މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން ދިވެހި ސަރުކާރުގެ ގެޒެޓުގައި ޝާއިއުކޮށްފައިވާ އިއުލާނަކަށް ގިނަ ބައެއްގެ ފާޑުކިޔުންތައް އަމާޒުވާން ފަށައިފިއެވެ.
ފާޑުކިޔުން އަމާޒުވަމުން ދަނީ 06 ސެޕްޓެމްބަރ 2023 އިން ފެށިގެން 16 ނޮވެމްބަރ 2023 ގެ ނިޔަލަށް ޕާކިންގ ވަޔަލޭޝަންގެ ގޮތުގައި ކޮށްފައިވާ ހުރިހާ ޖޫރިމަނާތަކެއް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މާފުކޮށް ދެއްވާފަައިވާކަން ހާމަކޮށް ކުރި އިއުލާނަށެވެ.
ބުރާސްފަތި ދުވަހު ނެރުނު އެ އިއުލާނުގެ ސުރުޙީއެއްގެ ގޮތުގައި ލިޔެފައިވަނީ "ޕާކުކުރާނެ ތަނެއް ނުދައްކައި ސްޓިކާ ނުޖަހާނެކަމަށް ނިމިދިޔަ ސަރުކާރުން ވެފައިވާ ވަޢުދާ ޚިލާފަށް ކުރި ހުރިހާ ޕާކިން ޖޫރިމަނާތަކެއް މާފުކުރުން" އެވެ.
އެ އިއުލާނު ޓްރާންސްޕޯޓް މިނިސްޓްރީގެ ރަސްމީ ޓްވިޓަރ އެކައުންޓުންވެސް ހަމަ އެ ސުރުޙީގެ ދަށުން ލިޔެފައިވާއިރު، އެކަމަށް ފާޑުކިޔާ ފަރާތްތަކުން ދަނީ މިއީ ސިޔާސީ ޕާޓީއެއްގެ އިއުލާނެއްތޯ ސުވާލު ކުރަމުންނެވެ. އެގޮތުން ދައުލަތުގެ އިދާރާއެއްގެ ރަސްމީ ޓުވިޓަރ އެކައުންޓުން ކުރީ ސަރުކާރާއި ގުޅުވައިގެން އެގޮތަށް ޓްވީޓު ކުރުމަކީ ނާތަހުޒީބު ކަމެއް ކަމަށާއި، އަމިއްލަ ޒާތީ ހަސަދަވެރިކަން ފިލުވަންވާނީ އަމިއްލަ ޓުވިޓަރ އެކައުންޓުންކަމަށް ބުނެ ބައެއް ފަރާތްތަކުން ވަނީ ޝުއޫރު ފާޅުކޮށްފައެވެ.
ބައެއް ފަރާތްތަކުން ވަނީ ސަރުކާރުގެ ގެޒެޓާއި، ރަސްމީ ޓްވިޓަރ އެކައުންޓުތައް ސިޔާސީ ކުރުމަކީ އެންމެ ތަހުޒީބު ގޮތްތޯވެސް ސުވާލުކޮށްފައެވެ.
