ އާދިއްތަ ދުވަހުގެ 13:00ން 17:00ށެވެ.