"ކޮންމެ ކުއްޖަކަށް އާއިލާއެއް"ގެ ދަށުން ކުދިން ހަވާލުކުރާ އާއިލާތައް ސްކްރީންކޮށް ޓްރެއިންނިން ސެޝަންތައް ބާއްވާނެ: ނަމްޒާ

އުފާވެހި ޕްރޮގްރާމްގެ "ކޮންމެ ކުއްޖަކަށް އާއިލާއެއް" ޕްރޮގްރާމް އެކުލަވާލުމުގެ މަސައްކަތްކުރަމުންދާއިރު ދައުލަތުގެ ބެލުމުގެ ދަށުގައި ތިބޭ ކުދިން އާއިލާތަކާއި ހަވާލުކުރެވޭނީ އެ އާއިލާތައް ސްކްރީންކޮށް ޓްރެއިނިންގ ސެޝަނެއް ބޭއްވުމަށްފަހު ކަމަށް އިޖުތިމާއީ އަދި އާއިލީ ތަރައްގީއާ ބެހޭ ވުޒާރާގެ ނައިބު އައިމިނަތު ނަމްޒާ ވިދާޅުވެއްޖެއެވެ.

ދައުލަތުގެ ބެލުމުގެ ދަށުގައި ތިބޭ ކުޑަކުދިންނަށް ”ކޮންމެ ކުއްޖަކަށް އާއިލާއެއް“ ޕްރޮގްރާމު އެކުލަވާލުމަކީ މިސަރުކާރުގެ ހަފްތާ 14ގައި ހިމެނޭ ކަމެކެވެ. ދައުލަތުގެ ބެލުމުގެ ދަށުގައި ހުޅުމާލެ އާއި އަތޮޅުތެރޭގައި މިހާރުވެސް 164 ކުދިން އެބަތިއްބެވެ.

މި ޕްރޮގްރާމް ކުރިޔަށް ގެންދިޔުމަށް ރާވާފައިވާ ގޮތާއި ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަފުޅު ދައްކަވަމުން ނަމްޒާ ވިދާޅުވީ މި ޕްރޮގްރާމްގެ ދަށުން ދައުލަތުގެ ބެލެމުގައި ދަށުގައި ތިބޭ ކުދިންނަށް އާއިލީ ވެއްޓެއްގައި އުޅެ ބޮޑުވުމުގެ ފުރުސަތު ފަހިކޮށްދެވޭނެކަމަށެވެ. އެގޮތުން ވަގުތީ ގޮތުން ކުދިން ފޮސްޓަރ ކުރެވޭއިރު ދާއިމީ ގޮތެއްގައި ވެސް ކުދިން ފޮސްޓަރ ކުރެވޭނެއެވެ.

ނަމްޒާ ވިދާޅުވީ މިވަގުތު ޕްރޮގްރާމް އެކުލަވާލުމުގެ މަސައްކަތްކުރަމުންދާއިރު މިކަމަށް ޝައުގުވެރިވާ ފަރާތްތައް ހޯދުމުގެ މަސައްކަތްކުރަމުންދާކަމަށެވެ. އަދި މިކަމަށް ޝައުގުވެރިވާ ފަރާތްތަކަށް ފުރުސަތު ހުޅުވާލުމުގެ ކުރިންވެސް އަމިއްލައަށް ޝައުގުވެރިކަން ފާޅުކުރާ ފަރާތްތަކަށް މިނިސްޓްރީން ގުޅާނެކަމަށާއި މިހާރުވެސް ދަފްތަރު އެކުލަވާލުމުގެ މަސައްކަތްކުރަމުންދާކަމަށް ނަމްޒާ ވިދާޅުވިއެވެ. ނަމްޒާ ވިދާޅުވީ ކުދިން ފޮސްޓަރ ކުރަން ބޭނުންވާ ފަރާތްތަކަށް ފުރުސަތު ހުޅުވާލުމުން މިނިސްޓްރީގެ ވެބްސައިޓުންނާއި މިނިސްޓްރީގެ ސޯޝަލް މީޑިޔާ އެކައުންޓްތަކުން އެކަމުގެ ފޯމު ލިބިގެންދާނެކަމަށެވެ.

ނަމްޒާ ވިދާޅުވީ މިކަމާއި ގުޅޭގޮތުން މައުލޫމާތު ދިނުމުގެ ސެޝަންތަކެއް ކުރިޔަށް އޮތް ދުވަސްތަކުގައި މާލެ އާއި ވިލިމާލެ ހުޅުމާލެ ފޭސް 1 އަދި ފޭސް 2 ގައި ކުރިޔަށް ގެންދާނެކަމަށެވެ.

ޕްރޮގްރާމްގައި ވާހަކަދައްކަވަމުން އެވުޒާރާގެ ސީނިއަރ ލީގަލް ކައުންސެލް އަލްއުސްތާޛާ އައިޝަތު އިފާދާ ވިދާޅުވީ މަސައްކަތްކުރަމުންދަނީ ފުރަތަމަ 100 ދުވަހުގެ ތެރޭގައި ކުދިން އާއިލާތަކާއި ހަވާލުކުރަން ކަމަށާއި އެކަންކުރުމަށް ގަވާއިދުތަކަށް ގެންނަންޖެހޭ ބަދަލުތައް ގެނައުމުގެ މަސައްކަތްކުރަމުންދާކަމަށެވެ. އަދި ވަގުތީ ގޮތުން ކުދިންގެ ބެލެނިވެރިކަމާއި ހަވާލުވާ އާއިލާތަކާއި ޖެނުއަރީ މަހު ޓްރެއިނިންގ ބޭއްވޭނެކަމަށް އިފާދާ ވިދާޅުވިއެވެ.

އިފާދާ ވިދާޅުވީ ވަގުތީ ގޮތުން ބެލެނިވެރިކަން އާއިލާއަކާ ހަވާލުކުރިނަމަވެސް މަސައްކަތްކުރާނީ ކުއްޖާގެ އަސްލު އާއިލާއަށް ކުއްޖާއަށް އަނބުރާ އާދެވޭނެ ގޮތަށްކަމަށެވެ.

އިފާދާ ވިދާޅުވީ ދާއިމީކޮށް ކުއްޖަކު ފޮސްޓަރ ކުރާނަމަ އެކުއްޖާގެ އުމުރުން 18 ވަންދެން ކޯޓު މެދުވެރިކޮށް ކުއްޖާގެ ބެލެނިވެރިކަން ގާނޫނީ ގޮތުން ހޯދައިދެވޭނެކަމަށެވެ. އެ ހާލަތުގައި އެކުއްޖާއަށް އިތުރު ބެލެނިވެރިކަން ހޯދައިދިނުމަށް މަސައްކަތް ނުކުރާނެކަމަށް އިފާދާ ވިދާޅުވިއެވެ.

ފޮސްޓަރ އާއިލާގެ ބެލުމުގެ ދަށުގައި ކުއްޖާ ހުންނައިރު އެ އާއިލާތަކުން ކުދިންނާމެދު އަމަލުކުރާގޮތް މިނިސްޓްރީން ގާތުން ބަލަމުންދާނެކަމަށް އިފާދާ ވިދާޅުވިއެވެ. އެގޮތުން އެކުދިން ތިބޭ ތަންތަނަށް ގޮސްގެންނާއި ގުޅައިގެން ވެސް ހާލަތު ގަވާއިދުން ބަލަމުންދާނެކަމަށް އިފާދާ ވިދާޅުވިއެވެ.