ޖަރުމަނު ލީގުގައި ވުލްވްސްބާގާ ދެކޮޅަށް ކުޅުނު މެޗުން އެންމެ ފަހުގެ ޗެމްޕިއަން ބަޔާން މިއުނިކް މޮޅުވެއްޖެ އެވެ.

ބުދަ ދުވަހުގެ ރޭ ވުލްވްސްބާގުގެ ދަނޑުގައި ކުޅުނު މެޗު ބަޔާނުން ކާމިޔާބު ކުރީ 2-1 އިންނެވެ. މެޗުގައި އެންމެ ފުރަތަމަ ދެ ލަނޑު ޖަހައި ކުރި ހޯދީ ބަޔާނުންނެވެ. ބަޔާނުން ދެ ލަނޑު ޖެހި ފަހުން، ވުލްވްސްބާގުން ވަނީ އެ ޓީމުގެ ހަމައެކަނި ލަނޑު ޖަހައިފަ އެވެ.

މެޗުގައި ބަޔާނުން ފުރަތަމަ ލަނޑު ޖަހައި ލީޑު ނެގީ 33 ވަނަ މިނެޓުގަ އެވެ، ތޯމަސް މުލާ ތަނަވަސްކޮށްދިން ފުރުސަތެއްގައި އެ ޓީމަށް ލީޑު ނަގައިދިނީ ޖަމާލް މުސިއާލާ އެވެ. އޭގެ ދިހަ މިނެޓު ފަހުން ބަޔާންގެ ދެ ވަނަ ލަނޑު ޖެހީ އިންގްލެންޑުގެ ކެޕްޓަން ހެރީ ކޭން އެވެ. މިއީ ބަޔާނަށް ބަދަލުވެ މިހާތަނަށް ކޭން އެ ޓީމަށް ކުޅެދިން 22 ވަނަ މެޗެވެ. 22 މެޗުގައި އޭނާ ވަނީ 25 ލަނޑު ޖަހައިފަ އެވެ. ފުރަތަމަ ހާފުގައި އިތުރު ވަގުތުގައި ވުލްވްސްބާގުގެ ހަމައެކަނި ލަނޑު ޖެހީ މެކްސިމިލިއަން އާނޯލްޑް އެވެ.

މޮޅާއެކު ބަޔާން ދެ ވަނައިގައި އޮތީ މިހާތަނަށް ކުޅުނު 15 މެޗުން 28 ޕޮއިންޓު ހޯދައިގެންނެވެ. މި ސީޒަންގެ ލީގުގައި ކުޅުނު 15 މެޗުގެ ތެރެއިން އެ ޓީމު ވަނީ 12 މެޗުން މޮޅުވެފަ އެވެ. ދެ މެޗު އެއްވަރުވެފައިވާއިރު، އެއް މެޗުން ވަނީ ބަލިވެފަ އެވެ.