"އެމްޑީޕީގެ ރަންރީދޫ ލަޝްކަރު ތިބޭނީ އަބަދުވެސް ވަރުގަދަ ޢަޒުމުގައި، ހިތްވަރުގެ ކަމަރު ބަނދެގެން"

އެމްޑީޕީގެ ރަންރީދޫ ލަޝްކަރު ތިބޭނީ އަބަދުވެސް ވަރުގަދަ ޢަޒުމުގައި ހިތްވަރުގެ ކަމަރު ބަނދެގެން، ކުރިޔަށް މިސްރާބު ޖަހައިގެން ކަމަށް ކުރީގެ ފޮރިން މިނިސްޓަރު އަބްދުﷲ ޝާޙިދު ވިދާޅުވެއްޖެއެވެ.

ޝާހިދު މިހެން ވިދާޅުވީ އެމްޑީޕީގެ 13 މެމްބަރަކު، އެމްޑީޕީން ވަކިވެވަޑައިގެން ޕީއެންސީއަށް ބަދަލުވެވަޑައިގަތުމާ ގުޅިގެން "އެކްސް"ގައި ކުރެއްވިޕޯސްޓެއްގައިއެވެ.

Advertisement

އެގޮތުން އެކަމަށް އިޝާރަތްކުރެއްވި ނަމަވެސް، ވަކި ކަމެއް ވިދާޅުނުވެ ޝާހިދު ވިދާޅުވީ އެމްޑީޕީއަކީ ޑިމޮކްރެޓިކް އުސޫލުތަކުގެ މައްޗަށް ބިނާކޮށް ދިވެހި ރައްޔިތުންގެ އުންމީދުތައް ޙާސިލުކޮށް ދިނުމަށް އުފެދި ކުރިއަށްދާ ރާއްޖޭގެ އެންމެ ދުވަސްވީ އެންމެ ފަޚުރުވެރި ޕާޓީކަމަށާއި، އެމްޑީޕީ ވަނީ އުފަލާއި، ހިތާމާއި، ކާމިޔާބީ އާއި ނާކާމިޔާބީ ވެސް ތަޖުރިބާކޮށްފައި ކަމަށެވެ.

އެގޮތުން މި ދަނޑިވަޅަކީ އަނެއްކާވެސް އައު ހިތްވަރާ، އައު ޖޯޝަކާއި އެކު ރައްޔިތުންނާއި ޤައުމުގެ ޙައްޤުގައި ސާބިތުވެ ތިބެންވީ ވަގުތު ކަމަށާއި، މި ވަގުތަކީ އައު އުންމީދުތަކާއި އައު ލަނޑުދަނޑިި ތަކަކާއި އެކު ނިކުންނަންވީ ދަނޑިވަޅު ކަމަށެވެ.

އެއާއެކު ޝާހިދު ވިދާޅުވީ އެމްޑީޕީގެ ލަޝްކަރު ތިބޭނީ އަބަދުވެސް ވަރުގަދަ ޢަޒުމުގައި ހިތްވަރުގެ ކަމަރުބަނދެގެން، ކުރިޔަށް މިސްރާބު ޖަހައިގެން ކަމަށެވެ.

ޝާހިދު އެފަދައިން ވިދާޅުވިއިރު، އެމްޑީޕީގެ މެމްބަރުންނަށް ބޮޑެތި އޮފާތަކެއް ހުށަހެޅިކަމުގެ އަޑު ފެތުރިފައި ވަނިކޮށް، 13 މެމްބަރަކު އެމްޑީޕީ ދޫކުރައްވައި ޕީއެންސީއަށް ވަނީ ސޮއިކުރައްވައިފައެވެ.

ޕީއެންސީއަށް ސޮއިކުރެއްވި މެމްބަރުންނަކީ

1 - މަރަދޫ ދާއިރާގެ މެމްބަރު އިބްރާހީމް ޝަރީފް

2 - މައްޗަންގޮޅީ ދެކުނު ދާއިރާގެ މެމްބަރު މުހައްމަދު ހައިތަމް

3 - ފޭދޫ ދާއިރާގެ މެމްބަރު މުހައްމަދު ނިހާދު

4 - އިސްދޫ ދާއިރާގެ މެމްބަރު އަލީ ހަމީދު

5 - ކުރެންދޫ ދާއިރާގެ މެމްބަރު އަބްދުލްޣަނީ

6 - ކަނޑިތީމު ދާއިރާގެ މެމްބަރު އަބްދުﷲ ޝަހީމް އަބްދުލްހަކީމް

7- މަތިވެރީ ދާއިރާގެ މެމްބަރު ހަސަން ޒަރީރް

8 - މުލަކު ދާއިރާގެ މެމްބަރު އިބްރާހީމް ނަސީރު

9- ނިލަންދޫ ދާއިރާގެ މެމްބަރު އަބްދުލް މުހްސިން ހަމީދު

10- ގުރައިދޫ ދާއިރާގެ މެމްބަރު އިބްރާހީމް ޝާޒް

11- ތޮއްޑޫ ދާއިރާގެ މެމްބަރު ހަސަން ޝިޔާން

12- ކޮމަންޑޫ ދާއިރާގެ މެމްބަރު އިބްރާހީމް ރާޝިދު، އަދި

13- މާފަންނު ދެކުނު ދާއިރާގެ މެމްބަރު އާދަމް އަލީއެވެ.