ސްލޯ ނޫންކަމަށް ދައުވާ ކުރާ ސަރުކާރު: މަހެއް ވެގެންދިޔައިރު ވުޒާރާތަކުގެ މަސައްކަތް ފާސްކުރަން މަޖިލީހަށް ފޮނުވުނީ އަދިކިރިޔާ

މަސައްކަތުގެ ސްޕީޑް އަވަސްވެފައި ކުރީ ސަރުކާރާއި ތަފާތުވާނެކަމަށް ބުނެ ވެރިކަމަށް އައި ސަރުކާރުގެ ވުޒާރާތަކާއި، އެ ވުޒާރާތަކުގެ މަސައްކަތު ދާއިރާތައް ރައްޔިތުންގެ މަޖިލީހުން ފާސްކުރެއްވުމަށްޓަކައި، މަސް ދުވަސްފަހުން މަޖިލީހަށް ފޮނުވައިފިއެވެ.

ރައީސް އޮފީހުން ބުނެފައިވަނީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 116 ވަނަ މާއްދާގެ (ހ) އިން ރައީސުލްޖުމްހޫރިއްޔާއަށް ލިބިދޭ އިޚްތިޔާރުގެ ދަށުން، 2023 ނޮވެންބަރު 17 ގައި އުފައްދާފައިވާ ވުޒާރާތަކާއި، އެ ވުޒާރާތަކުގެ މަސައްކަތު ދާއިރާތައް ރައްޔިތުންގެ މަޖިލީހުން ފާސްކުރެއްވުމަށްޓަކައި މިއަދު އެ މަޖިލީހަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ހުށަހަޅުއްވާފައިވާ ކަމަށެވެ.

Advertisement

ސަރުކާރުގެ އައު ވުޒާރާތަކާއި، އެ ވުޒާރާތަކުގެ މަސައްކަތްތައް ފާސްކުރުމަށް މަޖިލީހަށް ފޮނުވާފައި މިވަނީ ސަރުކާރަށް މަހެއްވި ފަހުންނެވެ. ސަރުކާރަށް މަހެއްވެގެން ދިޔައިރު ވުޒާރާތަކުގެ މަސައްކަތްތައް ފާސްކުރުމަށް މަޖިލީހަށް ނުފޮނުވާ ރައީސް ހިމެނޭހެން ސަރުކާރުގެ މުހިންމު މިނިސްޓްރީތަކުގެ ވެރިން ގެންދިޔައީ ރާއްޖެއިން ބޭރަށް ދަތުރުތައް ކުރައްވަމުންނެވެ. އެގޮތުން ތުރުކީއަށް ކުރި ރައީސްގެ ދެކަނބަލުން ކުރެއްވި ދަތުރުފުޅުގައި އެގައުމުގައި މަޝްހޫރު ފިލްމީތަރިންނާއި ބައްދަލުކުރައްވާފައިވެއެވެ.

މަޖިލީހުގެ ޖަލްސާގައި ވަޒީރުންނަށް ރުހުންދޭން އެޖެންޑާ ކުރި ނަމަވެސް މެންޑޭޓު ފާސްނުކުރާތީ ރުހުންދިނުމުގެ މައްސަލަ ވަނީ ފަސްކޮށްފައެވެ. މަޖިލީހުގެ މި ދައުރު ހޯމަ ދުވަހަށް ނިންމުމަށް މަޖިލީހުން މަސައްކަތް ކުރި ނަމަވެސް، ސަރުކާރު ސްލޯވެގެން ވަޒީރުންނަށް ރުހުންދިނުމާއި، ވުޒާރާތަކުގެ މެންޑޭޓްތައް ފާސްކުރަން ނުފޮނުވާ ދިގުލައިގެން ދިޔައެވެ.

އަދި ވުޒާރާތުގެ މެންޑޭޓް ފާސްކުރަން މަޖިލީހަށް ނުފޮނުވާ ވަޒީރުންނަށް ރުހުން ހޯދުމަށް ހޯމަ ދުވަހުގެ މެންދުރު ފޮނުވާފައިވާއިރު، ހޯމަ ދުވަހު ޖަލްސާއަށް ވަޒީރުންނަށް ރުހުން ދިނުމަށް ނިންމައި ތަޅުމަށް ފޮނުވި ވަޒީރުންނަށް ރުހުންދިނުމުގެ މައްސަލައިގެ ކޮމިޓީ ރިޕޯޓް ކޮމިޓީން ފާސްކޮށްފައި އޮތީ ގަވާއިދާ އެއްގޮތަށް ނޫން ކަމަށް ތުޅާދޫ ދާއިރާގެ މެންބަރު ހިސާން ހުސައިން ވަނީ ފާހަގަކޮށްފައެވެ.

އަދި މިކަމާއި ގުޅިގެން މަޖިލީހުގެ މެޖޯރިޓީ އަދި މައިނޯރިޓީ ލީޑަރާއި މަޝްވަރާކުރުމަށްފަހު ރިޔާސަތުން ވަނީ ކޮމިޓި ރިޕޯޓް އަނބުރާ ކޮމިޓިއަށް ފޮނުވަން ނިންމާފައެވެ.

ގާނޫނު އަސާސީގެ 116 ވަނަ މާއްދާގެ (ހ) ގައި ބުނެފައިވަނީ ސަރުކާރުން އުފައްދަން ބޭނުންވާ އެންމެހާ ވުޒާރާތަކާއި އެ ވުޒާރާތަކުގެ މަސައްކަތުގެ ދާއިރާތައް ކަނޑައެޅުމުގެ އިހްތިޔާރު ރައީސުލްޖުމްހޫރިއްޔާއަށް ލިބިގެންދާ ކަމަށެވެ. އަދި ސަރުކާރުން އުފައްދާ ވުޒާރާތަކާއި އެ ވުޒާރާތަކުގެ މަސައްކަތުގެ ދާއިރާތައް ރައްޔިތުންގެ މަޖިލީހުން ފާސްކުރުމަށް ރައީސުލްޖުމްހޫރިއްތާ އެ މަޖިލީހަށް ހުށަހަޅަންވާނެ ކަމަށެވެ.

އަދި (ހ) ގައި ބަޔާންކޮށްފައިވާ ގޮތުގެ މަތިން ސަރުކާރުން އުފައްދާ ވުޒާރާތަކާއި އެ ވުޒާރާތަކުގެ މަސައްކަތުގެ ދާއިރާތައް ކަނޑައަޅާފައިވާ ގޮތާމެދު ރައްޔިތުންގެ މަޖިލީހަށް ފެންނަ ހިޔާލާއި މަޝްވަރާ ރައީސުލްޖުމްހޫރިއްޔާއަށް ދެވިދާނެކަމަށް ވަނީ ބުނެފައެވެ.