ހއ. ހޯރަފުށީ ކުލަބު ޖީއެސްގެ ފަރާތުން އިންތިޒާމުކޮށްގެން ބާއްވާ ވޮލީބޯޅަ މުބާރާތުގެ ފައިނަލްގަައި ހޯރަފުށީ ޕާމް ޓީމު އަދި ހިޔާ ޓީމު ބައްދަލުކުރަން ޖެހިއްޖެއެވެ.

މި މުބާރާތަކީ ހއ. ހޯރަފުށީ ކުލަބު ޖީއެސްގެ ފަރާތުން ބާއްވަމުން އަންނަ މުބާރާތެކެވެ. މިއަހަރުގެ މުބާރާތުގައި ޖުމުލަ ހަތަރު ޓީމަކުން ވަނީ ބައިވެރިވެފައެވެ. މުބާާރާތުގައި ބައިވެރިވި ޓީމުތަކަކީ، ކެލާ ކައުންސިލް ޓީމު، ކެލާ ޓީއޯ ސްޕޯޓްސް ކުލަބު، ހޯރަފުށީ ހިޔާ ޖަމިއްޔާ އަދި ހޯރަފުށީ ޕާމް ޓީމެވެ. މުބާރާތުގެ ކުޅުން ކުރިއަށްދަނީ ލީގު އުސޫލުންނެވެ. އެގޮތުން ކޮންމެ ޓީމެއް ކޮންމެ ޓީމަކާ ވާދަކުރުމަށްފަހު، އެއް ވަނަ ޓީމު ސީދާ ފައިނަލަށް ދަތުރުކުރިއެވެ. ފައިނަލްގެ ދެ ވަނަ ޖާގަ ލިބުނީ ދެ ވަނަ ޓީމާއި، ތިން ވަނަ ޓީމުގެ މެދުގައި ކުޅުނު ސެމީ ފަައިނަލް މެޗު މޮޅުވި ޓީމަށެވެ.

މުބާރާތުގެ އެއް ވަނަ ޓީމުގެ ގޮތުގައި ފައިނަލުން ޖާގަ ހޯދީ ހިޔާ ޓީމެވެ. ޕާމް ޓީމު ފައިނަލްގެ ފަހު ޖާގަ ހޯދީ ސެމީ ފައިނަލް މެޗު ކާމިޔާބުކޮށްގެންނެވެ. އާދީއްތަ ދުވަހުގެ ރޭ ކުޅުނު ފޯރިގަދަ ސެމީ ފައިނަލް މެޗުގައި އެ ޓީމުން ވަނީ ކެލާ ކައުންސިލްގެ މައްޗަށް، ތިން ސެޓު ދެ ސެޓުން ކުރިހޯދައިފައެވެ.

މިއަހަރުގެ މުބާރާތުގެ ޗެމްޕިއަން ޓީމަކަށް 25،000 (ފަންސަވީސް ހާސް) ރުފިޔާ ދިނުމަށް ވަނީ ހަމަޖެހިފައެވެ. ދެ ވަނަ އަށް ދާ ޓީމަކަށް 10،000 (ދިހަ ހާސް) ރުފިޔާ ލިބޭނެއެވެ. މުބާރާތުގައި ރާއްޖެ އިން ބޭރުގެ މަޝްހޫރު ކުޅުންތެރިން ވެސް ކުޅެއެވެ. އެގޮތުން ސްރީލަންކާ އަދި ޕާކިސްތާނުގެ ޤައުމީ ޓީމުގެ ކުޅުންތެރިން އަންނަނީ އެކި ޓީމުތަކަށް ކުޅެމުންނެވެ. މިއީ ކުލަބު ޖީއެސްގެ ފަރާތުން ހޯރަފުށީގައި ވޮލީގެ ރޫހު އާލާ ކުރުމުގެ މަގުސަދުގައި ބާއްވަމުން އަންނަ މުބާރާތެކެވެ.