ވަކި ތަރުތީބަކުން ޕްރޮސަސް ކުރިއަށް ގެންދާނަމަ އެކަންވެސް އަންގައިދިނުމަށް އެދިފައިވޭ
ވިނަރެސް ފްލެޓްތައް
ވިނަރެސް ފްލެޓްތައް ލިބިފައިވާ ބައެއް މީހުންނަށް އޮފަރ ލެޓަރ ދިނުން ލަސްވާތީ ކަންބޮޑުވުން ފާޅުކުރަން ފަށައިފިއެވެ.
ރާއްޖެއެމްވީއަށް މައުލޫމާތު ދިން ބައެއް މީހުން ބުނީ ވިނަރެސް ފްލެޓް ލިބުނުކަން އަންގާފައިވާކަމަށާއި، ފްލެޓްގެ ޔުނިޓް ސެލެކްޓްކޮށްފައި ވާކަމަށެވެ. އަދި ފައިނޭންޝަލް އިވަލުއޭޝަން ފީއާއި ސްކްރީނިންގ ފީ، ނޮވެންބަރު މަހުގެ ތެރޭގައި ދައްކާފައިވާ ކަމަށެވެ. ނަމަވެސް އޭގެ ފަހުން އެއްވެސް މައުލޫމާތެއް އާބަންކޯގެ ފަރާތުން ނުލިބޭކަމަށް އޭނާ ބުންޏެވެ.
އެމީހާ ބުނިގޮތުގައި ބައެއް މީހުންނަށް ވަރަށް އަވަހަށް ހުރިހާ ޕްރޮސަސްއެއް ނިންމައިދެއެވެ. އަދި ވަކި ތަރުތީބަކުން ޕްރޮސަސް ކުރިއަށް ގެންދާނަމަ އެކަން ވެސް އަންގައިދިނުމަށް އެދިފައިވާ ކަމަށާއި، ނަމަވެސް އެކަމުގެ މައުލޫމާތު ހިއްސާކޮށްފައި ނުވާކަމަށެވެ. މީގެ އިތުރުން އެމީހާ ބުނީ، ބައެއް މީހުން މިހާރު ވިނަރެސް ފްލެޓް ކުއްޔަށްދީ ވިޔަފާރި ފަށާފައިވާކަމަށާއި، ބައެއް މީހުން އެތަނުގައި ދިރިއުޅެން ފަށާފައިވާ ކަމަށެވެ. އަދިި އާބަންކޯގެ ވެރިންނާ ގާތްގުޅުން އޮންނަ މީހުންނަށް އަވަސް ޚިދުމަތްތަކެއް ދޭކަމަށް ތުހުމަތުކޮށްފައިވެއެވެ.
މި މަސައްކަތްތަކާ ގުޅޭގޮތުން އާބަންކޯގެ މެނޭޖިންގ ޑިރެކްޓަރު އިބްރާހީމް ފަޒުލް ރަޝީދު ވިދާޅުވީ ވިނަރެސް ފްލެޓްތަކުގެ އަގަށް ގެނައި ބަދަލާއެކު، ވަރަށް ގިނަ މަސައްކަތްތައް ކުރަންޖެހޭ ކަމަށެވެ. އަލުން ހުރިހާ އެއްބަސްވުންތަކެއް ހަދަންޖެހުމުން މަސައްކަތަށް ވަގުތު ނަގާނެކަމަށާއި، އެމަސައްކަތްތައް ކުރިއަށްދާކަމަށް އޭނާ ވިދާޅުވިއެވެ.
ވިނަރެސްގެ ފްލެޓްތަކުގެ އިންޓްރެސްޓް ރޭޓް 9 އިންސައްތައިން 6 އިންސައްތައަށް ކުޑަކޮށްދިނީ ކުރީގެ ރައީސް އިބްރާހީމް މުހައްމަދު ސާލިހުގެ ސަރުކާރުގައެވެ. ރިޔާސީ އިންތިޚާބުގެ ކެމްޕޭންގެ ތެރޭގައި ވިނަރެސްގެ ޑައުންޕޭމަންޓާއި ކުލީގެ އަގު ބޮޑުވުމުގެ ކަންބޮޑުވުން، ފްލެޓް ލިބުނު ފަރާތްތަކުންވަނީ ކުރީ ރައީސާ ހިއްސާކޮށްފައެވެ. މިއާއެކު ރައީސް ސާލިހު ވަނީ ވިނަރެސް ކުލީގެ އަގަށް ހެޔޮ ބަދަލެއް ގެންނަވާނެކަމަށް ވިދާޅުވެފައެވެ. އަދި ރައީސްގެ އެ ނިންމެވުމާއެކު، އެ ބަދަލު އޭރު އާބަންކޯއިން ވަނީ ގެނެސްފައެވެ. ނަމަވެސް މި ސަރުކާރުން ބުނެފައިވަނީ ވިނަރެސް ޑައުންޕޭމަންޓަށް ދައްކާ އަދަދު 50 އިންސައްތައަށް ކުޑަކުރީ މި ސަރުކާރުން ކަމަށެވެ.
ވިނަރެސް ފްލެޓްތަކުގެ އަގު އުޅެނީ 2.52 މިލިއަން ރުފިޔާއާ 2.59 މިލިއަން ރުފިޔާއާ ދެމެދުގައެވެ. މި ފްލެޓްތަކަށް ދެ ގޮތަކަށް ފައިސާ ދެއްކޭނެ އިންތިޒާމު ވަނީ ހަމަޖައްސާފައެވެ. އެއީ އެއްފަހަރާ ފައިސާ ދައްކައިގެން ފްލެޓް ގަތުން، ނުވަތަ 20-25 އަހަރަށް ބަހާލައިގެން މަހުން މަހަށް ފައިސާ ދައްކައި ނިންމާގޮތަށެވެ.
