އަދި އިިދިކޮޅު ޕާޓީގައި ހުންނެވި ނަމަވެސް، ސަރުކާރުން ކުރާ ރަނގަޅު ކަންކަން ފާހަގަ ކުރައްވައި، ޕާޓީގެ ފަރާތުން ފެންނަ އެންމެ ހިތްޕުޅާ ނުވާ ކަންކަން ވެސް ފާހަގަ ކުރައްވާނެ ކަމަށް ވިދާޅުވި
ވައިކަރަދޫ ދާއިރާގެ މެންބަރު ހުސެއިން ޒިޔާދު (ފިއްޓެ)
މި ސަރުކާރުން ކުރާ ރަނގަޅު ކަންކަމުގައި ސަރުކާރަށް ތާއީދުކުރި ނަމަވެސް، ރައްޔިތުން މަޖިލީހަށް ހޮވީ އެމްޑީޕީގެ މެންބަރެއްގެ ގޮތުގައި ކަމުން، މަޖިލީހުގެ މި ދައުރު ނިންމާލާނީ އެމްޑީޕީގެ މެންބަރެއްގެ ގޮތުގައި ހުންނަވައިގެން ކަމަށް ވައިކަރަދޫ ދާއިރާގެ މެންބަރު ހުސެއިން ޒިޔާދު (ފިއްޓެ) ވިދާޅުވެއްޖެ އެވެ.
ޒިޔާދު މިފަދައިން ވިދާޅުވީ އެމްޑީޕީގެ 13 މެމްބަރަކު ޕާޓީ ދޫކުރައްވައި ވެރިކަން ކުރާ ޕީއެންސީއާ ގުޅިވަޑައިގަތުމާ ގުޅިގެން، އެކަމަށް އިޝާރަތްކުރައްވައި ރާއްޖެ ޓީވީގެ "ފަލަ ސުރުޚީ" ޕްރޮގްރާމުގައި ވާހަކަ ދައްކަވަމުންނެވެ.
އެގޮތުން މެންބަރު ޒިޔާދި ވިދާޅުވީ މި ސަރުކާރުން މަސައްކަތް ކުރަނީ އެބޭފުޅުން ގަބޫލުކުރާ ހަމަތަކުގެ މަތިން، ރަނގަޅު ގޮތުގައި ކަމުގައިވަނީނަަމަ، ސަރުކާރާ ގުޅުމަކީ ވިސްނާލެވޭނެ ކަމެއް ކަމަށާއި، އެހެން ނަމަވެސް އެއީ ސަރުކާރުގެ ރަނގަޅު މަސައްކަތްތަކަށް ތާއީދުކުރެއްވުމަށް ކަމަށެވެ. ޒިޔާދު ވިދާޅުވީ އެހެން ނަމަވެސް މި ދައުރުގެ މަޖިލީހަށް ރައްޔިތުން އެބޭފުޅާ ހޮވީ އެމްޑީޕީގެ މެންބަރެއްގެ ގޮތުގައި ކަމުން، ދައުރު ނިންމަވާލަން ބޭނުންފުޅުވަނީ ވެސް އެމްޑީޕީގެ މެންބަރެއްގެ ގޮތުގައި ކަމަށެވެ.
މެންބަރު ވިދާޅުވީ ސަރުކާރާ އިިދިކޮޅު ޕާޓީގައި ހުންނެވި ނަމަވެސް، ސަރުކާރުން ކުރާ ރަނގަޅު ކަންކަން ފާހަގަ ކުރައްވައި، ޕާޓީގެ ފަރާތުން ފެންނަ އެންމެ ހިތްޕުޅާ ނުވާ ކަންކަން ވެސް ފާހަގަ ކުރައްވާނެ ކަމަށެވެ. އެގޮތުން ވަޒީރުންނަށް ރުހުން ދިނުން ލަސްވުމަކީ ކަންބޮޑުވާ ކަމެއް ކަމަށާއި، އެކަމާ އެބޭފުޅާ ދެކޮޅު ހައްދަވާ ކަމަށެވެ. އަދި މެންބަރު ގަބޫލުކުރައްވާ ގޮތުގައި މިހާރު ތިއްބެވި ވަޒީރުންނަކީ ރުހުން ދެވިފައިތިއްބެވި ބަޔަކަށް ވާންޖެހޭނެ ކަމަށް ވެސް ޒިޔާދު ވިދާޅުވިއެވެ.
މެންބަރު ވިދާޅުވީ ޖެއްސުން ކޮށް، ސަރުކާރަށް އެއްވެސްކަމެއް ވިޔަ ނުދޭން އެބޭފުޅުން މަސައްކަތް ނުކުރައްވާނެ ކަމަށާއި، މަސައްކަތް ކުރައްވާނީ ސަރުކާރުން ކުރާ ރަނގަޅު ކަންކަމުގައި ދޭން ޖެހޭ އެއްބާރުލުން ދޭން ކަމަށެވެ.
