އިޓާލިއަން ލީގުގައި ޖެނޯއާ ދެކޮޅަށް ކުޅުނު މެޗުން ޔުވެންޓަސް އެއްވަރުވެއްޖެ އެވެ.

ލީގުގައި ހޮނިހިރު ދުވަހު ޖެނޯގެ ދަނޑުގައި ކުޅުނު މެޗު ނިމުނީ ދެ ޓީމު 1-1 އިން އެއްވަރުވެގެންނެވެ. މެޗުން މޮޅުވެ، އެއް ވަނަ އަށް ޖެހިލުމުގެ ފުރުސަތު ޔުވެންޓަސް އަށް އޮތެވެ. ނަމަވެސް މެޗު އެއްވަރުވުމުން، އެ ޓީމު އޮތީ ދެ ވަނައިގަ އެވެ.

މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ޔުވެންޓަސް އިންނެވެ. މެޗުގެ 28 ވަނަ މިނެޓުގައި އެ ޓީމަށް ލީޑު ނަގައިދިނީ ފެޑެރިކޯ ޗިއެސާ އެވެ. އެއީ ޔުވެންޓަސް އަށް ލިބުނު ޕެނަލްޓީއެއް ކާމިޔާބުކޮށްގެން ޗިއެސާ ޖެހި ލަނޑެކެވެ. ޖެނޯ އިން މެޗުގެ ނަތީޖާ ހަމަހަމަ ކުރީ ދެ ވަނަ ހާފުގަ އެވެ. ދެ ވަނަ ހާފު ފަށައިގެން ތިން ވަނަ މިނެޓުގައި އެ ޓީމަށް ނަތީޖާ ހަމަހަމަ ކޮށްދިނީ އަލްބާޓް ގުޑްމުންޑްސަން އެވެ. އޭނާ އެ ލަނޑު ޖެހީ ކަލެބް އެކުބަން ތަނަވަސްކޮށްދިން ފުރުސަތެއްގަ އެވެ.

މިއީ މި ސީޒަންގެ އިޓާލިއަން ލީގުގައި ޔުވެންޓަސް އަށް އެއްވަރުވެގެން ނިންމާލަން ޖެހުނު ހަތަރު ވަނަ މެޗެވެ. މިހާތަނަށް ކުޅުނު 16 މެޗުން އެ ޓީމު ވަނީ 11 މެޗުން މޮޅުވެފަ އެވެ. ލީގުގައި މިހާތަނަށް ބަލިވެފައި ވަނީ އެންމެ މެޗަކުންނެވެ. ދެ ވަނައިގައި ޔުވެންޓަސް އޮތީ 37 ޕޮއިންޓާއެކު އެވެ. އެ ޓީމަށް ވުރެ އެއް މެޗު މަދުން ކުޅެގެން އެއް ވަނައިގައިއޮތް އިންޓަ މިލާނަށް ލިބެނީ 38 ޕޮއިންޓެވެ.