ނަދީމުގެ މަރު: އިސްތިއުނާފު މަރުހަލާ ނިމެންދެން އަލީ ނިފާޒު ބަންދަށް، ދެން ތިބި މީހުން ހައިކޯޓުން ބަންދެއްނުކުރި
26 ޑިސެމްބަރު 2023 | އަންގާރަ 09:15ކަރަމް ސުހައިލާއި ހުސައިން ޝާމީން އަދި މަފާޒު، ހައިކޯޓުގެ މައްސަލަ ނިމެންދެން ބަންދު ކުރަންޖެހޭފަދަ ސަބަބެއް ނެތްކަމަށް ނިންމެވި
ނަދީމުގެ މަރުގެ މައްސަލައިގައި ތުހުމަތުވާ މީހުން
ހއ. ތަކަންދޫ އިބްރާހީމީ ހިޔާ، ނަދީމު އަބްދުއްރަހީމަށް ތޫނު އެއްޗަކުން ހަމަލާދީ މަރާލި މައްސަލައިގައި ސަލާމަތްވި މީހުން، ދައުލަތުން ހުށަހަޅާފައިވާ އިސްތިއުނާފުގެ އަޑުއެހުންތައް ނިމެންދެން ބަންދުކޮށްނުދޭން ހައިކޯޓުން ނިންމި ނިންމުމާ ގުޅޭ އަޑުއެހުމެއް، އަންގާރަ ދުވަހު ހައިކޯޓުގައި ކުރިއަށް ގެންގޮސްފިއެވެ.
މި މައްސަލައިގައި އެންމެ ފަހުން އަޑުއެހުމެއް ބާއްވާފައިވަނީ 24 ޑިސެމްބަރު 2023ގައެވެ. އެ ދުވަހުގެ އަޑުއެހުމުގައި ދައުލަތުން ވަނީ، މި މައްސަލައިގައި ތުހުމަތުވާ އެންމެންގެ ކިބައިން މުޖުތަމައަށް އޮތް ނުރައްކާ ވަކިވަކިން ކިޔައިދީފައެވެ.
އެ ކަންކަމާ ގުޅިގެން، މައްސަލައިގައި ތުހުމަތުވާ މީހުންގެ ފަރާތުންވެސް ވަނީ ވާހަކަދައްކާފައެވެ.
އަންގާރަ ދުވަހުގެ އަޑުއެހުމުގައި ހައިކޯޓުގެ ފަނޑިޔާރުން ވިދާޅުވީ، މި މައްސަލައިގައި ހިމެނޭ މުހައްމަދު ކަރަމް ސުހައިލާއި ހުސައިން ޝާމީނަށް ބަލާއިރު، އެމީހުންގެ މައްޗަށް ކުށް ސާބިތުނުވާކަމަށް ނިންމިފަހުން އެއްވެސް މައްސަލައެއްގައި އެމީހުން ހައްޔަރުކޮށްފައި ނުވާކަމަށާއި، އެމީހުން ވަޒީފާ އަދާކުރާކަމުގެ ލިޔުންވެސް ހުށަހަޅާފައިވާކަމަށެވެ.
ވުމާއެކު، ހައިކޯޓުގެ ފަނޑިޔާރުން ވިދާޅުވީ، ކަރަމް ސުހައިލާއި ހުސައިން ޝާމީން، ހައިކޯޓުގެ މައްސަލަ ނިމެންދެން ބަންދު ކުރަންޖެހޭފަދަ ސަބަބެއް އޮތްކަމަށް ދެކިވަޑައިނުގަންނަވާ ކަމަށެވެ.
މި މައްސަލައިގައި ހިމެނޭ މަފާޒަށް ބަލާއިރު، މަފާޒަކީ މި މައްސަލައިގެ ކުރިންވެސް އަދި މައްސަލަ އިސްތިއުނާފު ކުރެވިފައި ވަނިކޮށްވެސް އެކި މައްސަލަތަކުގައި ހައްޔަރު ކުރެވިފައިވާ ފަރާތެއްކަމަށާއި، ދާދި ފަހުން އޭނާ ހައްޔަރުކުރި މައްސަލަތަކުގެ ތެރެއިން 3 މައްސަލައެއްގައި، ބަންދުގެ މުއްދަތުވެސް ޖަހާފައިވާކަމަށް ދައުލަތުން ބުނެފައިވެއެވެ. އޭގެ ތެރެއިން 2 މައްސަލައެއްގައި ދައުލަތުން ދައުވާވެސް ކޮށްފައިވާކަމަށް ދައުލަތުގެ ވަކީލު ވިދާޅުވިއެވެ.
ދައުލަތުގެ ވަކީލު ވިދާޅުވީ، އޭނާގެ މައްޗަށް ކޮށްފައިވާ 2 ދައުވާގެ ތެރޭގައި، ތޫނު ހަތިޔާރު ބޭނުންކޮށްގެން މާރާމާރީ ހިންގުމުގެ ދައުވާއެއްވެސް ހިމެނޭކަމަށެވެ.
ނަދީމަކީ މަފާޒް ސީދާގޮތުން ދިން ހަމަލާއެއްގެ ސަބަބުން އަނިޔާވެ ދުނިޔެ ދޫކޮށްފައިވާ ފަރާތެއްކަން، ދައުލަތުން ހުށަހަޅާފައިވާ ހެކިންގެ ހެކިތަކުންވެސް އެނގޭކަމަށް ދައުލަތުގެ ވަކީލު ވިދާޅުވިއެވެ.
ވީއިރު، މަފާޒު ބަންދުގައި ބަހައްޓަންޖެހޭ ސަބަބުތައް ހުރިކަމަށާއި، އޭނާގެ ފަރާތުން މުުޖުތަމައަށް ފެންނަން އޮތް ނުރައްކާ ފާޅުކަން ބޮޑު ގޮތެއްގައި ފެންނަން އޮތްކަމަށް ވަކީލު ވިދާޅުވިއެވެ.
އެހެންނަމަވެސް މަފާޒް މިހާރުވެސް ހުރީ ކަރެކްޝަންސްގެ ބެލުމުގެ ދަށުގައި ބަންދުގައި ކަމަށާއި، އޭނާއަކީ މުޖުތަމައުގައި ހުރި މީހަކަށް ނުފޫޒެއް ފޯރުވުމުގެ ބާރެއް އޮތް މީހެއް ނޫންކަމަށްވެސް އޭނާގެ ވަކީލު ވިދާޅުވެފައިވެއެވެ.
މަފާޒުގެ ބައިގައި ހައިކޯޓުގެ ފަނޑިޔާރުން ނިންމެވީ، މަފާޒަކީ މިހާރުވެސް ކްރިމިނަލް ކޯޓުގައި ކުރިއަށްދާ އެހެން މައްސަލައަކާ ގުޅިގެން ޝަރީއަތް ނިމެންދެން ބަންދުކޮށްފައިވާ ފަރާތެއް ކަމަށްވާތީ، ހައިކޯޓުގެ މައްސަލަ ނިމެންދެން އޭނާ ބަންދުކުރަންޖެހޭ ފަދަ ސަބަބެއް ނެތްކަމަށެވެ. ނަމަވެސް އެ މައްސަލައިގައި މަފާޒު ދޫކޮށްލާ ހާލަތެއްގައި ދައުލަތުން އޭނާ ބަންދުކޮށްދިނުން އެދި ހުށަހެޅުމަށް ހުރަހެއް ނެތްކަން ފަނޑިޔާރުން ފާހަގަ ކުރެއްވިއެވެ.
މި މައްސަލައިގައި ދެން ހިމެނެނީ އަލީ ނިފާޒެވެ. އެގޮތުން އަލީ ނިފާޒަކީ ކުށް ސާބިތުނުވާކަމަށް ހުކުމްކުރި ފަހުންވެސް، ތަކުރާރުކޮށް ކުށުގެ ވެށީގައި އުޅެމުންދާ މީހެއްކަމަށާއި، އޭގެ ތެރޭގައި ހިމެނެނީ މަސްތުވާތަކެތީގެ މައްސަލަތަކަކާއި، ކޯޓަށް ހާޒިރުނުވުމުގެ މައްސަލަތަކެއްކަމަށް ދައުލަތުގެ ވަކީލު ވިދާޅުވިއެވެ.
އޭނާއަކީ ނަދީމަށް ހަމަލާދިނުމަށް ކެފޭ ތެރެއަށް ވަތް ދެމީހުންގެ ތެރެއިން އެކަކުކަމަށް ދައުލަތުގެ ވަކީލު ވިދާޅުވެފައިވެއެވެ.
އަދި ހަމަލާދިނުމުގައި އަލީ ނިފާޒު އަމަލީ ގޮތުން ބައިވެރިވެފައި ވާކަން ދަށުކޯޓުގައި ސިއްރު 2 ހެތްކަކު ހެކިބަސް ދީފައިވެއެވެ. ސީސީޓީވީ ފުޓޭޖުންވެސް އޭނާގެ ބައިވެރިވުން އޮތްކަން ފެންނަން ހުރެއެވެ.
އެކަންކަމަށް ރިއާޔަތްކުރައްވައި، އޭނާގެ ބައިގައި ހައިކޯޓުގެ ފަނޑިޔާރުން ވިދާޅުވީ، އޭނާގެ ހައްޔަރު ރެކޯޑަށް ބަލާއިރު، އޭނާގެ މައްޗަށް ދައުވާކުރެވުނު ކުށާ ގުޅުވާލެވޭ ކޮންމެވެސް މިންވަރެއްގެ ހެކި އެބަހުރި ކަމަށެވެ. އަދި އޭނާގެ ފަރާތުން މުޖުތަމައުގެ ސަލާމަތަށް ނުރައްކާ އޮތްކަމަށް ބުރަވެވޭ ކަމަށްވެސް ފަނޑިޔާރުން ވިދާޅުވިއެވެ.
ވުމާއެކު، މައްސަލަ ބެއްލެވި 3 ފަނޑިޔާރުންގެ އިއްތިފާގުން ނިންމަވާފައިވަނީ، ކަރަމް ސުހައިލާއި ހުސައިން ޝާމީން، އަދި މަފާޒު ހައިކޯޓުގެ މައްސަލަ ނިމެންދެން ބަންދު ކުރަންޖެހޭފަދަ ސަބަބެއް އޮތްކަމަށް ދެކިވަޑައިނުގަންނަވާ ކަމަށެވެ.
އަދި، އަލީ ނިފާޒުގެ ފަރާތުން މުޖުތަމައަށް ނުރައްކާ އޮތުމުން، އޭނާ ހައިކޯޓުގެ ޝަރީއަތް ނިމެންދެން ބަންދުގައި ބެހެއްޓުމަށްވެސް ފަނޑިޔާރުންގެ އިއްތިފާގުން ވަނީ ހުކުމްކުރައްވާފައެވެ.
