ވެލެންސިއާ ކައިރިން ވެސް ބާސެލޯނާ އެއްވަރު

ސްޕެނިޝް ލީގުގައި ވެލެންސިއާއާ ދެކޮޅަށް ކުޅުނު މެޗުން ވެސް އެންމެ ފަހުގެ ޗެމްޕިއަން ބާސެލޯނާ އެއްވަރުވެއްޖެއެވެ.

ހޮނިހިރު ދުވަހުގެރޭ ވެލެންސިއާގެ ދަނޑުގައި ކުޅުނު މެޗު އެއްވަރުވީ 1-1 އިންނެވެ. ލީގުގައި އެންމެ ފަހުން ޖިރޯނާއާ ދެކޮޅަށް ކުޅުނު މެޗުން ވެސް ބާސެލޯނާ ވަނީ ބަލިވެފައެވެ. އޭގެ ފަހުން ޔުއެފާ ޗެމްޕިއަންސް ލީގުގެ ގުރޫޕް ސްޓޭޖުގެ ފަހު މެޗުގައި ވެސް އެ ޓީމު ވަނީ ބަލިވެފައެވެ.

މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ބާސެލޯނާ އިންނެވެ. ދެ ވަނަ ހާފު ފަށައިގެން ދިހަ ވަނަ މިނެޓުގައި އެ ޓީމަށް ލީޑު ނަގައިދިނީ ޕޯޗުގަލްގެ ޔާއޯ ފެލިކްސްއެވެ. ލޯނު އެއްބަސްވުމެއްގެ ދަށުން ބާސެލޯނާ އަށް ކުޅެމުން އަންނަ ފެލިކްސް އަންނަނީ މޮޅަށް ކުޅެމުންނެވެ. އޭނާ ލަނޑު ޖެހުމަށް ފުރުސަތު ތަނަވަސްކޮށްދިނީ ރަފީނިއާއެވެ. ބާސެލޯނާ އިން ލަނޑު ޖެހިތާ، ދިހަ މިނެޓު ފަހުން ވެލެންސިއާ އިން ވަނީ ލަނޑު ޖަހައި ނަތީޖާ ހަމަހަމަ ކޮށްފައެވެ. ޑިއެގޯ ލޮޕޭޒް ނޮހެރޯލް ތަނަވަސްކޮށްދިން ފުރުސަތެއްގައި އެ ޓީމަށް ނަތީޖާ ހަމަހަމަ ކޮށްދިނީ ހޫގޯ ގިލަމޮންއެވެ.

މި ނަތީޖާ އާއެކު ބާސެލޯނާ އޮތީ ތިން ވަނައިގައެވެ. އެއީ މިހާާތަނަށް ލީގުގައި ކުޅުނު 17 މެޗުން 35 ޕޮއިންޓު ހޯދައިގެންނެވެ. އެ ޓީމަށް ވުރެ އެއް މެޗު މަދުން ކުޅެގެން ދެ ވަނައިގައި ވާދަވެރި ރެއާލް މެޑްރިޑަށް ލިބެނީ 39 ޕޮއިންޓެވެ.