2024 ގައި އެމްޑީޕީގެ ޓިކެޓުގައި މަޖިލީހަށް ވާދަކުރަން ބޭނުންވާ ފަރާތްތަކަށް ފުރުސަތު ހުޅުވާލައިފި
2023 ޑިސެމްބަރ 25 ވާ ހޯމަ ދުވަހުގެ ހަވީރު 04:00 އާ ހަމައަށް ވަނީ ހުޅުވާލާފައި
އެމްޑީޕީން ބޭއްވި ނޫސްވެރިންގެ ބައްދަލުވުމުގެ ތެރެއިން
2024 ވަނަ އަހަރު ބޭއްވުމަށް ހަމަޖެހިފައިވާ 20 ވަނަ ރައްޔިތުންގެ މަޖިލިސް އިންތިޚާބުގައި އެމްޑީޕީގެ ޓިކެޓްގައި ވާދަކުރަން ބޭނުންވާ އެމް.ޑީ.ޕީގެ މެމްބަރުންނަށް ފުރުސަތު ހުޅުވާލައިފިއެވެ.
މި ފުރުސަތު ހުޅުވާލާފައިވަނީ 16 ޑިސެމްބަރު 2023 ވާ ހޮނިހިރު ދުވަހުން ފެށިގެން 2023 ޑިސެމްބަރ 25 ވާ ހޯމަ ދުވަހުގެ ހަވީރު 04:00 އާ ހަމައަށެވެ.
އެކަމާ ގުޅޭގޮތުން ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމެއްގައި އެމްޑީޕީގެ ޑެޕިއުޓީ ޗެއާޕާސަން އިބްރާހިމް ވަހީދު (އިބުރޭ) ވިދާޅުވީ، ޖެނުއަރީ 26 އަދި 27 ގައި ޕްރައިމަރީ ބާއްވަންޖެހޭ ދާއިރާތަކުގެ ޕްރައިމަރީ ބާއްވަވާނެކަމަށެވެ. އެގޮތުން ޕްރައިމަރީގައި ވާދަކުރެވޭނީ މުއްދަތުގެ ތެރޭގައި ޝައުޤުވެރިކަން ފާޅުކޮށްފައިވާ ފަރާތްތަކަށް އެކަނިކަމަށްވެސް އޭނާ ވިދާޅުވިއެވެ.
އެމްޑީޕީން ވަނީ އެމްޑީޕީ ޓިކެޓުގައި ވާދަކުރަން ޝައުޤުވެރިވާ މީހުންގެ ޝަރުތުތައްވެސް އާންމުކޮށްފައެވެ. އޭގެ ތެރޭގައި އެމް.ޑީ.ޕީގެ މެމްބަރެއް ކަމުގައިވުމާއި، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 73 ވަނަ މާއްދާ އާއި ރައްޔިތުންގެ މަޖިލީހުގެ އިންތިޚާބުގެ ޤާނޫނުގެ 8 ވަނަ މާއްދާގައިވާ ގޮތުގެމަތިން ރައްޔިތުންގެ މަޖިލީހުގެ އިންތިޚާބަށް ކުރިމަތިލާ މީހެއްގައި ހުންނަންޖެހޭކަމަށް ބަޔާންކުރާ އެންމެހާ ޝަރުޠުތައް ހަމަވާ މީހެއްކަމުގައިވުން ހިމެނެއެވެ.
އެމްޑީޕީން ވަނީ ވާދަކުރުމަށް އެދޭ ފަރާތްތަކުން މިފަހަރު ފޯމާއެކު ކުށުގެ ރެކޯޑުތައްވެސް ހުށައެޅުމަށް އެދިފައެވެ.
އެމްޑީޕީން ވަނީ އެ ޕާޓީގެ ފަރާތުން ކުރިމަތިލުމަށް ޝައުޤުވެރިވާ ފަރާތްތަކުން، ގޫގުލްފޯމްމެދުވެރިކޮށް ޝައުޤުވެރިކަންފާޅު ކުރުމަށް އެދިފައެވެ. އަދި ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަންގެ ކުށާއި ދަރަނީގެ ރިކޯޑު ސާފުކުރާފޯމްއެއިދާރާއިން ސާފުކޮށް ފުރިހަމަކޮށް، ޝައުޤުވެރިކަންފާޅުކުރާ ފޯމާއި އެކު ހުށައެޅުމަށް ޕާޓީންވެސް ވަނީ އެދިފައެވެ.
އިބުރޭ އިތުރަށް ވިދާޅުވީ، ޕާޓީއަށް ކޮށްދީފައިވާ ޚިދުމަތްތަކާއި، ޕާޓީގައި އުޅެފައިވާ މުއްދަތާއި، ޕާޓީގެ ޤަވާއިދުގައި ބުނެފައިވާ ޝަރުތުތަކަށްވެސް ބަލާނެކަމަށެވެ. އެގޮތުން ބަލާއިރު، އެމްޑީޕީގެ ރިޔާސީ ކެންޑިޑޭޓުންނާ ދެކޮޅަށް ނުވަތަ ޕާޓީގެ ރޫޙާ ޚިލާފަށް މަސައްކަތް ކޮށްފައިވާ ފަރާތްތަކެއްނަމަ، އެކަން ބެލުމަށް އަމިއްލައަށްވެސް ހުށައަޅުއްވާނެކަމަށް އިބުރޭ ވިދާޅުވިއެވެ.
އެއީ ޕާޓީގެ ޓިކެޓު ލިބުމުގެ ޝަރުތު އުނިވާނެ ސަބަބެއްކަންވެސް އޭނާ ފާހަގަ ކުރެއްވިއެވެ.
