އިސްރަށްވެހިންނަށް ޚާއްސަ އިޖުތިމާއީ މަރުކަޒުތަކެއް ރާއްޖޭގެ އެކި ސަރަހައްދުތަކުގައި ގާއިމު ކުރުމަށް ނިންމައި، ކުރީގެ ކީރިތި ޤުރުއާނާއި ބެހޭ މަރުކަޒު އިސްރަށްވެހިންނަށް ޚާއްސަ އިޖުތިމާއީ މަރުކަޒަކަށް ބަދަލުކުރަން ނިންމައިފިއެވެ.
ހޯމަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ އަބްދުﷲ ނާޒިމް އިބްރާހީމް ވިދާޅުވީ، ރާއްޖޭގެ އާބަދީގެ ވަރަށް ބޮޑު ބަޔަކީ މިހާރު އިސްރަށްވެހިން ކަމަށާއި، ދައުލަތަށާ ގައުމަށް ގިނަ ދުވަހު ޚިދުމަތްތަކެއް ކުރައްވާފައި ރިޓަޔަރ ކުރައްވާފައިވާ ބޭފުޅުން ގިނަ ކަމަށެވެ. އަދި އެބޭފުޅުންގެ ނަފްސާނީ ޖިސްމާނީ ދުޅަހެޔޮ ކަމަށް އެހީތެރިކަން ހޯދައިދިނުމަކީ މިސަރުކާރުގެ ވަރަށް ބޮޑު ސިޔާސަތެއް ކަމަށް ނާޒިމް ވިދާޅުވިއެވެ.
އެގޮތުން އިސްރަށްވެހިންގެ މަރުކަޒުތަކެއް ގާއިމު ކުރުމަށް ނިންމައި، އެންމެ ފުރަތަމަ މަރުކަޒެއްގެ ގޮތުގައި ކުރީގެ ކީރިތި ޤުރުއާނާއި ބެހޭ މަރުކަޒު ހިންގެވިތަން ބަދަލު ކުރުމަށް ނިންމާފައިވާ ކަމަށް ނާޒިމް ވިދާޅުވިއެވެ. އަދި ވިދާޅުވީ ރާއްޖޭގެ އެކި ސަރަހައްދުތަކުގައި އިސްރަށްވެހިންނަށް ޚާއްސަ އިޖްތިމާއީ މަރުކަޒުތައް ގާއިމްކުރާނެ ކަމަށެވެ.
އެގޮތުން އެންމެ ފުރަތަމަ ތައްޔާރުކުރެވޭ އިސްރަށްވެހިންގެ މަރުކަޒުގެ ގޮތުގައި އެނގިވަޑައިގަންނަވާނެ ކުރީގެ ކީރިތި ޤުރުއާނާ ބެހޭ މަރުކަޒު ހިންގެވި އިމާރާތް އެންމެ ކުރީގެ ނާދީގެ ގޮތުގައި ހިންގެވިތަނެއް ކަންނޭންގެ އެއީ. އެތަން އެއީ އެންމެ ފުރަތަމަ މަރުކަޒުގެ ގޮތުގައި ހުޅުވި ރާއްޖޭގެ އެކިއެކި ކަންކޮޅުތަކުގައި މިފަދަ މަރުކަޒުތައް ގާއިމް ކުރުމަށް ރައީސުލްޖުމްހޫރިއްޔާ ވަނީ ކެމިނެޓްގެ ލަފާއާއެކު ނިންމަވާފައިޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ އަބްދުﷲ ނާޒިމް އިބްރާހީމް
ނާޒިމް ވިދާޅުވީ މިމަސައްކަތް ކުރުމަށް މިނިސްޓްރީ އޮފް ހެލްތް އާއި ޔޫތް މިނިސްޓްރީ އާއި ސްޕޯޓްސް މިނިސްޓްރީގެ އިތުރުން ކަމާއި ބެހޭ އިދާރާތްތަކުގެ ލަފާ ލިބޭނެ ކަމަށެވެ. އަދި މަސައްކަތް ފެށިގެން ދާނީ އެ މިނިސްޓްރީތަކުގެ އެހީތެރިކަމާއެކު ކަމަށް ނާޒިމް ވިދާޅުވިއެވެ.
