ސެވިއްޔާގެ ކޯޗަކަށް ކީކޭ ސަންޗޭޒް ހަމަޖައްސައިފި

ހުސްވެފައިވާ ސެވިއްޔާގެ ކޯޗުކަމުގެ މަޤާމަށް ސްޕެއިންގެ ކީކޭ ސަންޗޭޒް ހަމަޖައްސައިފިއެވެ.

ސްޕެނިޝް ލީގުގެ ސެވިއްޔާގެ ކޯޗުކަމުގެ މަގާމު ހުސްވީ އެ މަގާމުގައި ހުރި އުރުގުއޭގެ ޑިއޭގޯ އަލޮންސޯ ދާދި ފަހުން ވަކިކުރުމުންނެވެ. އެ މަގާމުން އަލޮންސޯ ވަކިކޮށްފައި ވަނީ، އޭނާގެ އިރުޝާދުގެ ދަށުން ސެވިއްޔާގެ ނަތީޖާތައް ދަށްވުމުންނެވެ. ސެވިއްޔާ އަށް އޮތީ ވެސް ރެލިގޭޝަން ޒޯންގެ ބިރު ބޮޑުވެފައެވެ. ސެވިއްޔާ އިން މިހާރު ވަނީ އެ ޓީމުގެ ކޯޗަކަށް އުމުރުން 58 އަހަރުގެ ސަންޗޭޒް ހަމަޖައްސާފައިވާކަން އިއުލާންކޮށްފައެވެ. ސެވިއްޔާގެ ކޯޗުކަމާ ސަންޗޭޒް ހަވާލުވީ ދެ އަހަރު ދުވަހުގެ އެއްބަސްވުމެއްގެ ދަށުންނެވެ. އެ ކުލަބާއެކު އޭނާ ސޮއި ކުރި އެއްބަސްވުމުގެ މުއްދަތު ހަމަވާނީ 2025 ވަނަ އަހަރުގެ ޖޫން މަހުގެ ނިޔަލަށެވެ.

ސަންޗޭޒް އެންމެ ފަހުން މަސައްކަތް ކުރީ ސްޕެނިޝް ލީގުގެ ގެޓާފޭގައެވެ. އެ ޓީމުގެ ކޯޗުކަމާ ދެ ވަނަ ފަހަރަށް އޭނާ ހަވާލުވީ 2021 ވަނަ އަހަރުއެވެ. އޭގެ ދެ އަހަރު ފަހުން، މިއަހަރުގެ އޭޕްރީލް މަހު އެ ކުލަބުން ވަނީ ސަންޗޭޒް މަގާމުން ވަކިކޮށްފައެވެ. އޭގެ ފަހުން، ސެވިއްޔާއާ ހަވާލުވުމާ ހަމައަށް ސަންޗޭޒް ހުރީ އެއްވެސް ވަޒީފާއެއްގައެއް ނޫނެވެ.

ސަންޗޭޒް އޭނާގެ ކޯޗިން ކެރިއަރު ފެށީ 2001 ވަނަ އަހަރު ސްޕެއިންގެ ރެއާލް މެޑްރިޑުގެ ޒުވާން އުމުރުފުރާގެ ޓީމުންނެވެ. އޭގެ ފަހުން އޭނާ ވަނީ ގިނަ ކުލަބުތަކެއްގައި މަސައްކަތްކޮށްފައެވެ. އޭގެ ތެރޭގައި ވެލެންސިއާ، ބެންފީކާ، އެތުލެޓިކޯ މެޑްރިޑު، އަލް އަހްލީ، އަލް އައިން، ގެޓާފޭ، ވަޓްފޯޑް، އަދި އެސްޕަންޔޯލް ފަދަ ކުލަބުތައް ހިމެނެއެވެ.