މީހުން ސަލާމަތް ކުރުމުގެ މަސައްކަތަށް، ރޮބޮޓް އަތަކާއެކު އައު އުންމީދެއް!

ބުރަ މަސައްކަތެއް ކުރަމުން ދާ އިރު އަދި އިތުރު އަތެއްގެ އެހީ ލިބޭނެ ނަމައޭ ހިތަށް އަރާ ހެއްޔެވެ؟ އިތުރު މީހަކު ގެނެސްގެން މަސައްކަތް އަވަހަށް ނިންމާލެވުނަސް ބޭނުން ވާ ގޮތަށް އެކަން ނިންމާލެވޭ ގޮތް ނުވެ، 2 މީހުން މޫނުކެނޑޭ ހިސާބަށްވެސް ބައެއް ފަހަރު ދާ ގޮތް ވެއެވެ. ސުވިޓްޒަލަންޑްގެ ސައެންސްވެރިން ދާދި ފަހުން ދައްކާލި އައު އީޖާދަކީ މި ދެންނެވި އަރައިރުންގަނޑުން ސަލާމަތްވުމަށް ބޭނުން ކުރެވިދާނެ އީޖާދާކަށް ވެދާނެއެވެ.

ސުވިޓްޒަލަންޑްގެ ސައެންސްވެރިންގެ ޓީމުން އީޖާދު ކުރީ ރޮބޮޓް އަތެކެވެ. މާ އާދަޔާ ޚިލާފު ވީ ކީއްވެތޯ އުފެދޭ ސުވާލުގެ ޖަވާބުވެސް ދެވޭތޯ ބަލާނަމެވެ. މި ރޮބޮޓް އަތަކީ އަހަރެމެންގެ ލޮލުގެ އިޝާރާތާއި، ނޭވާގެ ޒަރިއްޔާއިން ކޮންޓްރޯލް ކުރެވޭ ރޮބޮޓް އަތެކެވެ. ރޮބޮޓް އަތް ބޭނުން ކުރަމުން ދާ އިރު، އަހަރެމެންގެ އަމިއްލަ އަތުން އެހެން ކަންކަން ކުރާކަށް އެއްވެސް ހުރަހެއް ނޯވެއެވެ.

'ސައެންސް ރޮބޮޓިކްސް' ޖަރނަލްގައި ޝާޢިއު ކޮށްފައި ވާ ދިރާސާގައި، ސުވިސް ފެޑަރަލް އިންސްޓިޓިއުޓް އޮފް ޓެކްނޮލޮޖީ (އީޕީއެފްއެލް) ގެ ނިއުރޯއިންޖިނޭރު، ޕްރޮފެސަރ ސިލްވެސްޓްރޯ މިސޭރާ ފާހަގަކޮށްފައި ވާ ގޮތުގައި، މި ރޮބޮޓް އަތަކީ، އެކި ކަހަލަ އެކްސިޑެންޓްތަކާއި ބަލިތަކުގެ ޝިކާރައަކަށްވެ، އަތުގެ ހަރަކާތްތެރިކަން ގެއްލިފައި ވާ މީހުންގެ އިތުރުން، ދުޅަ ހެޔޮ ޞިއްޙަތުގައި ތިބި މީހުންނަށްވެސް އިތުރު ބާރެއްގެ ގޮތުގައި ބޭނުން ކުރެވިދާނެ އަތެކެވެ.

ދިރާސާ ޓީމުން ވަނީ ރޮބޮޓް އަތް ކޮންޓްރޯލް ކުރުމަށް ޚާއްޞަ ނިޒާމެއްވެސް އުފެއްދާފައެވެ. ރޮބޮޓް އަތް ބޭނުން ކުރާ މީހުން ހުންނަން ޖެހެނީ ވަރޗުއަލް ރިއާލިޓީ (ވީއާރް) ގޮގްލްސް އަޅައިގެންނެވެ. ވީއާރް ގޮގްލްސް އަޅައިގެން ހުންނައިރު، އެ މީހާއަށް 2 އަތް ފެންނާނެއެވެ. އަތުގެ ހަރަކާތްތައް ވަޒަން ކުރަނީ، ބަނޑުގައި އަޅާފައި އޮންނަ ކަމަރެއްގެ އެހީގައެވެ. އެއީ ނޭވާ އެތެރެއަށް ލާ ލުމާއި، ބޭރަށް ދޫކޮށްލާ ދޫކޮށްލުމަށް ބަލައިގެން ވަޒަން ކުރާ މިންގަނޑެކެވެ.

ވޮލަންޓިއަރުން ވަނީ ޓީމުގެ އުފެއްދުން ތަޖުރިބާކޮށްފައެވެ. ވާޗުއަލް ދުނިޔެއެއްގައި ކަނާތާއި ވާތް ކޮންޓްރޯލް ކޮށްދޭ މަސްނޫޢީ ކަށިގަނޑެއްގައި ވޮލަންޓިއަރުން ހިފައިގެން ތިބި އިރު، ވީއާރް 3 ވަނަ އަތުގެ ކޮންޓްރޯލް ކުރީ އުނަގަނޑުގައި އޮތް ކަމަރުންނެވެ.

ދިރާސާ ޓީމުން ވަނީ މޭމަތީގައި ރޮބޮޓް އަތް އައްސައިގެން، ނޭވާގެ ޒަރިއްޔާއިން ޑިވައިސް ހަރަކާތް ކުރެވޭ ގޮތްވެސް ޓެސްޓު ކޮށްފައެވެ. މި ގޮތަށް ޑިވައިސް ކޮންޓްރޯލް ކުރަނީ، އެ އަޅައިގެން ހުންނަ މީހާ ނޭވާލާއިރު، އެތެރެއަށް އަދި ބޭރަށް ވާ ގޮތަށް މޭމައްޗަށ އަންނަ ހަރަކާތުންނެވެ.

މި ދިރާސާއަކީ، ސުވިސް ނޭޝަނަލް ސައެންސް ފައުންޑޭޝަންގެ މަޝްރޫޢެކެވެ. މަޤްޞަދަކީ، އެކި ޙާދިޘާތަކާ ގުޅިގެން ކުރިއަށް ގެންދަން ސަރޗް އެންޑް ރެސްކިއު މިޝަންތަކުގައި، ހަށިގަނޑުގައި އަޅައިގެން ބޭނުން ކުރެވޭނެ ރޮބޮޓް އަތުގެ އެހީތެރިކަން ހޯދޭނެ މަގު ތަނަވަސް ކުރުމެވެ.