ކޮރަޕްޝަންގެ ތެރެއިން ވިނަރެސް ފްލެޓު ގަތް ކަމަށް ތުހުމަތުކުރެވޭ ފުލުހުންގެ މައްސަލަ ތަހުގީގު ކުރަނީ
އިތުރު ތަފްސީލެއް ހިއްސާކޮށްފައިނުވޭ
ފުލުހުން ބޭއްވި ނޫސްވެރިންގެ ބައްދަލުވުމުގެ ތެރެއިން ވާތްފަރާތުގައި ސުޕްރިންޓެންޑެންޑް އޮފް ޕޮލިސް ރަޖުނީ ޝުއައިބު
ކޮރަޕްޝަންގެ ތެރެއިން ވިނަރެސް ފްލެޓު ގަތް ކަމަށް ސޯޝަލް މީޑިއާ ގައި ތުހުމަތު ކޮށްފައިވާ ސުޕްރިންޓެންޑެންޓު އޮފް ޕޮލިސް ރަޖުނީ ޝުއައިބުގެ މައްސަލަ ތަހުގީގު ކުރަމުންދާ ކަމަށް ފުލުހުން ބުނެފިއެވެ.
ހައުސިން ޑިވެލޮޕްމަންޓް ކޯޕްރޭޝަންގެ (އެޗްޑީސީ)ގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު އިސްވެ ހުންނަވައި ވަގަށް ގޯތި ދޫކުރި ގިނަ މައްސަލަތަކެއް ވަނީ ފެންމަތިވެފައެވެ. އެޗްޑީސީން ގިނަ ކޮރަޕްޝަންގެ އަމަލުތައް ހިންގާފައިވާ ކަމަށް ގިނަ ބަޔަކު ދަނީ ތުހުމަތު ކުރަމުންނެވެ. މިތުހުމަތުތަކާއި ގުޅިގެން 18 ޑިސެންބަރު 2024 ވަނަ ދުވަހުގެ ރޭ ފުލުހުން އެޗްޑީސީއަށް ވަދެ، ޖީނާއީ ތަހުގީގެއް ފަށާފައިވާ ކަމަށް އެއިދާރާއިން ބުނެފައިވެއެވެ.
މިމައްސަލައާ ގުޅިގެން 19 ޑިސެންބަރު 2024ވީ ބުރާސްފަތި ދުވަހުގެ ރޭ ފުލުހުން ކުރިއަށް ގެންދާ ތަހުގީގާއި ގުޅިގެން މައުލޫމާތު ދިނުމަށް ނޫސްވެރިންގެ ބައްދަލުވުމެއް ބޭއްވިއެވެ. މި ނޫސްވެރިންގެ ބައްދަލުވުމުގައި އެސިސްޓެންޓް ކޮމިޝަނާ އޮފް ޕޮލިސް އަބްދުﷲ ޝަރީފް ވިދާޅުވެފައިވަނީ ތަހުގީގަށް ލިބިފައިވާ ހައުސިން މިނިސްޓްރީގެ ލިޔުންތަކާ ގުޅިގެން، ލިޔުން ލިބުނު ފަރާތްތަކާ ސުވާލު ކުރުމުން އެ ލިޔުންތަކަކީ ކުރީ ސަރުކާރުން ދީފައިވާ ލިޔުންތަކެއް ކަމަށް ބުނެފައިވާ ކަމަށެވެ. މި ނޫސްވެރިންގެ ބައްދަލުވުން ވަރަށް ބޮޑަށް ސިޔާސީ ކޮށްފައިވާ ކަމަށާއި، މިސަރުކާރު ދިފާއު ކުރުމަށް ފުލުހުން މަސައްކަތް ކޮށްފައިވާ ގިނަ ބަޔަކު ދަނީ ބުނަމުންނެވެ.
އެއާއެކު ފުލުހުންގެ ތެރޭގައި ވެސް ވިނަރެސްއިން ކޮރަޕްޝަންގެ ތެރެއިން ފްލެޓު ގަނެފައިވާ މައްސަލަތަކެއް ވަނީ ފެންމަތިވެގެން ގޮސްފައެވެ.
މިތުހުމަތުތަކާއި ގުޅިގެން ފުލުހުންގެ ތަރުޖަމާނު އަހުމަދު ޝިފާން ވިދާޅުވީ ސުޕްރިންޓެންޑެންޓު އޮފް ޕޮލިސް ރަޖުނީ ޝުއައިބު އާއި އެހެން ފުލުހުން އެ ފްލެޓު ގަތުމުގައި ގޯހުން ކަމެއް ކޮށްފައިވޭތޯ ބަލަން ފަށާފައިވާ ކަމަށެވެ. ނަމަވެސް އިތުރު ތަފްސީލެއް ހިއްސާކޮށްފައިނުވެއެވެ.
އެޗްޑީސީ ގޯތީގެ ވައްކަމުގެ މައްސަލަ ޖީނާއީ މައްސަލައެއް ގޮތުގައި ފުލުހުން ތަހުގީގު ކުރަމުންދާއިރު، އިންސާފުވެރިނުވާނެ ކަމަށް ގިނަ ބަޔަކު ދަނީ ބުނަމުންނެވެ.
ވިނަރެސް މަޝްރޫއުގައި ހިމެނޭ 13 ބުރީގެ 10 ޓަވަރުގައި ޖުމުލަ 1،344 ފްލެޓު ހިމެނެއެވެ. ވިނަރެސްއިން ފްލެޓު ދޫކުރަން ކަނޑައެޅި އެންމެންނަށް ފްލެޓު ދޫކޮށް ނިމުމަށްފަހު، ބާކީ 123 ފްލެޓެއް ހުއްޓެވެ. އަދި ފްލެޓުތައް ދޫކުރުމަށް 5 ނޮވެންބަރު 2023 ގައި ހުޅުވާލި ނަމަވެސް އޮންލައިން ޕޯޓަލްއަށް ދިމާވި މައްސަލައަކާ ގުޅިގެން އެ ފުރުސަތު ބަންދުކުރި އެވެ. އޭގެފަހުން މި ފްލެޓުތައް ދޫކޮށްފައިވަނީ ކޮރަޕްޝަންގެ ތެރެއިން ކަމަށާއި، އެޗްޑީސީގެ ބައެއް ބޭފުޅުންނަށް ބައި ލިބޭ ގޮތަށް ކަމަށް މައުލޫމާތު ލިބެއެވެ. އަދި މީގެ ތެރޭގައި ސިޔާސީ ބާރުވެރި ފަރާތްތައް ހިމެނޭ ކަމަށާއި، މުއައްސަސާތަކުގެ ވެރިން ހިމެނޭ ކަމަށް ވެސް ދަނީ ތުހުމަތުތައް ކުރެވެމުންނެވެ.
