ފީފާ ކުލަބު ވޯލްޑް ކަޕްގެ ފުރަތަމަ ބުރުގައި އޮސްޓްރޭލިއާގެ އޯކްލޭންޑް ސިޓީ ބަލިކޮށް، ސައުދީ އަރަބިޔާގެ އަލް އިއްތިހާދުން މުބާރާތުގެ ދެ ވަނަ ބުރުން ޖާގަ ހޯދައިފިއެވެ.
އަންގާރަ ދުވަހުގެ ރޭ ކުޅުނު މެޗު އަލް އިއްތިހާދުން ކާމިޔާބު ކުރީ 3-0 އިންނެވެ. މެޗުގައި އަލް އިއްތިހާދުގެ ފުރަތަމަ ލަނޑު 29 ވަނަ މިނެޓުގައި ޖެހީ ރޮމަރީނިއޯއެވެ. އޭގެ ފަހުން 34 ވަނަ މިނެޓުގައި އެ ޓީމުގެ ދެ ވަނަ ލަނޑު ޖެހީ ފްރާންސްގެ އެންގޯލޯ ކާންޓޭއެވެ. އޭގެ ހަ މިނެޓު ފަހުން އެ ޓީމުގެ ތިން ވަނަ ލަނޑު ޖެހީ ކެޕްޓަން ކްރީމް ބެންޒެމާއެވެ. މި ލަނޑާއެކު ބެންޒެމާ އަށް ވަނީ މުބާރާތުގެ ޚާއްސަ ޝަރަފެއް ލިބިފައެވެ. އެއީ ފީފާ ކުލަބް ވޯލްޑް ކަޕްގެ ހަތަރު މުބާރާތެއްގައި ލަނޑު ޖެހި ފުރަތަމަ ކުޅުންތެރިޔާއެވެ.
މީގެ ކުރިން ސްޕެއިންގެ ރެއާލް މެޑްރިޑަށް ކުޅުނު ފްރާންސްގެ ފޯވާޑް ބެންޒެމާ ވަނީ ފަސް ފަހަރެއްގެ މަތިން ކުލަބު ވޯލްޑް ކަޕް ކާމިޔާބުކޮށްފައެވެ.
މުބާރާތުގެ ދެ ވަނަ ބުރުގައި އަލް އިއްތިހާދު ނުކުންނާނީ އެފްރިކާގެ ޗެމްޕިއަން، މިސްރުގެ އަލް އަހްލީއާ ދެކޮޅަށެވެ.
