ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ކުރީގެ ރައީސް ޑރ. މުހައްމަދު ވަހީދު ހާސަންއާ ބައްދަލުކުރައްވައިފިއެވެ.
ރައީސް މުއިއްޒު، ރައީސް ވަހީދާ ބައްދަލުކުރައްވާފައިވަނީ، ކުރީގެ ރައީސް މައުމޫން އަބްދުލް ގައްޔޫމާވެސް އާދިއްތަ ދުވަހު ބައްދަލުކުރައްވާފައި ވަނިކޮށެވެ.
ރައީސް އޮފީހުގައި އޮތް މި ބައްދަލުކުރެއްވުމުގައި ރައީސް މުއިއްޒާއި ރައީސް ވަހީދު ވަނީ، ސިޔާސީ އަދި އިޖުތިމާއީ ކަންކަމާ ގުޅޭގޮތުންނާއި، ތަރައްގީގެ އެކިއެކި މަޝްރޫއުތަކާއި، ގައުމާއި ރައްޔިތުންގެ ލާބައަށް ކުރެވޭ އެހެން މަސައްކަތްތަކާ ގުޅޭގޮތުން މަޝްވަރާކުރައްވާފައެވެ.
މި ދުވަސްވަރު ރައީސް މުއިއްޒު ގެންދަވަނީ ރާއްޖޭގެ ސިޔާސީ ޕާޓީތަކުގެ ވެރިންނާއި ކުރީގެ ރައީސުންނާ ބައްދަލުކުރައްވަމުންނެވެ. އެގޮތުން މިހާތަނަށް ދަ ޑިމޮކްރެޓްސްގެ ޗެއަރޕަރސަން ހަސަން ލަތީފު، އެމްއެންޕީގެ ލީޑަރު މުހައްމަދު ނާޒިމް، އެމްޑީއޭގެ ލީޑަރު އަހުމަދު ޝިޔާމް މުހައްމަދު، އަދި ޖުމްހޫރީ ޕާޓީގެ ލީޑަރު ގާސިމް އިބްރާހީމާވެސް ރައީސް މުއިއްޒު ވަނީ ބައްދަލުކުރައްވާފައެވެ. އެހެންނަމަވެސް އެ ބައްދަލުވުންތަކުގެ ބޭނުމެއް، އަދި ދެކެވުނު ވާހަކަތަކުގެ މަޝްވަރާއެއްވެސް ސަރުކާރުންވެސް އަދި އެ ބޭފުޅުންވެސް ހާމަކުރައްވާފައެއް ނުވެއެވެ.
