ޣައްޒާގެ ދެކުނުގެ ޚާން ޔޫނިސްގެ ސްކޫލަކަށް އިސްރާއީލުން ދިން ހަމަލާ ކަވަރު ކުރަމުންދަނިކޮށް އިސްރާއީލުން ދިން ހަމަލާގައި ޒަޚަމްވި އަލްޖަޒީރާގެ ކެމެރާމަން ސާމިރް އަބޫދައްޤާ އަށް ލިބުނު އަނިޔާތަކާއި ގުޅިގެން އޭނާ ޝަހީދުވެއްޖެއެވެ.
އިސްރާއީލުން ހަމަލާދީފައިވަނީ ކެމެރާމަން އަބޫދައްޤާ އާއި އަލްޖަޒީރާގެ އަރަބިކްގެ ޣައްޒާގެ ބިއުރޯ ޗީފް ވާއެލް ދަހުދޫ އަށެވެ. އިސްރާއީލުން ޚާންޔޫނުސްގެ ފަރްހާނާ ސްކޫލަށް ދިން ހަމަލާ ކަވަރުކުރަށް އެސްކޫލަށް ވަތް އަލްޖަޒީރާ ކްރޫ އާއި ރެސްކިޔުޓީމަށް އިސްރާއީލުން ވަނީ ހަމަލާދީފައެވެ. މިހަމަލާގައި ވާއެލް އަށް ވަނީ އެކިވަރުގެ އަނިޔާތައްވެފައެވެ.
އިސްރާއީލުން އެސަރަހައްދަށް ވަރުގަދަ ހަމަލާތައް ދެމުންދިޔުމުގެ ސަބަބުން ރެސްކިޔުޓީމަށް ވަނީ ކެމެރާމަން އަބޫދައްޤާ އާ ހަމައަށް ނުދެވިފައެވެ. އެހެންކަމުން އޭނާ އަށް ސިއްހީ ފަރުވާ ދިނުމަށް ހޮސްޕިޓަލަކަށް ގެންދެވޭނެ ގޮތެއް ނުވިއެވެ. ސާމިރް އަބޫދައްޤާ އަށް ލިބުނު އަނިޔާތަކަށް ފަރުވާ ނުލިބި ޝަހީދުވުމާއި ގުޅިގެން އަލްޖަޒީރާއިން ނެރުނު ބަޔާނެއްގައި ބުނެފައިވަނީ އެސަަރަހައްދަށް އެމްބިޔުލަންސަށްވެސް އަދި އެހެން މީހަކަށްވެސް ނުވަދެވޭ ގޮތަށް އިސްރާއީލުން ހުރަސްއަޅާފައިވާކަމަށެވެ.
އަދި އަބޫދައްޤާ ޝަހީދުވީ ފަސް ގަޑިއިރަށް ވުރެ ގިނައިރު ވަންދެން ލިބުނު ޒަޚަމްތަކަށް ފަރުވާއެއް ނުދެވި ލޭމަނާނުވެ އެހެން އޮވެކަމަށް ވަނީ ބުނެފައެވެ.
ވާއެލްއަށް ލިބުނު އަނިޔާތަކަށް ނާސިރު ހޮސްޕިޓަލުން ވަނީ ފަރުވާދީފައެވެ. ވާއެލްގެ އާއިލާ ދިރިއުޅެމުންދިޔަ ގެއަށް އަމާޒުކޮށް އިސްރާއީލުން ވަނީ އޮކްޓޯބަރ މަހުގެ ފަހުކޮޅު ހަމަލާދީފައެވެ. އެހަމަލާގައި ވައެލްގެ އަންހެނުންނާއި، 15 އަހަރުގެ ފިރިހެން ދަރިފުޅާއި، 7 އަހަރުގެ އަންހެން ދަރިފުޅާއި ކާފަ ދަރިފުޅު ވަނީ ޝަހީދުވެފައެވެ.
އިސްރާއީލުން ޣައްޒާއަށް ދެމުންދާ ހަމަލާތައް ކަވަރުކުރަމުންދާ ނޫސްވެރިންނާއި ނޫސްވެރިންގެ އާއިލާތަކަށް އަމާޒުކޮށް އަންނަނީ ތަކުރާރުކޮށް ހަމަލާތައްދެމުންނެވެ. ޣައްޒާ ހަނގުރާމަ ކަވަރުކުރަމުންދިޔަ 90 ނޫސްވެރިންގެ ފުރާނަ މިހާތަނަށް ވަނީ އިސްރާއީލުން ދިން ހަމަލާތަކުގައި ގެއްލިފައެވެ.
