ހަމާސްގެ އަތްދަށުގައި ތިބި އަސީރުންގެ ތެރެއިން ތިން މީހަކު އިސްރާއީލަށް އޮޅިގެން މަރާލެވިފައިވާކަމަށް އިސްރާއީލު އަސްކަރިއްޔާއިން ބުނެފިއެވެ.
އިސްރާއީލު އަސްކަރިއްޔާއިން ބުނީ އެތިން މީހުން މަރާލެވުނީ ފަލަސްތީނުގެ ހަނގުރާމަވެރި ޖަމާއަތްތަކާއެކު ކުރިޔަށްދިޔަ ހަމަލާ ބަދަލުކުރުންތަކުގައި އެއީ ފަލަސްތީނުގެ ހަނގުރާމަވެރިން ކަމަށް ހީކޮށެވެ. އިސްރާއީލު އަސްކަރިއްޔާއިން ބުނީ ތިން މީހުންގެ އާއިލާތަކަށް ތައުޒިޔާ ފޮނުވާކަމަށާއި ހާދިސާ ހިނގި ގޮތުގެ ދެފުށް ފެންނަ ތަހުގީގެއް ކުރިޔަށްގެންދާނެކަމަށެވެ.
މިތިން މީހުންނަކީ ކޮން ބައެއްކަން ދެނެގަނެވިފައިވާކަމަށާއި އެއީ އުމުރުން 28 އަހަރު، 25 އަހަރު އަދި 26 އަހަރުގެ ތިން ފިރިހެނުންކަމަށް އިސްރާއީލު އަސްކަރިއްޔާއިން ބުނެއެވެ.
ހަމާސްއިން ވަނީ އަސީރުންގެ ގޮތުގައި 250 މީހުން ގެންގޮސްފައެވެ. އޭގެތެރެއިން 110 އަސީރުން ވަނީ މިނިވަންކޮށްފައެވެ.
އިސްރާއީލަށް އޮޅިގެން ތިން އަސީރުން މަރާލެވުމާއި ގުޅިގެން ތެލްއަވީވްގައި އަންނަނީ މުޒާހަރާކުރަމުންނެވެ. އެމީހުން ގޮވާލަމުންދަނީ އަސީރުން ބަދަލުކުރުމާއި ގުޅޭ އެއްބަސްވުމެއް ވީ އެންމެ އަވަހަށް ހަމާސް އާއެކު ހެދުމަށެވެ.
