މާލެ ސިޓީ ކައުންސިލުގެ ހުސްވެފައިވާ މަގާމުތަކަށް ބޭފުޅުން އިންތިޙާބުކުރުމަށް ބާއްވާ ބައި-އިލެކްޝަނަށް ކުރިމަތިލާފައިވާ ކެންޑިޑޭޓުންގެ ގުރުއަތުނެގުމާއި ނަން ތަރުތީބުކުރުން ހޮނިހިރު ދުވަހު ކުރިއަށް ގެންދިޔުމަށް އިލެކްޝަންސް ކޮމިޝަން (އީސީ) އިން ނިންމައިފި އެވެ.
އީސީން ކުރި އިއުލާނެއްގައި ބުނީ މާލެ ސިޓީ ކައުންސިލުގެ މޭޔަރު، މާފަންނު ދެކުރު ދާއިރާ، މެދުހެންވޭރު ދާއިރާ އަދި ހެންވޭރު ދެކުނު ދާއިރާގެ މެންބަރުން އިންތިޚާބު ކުރުމަށް ބާއްވާ ބައި-އިލެކްޝަނުގައި ބައިވެރިވާ ކެންޑިޑޭޓުންގެ ތަރުތީބު ގުރުއަތު ނެގުން ހޮނިހިރު ދުވަހުގެ މެންދުރު ކުރިން 11 ގައި އިންތިހާބާ ބެހޭ މަރުކަޒު (ދަރުބާރުގެ) ގައި އޮންނާނެ ކަމަށެވެ.
އަދި އިންތިހާބުގައި ވާދަ ކުރައްވާ ކެންޑިޑޭޓުންގެ ތެރެއިން، ހާޟިރުނުވެވޭ ކެންޑިޑޭޓެއް ހުރި ނަމަ، އެ ކެންޑިޑޭޓުގެ ބަދަލުގައި ދަރުބާރުގެއަށް ވަޑައިގަންނަވާނެ ބޭފުޅަކު ބަޔާންކޮށް އެކަމުގެ ސިޓީ އެއް އެ ކޮމިޝަނަށް ހުށަހެޅުމަށް އެ ކޮމިޝަނން އެދެމެވެ.
އެހެން ނަމަވެސް، ކެންޑިޑޭޓް ނުވަތަ ބަދަލުގައި ބޭފުޅަކު ހާޟިރު ނުވާނަމަ، ކެންޑިޑޭޓުގެ ބަދަލުގައި ގުރުއަތު ނަގާނީ އިލެކްޝަންސް ކޮމިޝަނުގެ ފަރާތުން ކަން އެ ކޮމިޝަނުން ފާހަގަ ކުރި އެވެ.
މާލެ ސިޓީ ކައުންސިލުގެ ގިނަ މަގާމުތަކެއް ހުސްވެފައިވަނީ، އެ ކައުންސިލުގެ މޭޔަރު ކަމުގައި ހުންނެވި މިހާރުގެ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ވެރިކަމުގެ އެކި އިސް މަގާމުތަކަށް އެ ކައުންސިލުގައި ތިއްބެވި ބޭފުޅުން އައްޔަނުކުރެއްވުމުގެ ސަބަބުންނެވެ. އެގޮތުން ރައީސް އޮފީހުގެ މިނިސްޓަރު ފެންވަރުގައި ވެސް ސިޓީ ކައުންސިލުގައި ރައީސް މުއިއްޒުގެ އަރިހުގައި މަސައްކަތް ކުރެއްވި ބޭފުޅުން ތިއްބެވި އިރު، ބައެއް ބޭފުޅުން އެހެން މަގާމުތަކުގައި ވެސް އެބަ ތިއްބެވި އެވެ.
އެ ކައުންސިލުގެ ހުސްވެފައިވާ މަގާމުތަކުގެ ތެރެއިން އާންމު ގިނަ ރައްޔިތުން އެންމެ ޝައުގުވެރިވާ މަގާމަކަށްވެފައިވަނީ އެ ކައުންސިލުގެ މޭޔަރު ކަމުގެ މަގާމެވެ. އެގޮތުން އެ މަގާމަށް އެމްޑީޕީގެ ފަރާތުން އެމްޓީސީސީގެ ކުރީގެ ސީއީއޯ އާދަމް ޢާޒިމް ނުކުންނަވާ އިރު، ޕީޕީއެމް-ޕީއެންސީގެ ފަރާތުން ނުކުންނަނީ ކުރީގެ ބަންޑާރަ ނައިބު އާޒިމާ ޝުކޫރެވެ.
އަދި ރައީސް ޔާމީންގެ ތާއީދާއެއްކޮށް، ރައީސް ޔާމީން އަލަށް އުފެއްދެވި ޕާޓީ ޕީއެންއެފް އިން ކުރީގެ ޕޮލިސް ކޮމިޝަނަރު ހުސެއިން ވަހީދު ނުކުންނަވާއިރު، ދަ ޑިމޮކްރެސްޓްގެ ފަރާތުން މާލޭ ސިޓީގެ ކައުންސިލަރެއްގެ މަގާމު މިހާރު ވެސް ފުރުއްވަމުންގެންދަވާ ސައިފް ފާތިހު ވެސް ވާދަކުރައްވަ އެވެ.
