ސްޕެއިންގެ ރެއާލް މެޑްރިޑާއެކު ހަދާފައިވާ އެއްބަސްވުން އައުކޮށްފާނެކަމުގެ އިޝާރާތެއް އެ ކުލަބުގެ ކޯޗު، ކާލޯ އަންޗެލޮޓީ ދީފިއެވެ.

އުމުރުން 64 އަހަރުގެ އަންޗެލޮޓީ ރެއާލާއެކު ހަދާފައިވާ އެއްބަސްވުމުގެ މުއްދަތު ހަމަވާނީ އަންނަ އަހަރުގެ ޖޫން މަހުގެ ނިޔަލަށެވެ. އެއްބަސްވުން އައުކޮށް، އިތުރު މުއްދަތަކަށް އޭނާ ކުލަބުގައި ބަހައްޓަން ރެއާލުން ބޭނުންވެއެވެ. ނަމަވެސް، އެކަމުގައި މިހާތަނަށް އަންޗެލޮޓީ ވަކި ގޮތެއް ނިންމައިފެއް ނުވެއެވެ. ރެއާލްގެ އެއްބަސްވުމުގެ މުއްދަތު ހަމަވުމުން، އެ ކުލަބު ދޫކޮށް، ބްރެޒިލްގެ ޤައުމީ ޓީމާ އަންޗެލޮތީ ހަވާލުވާން އުޅޭ ކަމުގެ އަޑުތަކެއް ވެސް ވަނީ ފެތުރިފައެވެ. އެ ވާހަކަތައް އަންޗެލޮޓީ ދޮގު ކޮށްފައެއް ނުވެއެވެ. އޭގެ ބަދަލުގައި އޭނާ ދެމުން އައީ ފިނި ޖަވާބެކެވެ.

ރެއާލްގެ ކުރިމަގާ ގުޅޭ ގޮތުން ވާހަކަ ދައްކަމުން އަންޗެލޮޓީ ބުނީ، އެއްބަސްވުމުގެ މުއްދަތު ހަމަވާނީ އަންނަ އަހަރުގެ ޖޫން މަހުގެ ނިޔަލަށް ކަމަށެވެ. އެހެންކަމުން، އައު އެއްބަސްވުމަކާމެދު ވިސްނަން ޖެހޭނީ އޭގެ ފަހުން ކަމަށް ވެސް އޭނާ ވަނީ ބުނެފައެވެ. އިތުރަށް އަންޗެލޮޓީ ބުނީ، އޭނާ ކުލަބުގައި ހުންނަން ރެއާލުން އުފާވާނަމަ، އެކަމާ އޭނާ ވެސް އުފާވާނެ ކަމަށެވެ. ބައެއް މީޑިއާތަކުގައި ބުނެފައިވާ ގޮތުން، ރެއާލްގެ އެއްބަސްވުން އަންޗެލޮޓީ އައު ކުރުމުގެ ފުރުސަތު އެބައޮތެވެ.

ދެ ވަނަ ފަހަރަށް އަންޗެލޮޓީ ރެއާލާ ގުޅުނީ 2021 ވަނަ އަހަރެވެ. އޭނާގެ އިރުޝާދުގެ ދަށުން ރެއާލް ވަނީ 139 މެޗު ކުޅެފައެވެ. އޭގެ ތެރެއިން އެ ޓީމު ވަނީ 97 މެޗުން މޮޅުވެފައެވެ. 22 މެޗުން ބަލިވެފައިވާއިރު، 20 މެޗު ވަނީ އެއްވަރުވެފައެވެ. ދެ ވަނަ ފަހަރަށް ރެއާލާ ހަވާލުވެ އޭނާ ވަނީ އެ ކުލަބާއެކު ހަ ތައްޓެއް ކާމިޔާބުކޮށްފައެވެ.