މިސީޒަންގައި ތަފާތު ނަތީޖާތަކެއް ނެރެމުން އަންނަ އެސްޓަން ވިލާ މޮޅުވެ, ލީގު ޗެމްޕިއަންކަމާ ދިމާއަށް މިސްރާބު ޖަހައިފިއެވެ.

ބްރެންޓްފޯޑް އަތުން ހޯދި މޮޅާއެކު ވިލާ ވަނީ އެއްވަނާގައި އޮތް އާސެނަލްއާ ޕޮއިންޓަކަށް ކައިރި ކޮށްފައެވެ. ބްރެންޓްފޯޑްގެ ދަނޑުގައި އެޓީމް އަތުން މޮޅުވީ 2-1 ނެވެ. މެޗުގެ ފުރަތަމަ ހާފްގެ ފަހު މިނެޓުގައި ފުރަތަމަ ލަނޑު ޖަހާ ކުރިހޯދީ ބްރެންޓްފޯޑުން ނެވެ. އެޓީމަށް ކުރިހޯދައިދިނީ ލެވިސް ޕޮޓާ އެވެ. ވިލާއިން ދެވަނަ ހާފްގައި ނަތީޖާ ހަމަހަމަކުރީ ބްރެންޓްފޯޑުން ކުޅުންތެރިއަކު މަދުވި ފަހުންނެވެ. އެއީ 71 ވަނަ މިނެޓުގައި ބެން މީ އަށް ސީދާ ރަތްކާޑެއް ދެއްކުމުނެވެ. އޭނާގެ ފައުލަށް ފުރަތަމަ ރީނދޫ ކާޑެއް ދެއްކި ނަމަވެސް ވީއޭއާރުން ބެލުމަށްފަހު ނިންމުން ބަދަލުކުރީއެވެ. ވިލާއިން ނަތީޖާ ހަމަހަމަކުރީ 77 ވަނަ މިނެޓުގައި މޮރޭނޯ ޖެހި ލަނޑުންނެވެ. މެޗުން ވިލާ މޮޅުކޮށްދިނީ 85 ވަނަ މިނެޓުގައި ވަޓްކިންސް އެވެ. މެޗުގެ އިތުރު ވަގުތުގައި ކަމާރާ އަށް ރަތްކާޑް ދެއްކުމުން ވިލާ ވެސް މެޗު ނިންމާލަން ޖެހުނީ ކުޅުންތެރިއަކު މަދުކޮށެވެ.

މޮޅާއެކު އެސްޓަން ވިލާ ވަނީ 17 މެޗުން 38 ޕޮއިންޓް ހޯދާފައެވެ. އެއްވަނާގައި އާސެނަލް އޮތީ 39 ޕޮއިންޓާއެކުއެވެ. ދެވަނާގައި އޮތް ލިވަޕޫލާ ވިލާއާ ޕޮއިންޓްގެ ގޮތުން ހަމަހަމަ އެވެ. ހަތަރު ވަނާގައި ސިޓީގެ މައްޗަށް ވިލާ އިން ވަނީ ހަތަރު ޕޮއިންޓްގެ ލީޑެއް ހޯދާފައެވެ.