އިންސާނީ ޙައްޤުތައް ރައްކާތެރިކުރުމާބެހޭ ބައިނަލްއަޤްވާމީ މުޢާހަދާއިން އެންމެ ބޮޑަށް ބާރުއަޅާ އެއް ކަމަކީ ހަމަހަމަކަން: ނައިބު ރައީސް
12 ޑިސެމްބަރު 2023 | އަންގާރަ 15:21މި ސަރުކާރުން ތަރައްޤީގެ ކަންކަމުގައި ގެންގުޅޭ ވިސްނުމަކީ، ތަރައްޤީއަށް ކުރާ ދަތުރުގައި އިންސާނީ ތަރައްޤީއަށް އިސްކަންދިނުމުގެ ވިސްނުން
ރައީސުލްޖުމްހޫރިއްޔާގެ ނައިބު އަލްއުސްތާޛް ޙުސައިން މުޙައްމަދު ލަޠީފް
އިންސާނީ ޙައްޤުތައް ރައްކާތެރިކުރުމާބެހޭ ބައިނަލްއަޤްވާމީ މުޢާހަދާއިންނާއި ހުރިހާ ފަރުދުންގެ ކަރާމާތަށްޓަކައިވެސް އެންމެބޮޑަށް ބާރުއަޅާކަމަކީ ހަމަކަން ކަމަށާއި، އަދި ބައިބައިވުމަށް ފުރުޞަތެއް ނެތްކަމުގައި ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ސްވިޒަރލެންޑްގެ ޖެނީވާގައި "ހިއުމަން ރައިޓްސް 75"ގެ މަތީ ފަންތީގެ ޙަރަކާތްތަކުގެ ޕެނަލް ޑިޝްކަޝަން ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
އިންސާނީ ޙައްޤުތައް ކުރިއަށް ނެރެ، މިއަދާ އަދި ކުރިމަގުގެ މައްސަލަތައް ޙައްލުކުރުމުގެ މައުޟޫޢުގެ މައްޗަށް ވާހަކަފުޅު ދައްކަވަމުން ރައީސުލްޖުމްހޫރިއްޔާގެ ނައިބު ވިދާޅުވީ، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ސަރުކާރުން ތަރައްޤީގެ ކަންކަމުގައި ގެންގުޅޭ ވިސްނުމަކީ، ތަރައްޤީއަށް ކުރާ ދަތުރުގައި އިންސާނީ ތަރައްޤީއަށް އިސްކަންދިނުމުގެ ވިސްނުން ކަމުގައެވެ.
ރައީސުލްޖުމްހޫރިއްޔާގެ ނައިބުގެ ވާހަކަފުޅުގައި، އިންސާނީ ޙައްޤުތައް ރައްކާތެރިކުރުމާބެހޭ ބައިނަލްއަޤްވާމީ މުޢާހަދާއަށް 75 އަހަރު ފުރޭ މުނާސަބަތު ފާހަގަކުރާއިރު، ފަލަސްޠީނުގެ ޣައްޒާގެ ރައްޔިތުންގެ އިންސާނީ ޙައްޤުތަކުން މަޙްރޫމުވެ ކުރިމަތިލާންޖެހިފައިވާ ދަތި ޙާލަތަށް އަލިއަޅުއްވާލައްވައި، ޣައްޒާގައި ހިންގަމުންދާ ޢުދުވާންތައް މިހާރުން މިހާރަށް ހުއްޓާލުމަށް ރާއްޖެއިން ގޮވާލަމުންދާ ގޮވާލުން ތަކުރާރުކުރެއްވިއެވެ. މީގެ އިތުރުން ޣައްޒާގެ މިހާރުގެ ޙާލަތާއި އަދި އެހެން ޤައުމުތަކުގައި ހިންގަމުންދާ މިފަދަ ހަނގުރާމަތަކަކީ އިންސާނީ ޙައްޤުތައް ނެގެހެއްޓުމަށް މުޅި ބައިނަލްއަޤްވާމީ މުޖުތަމަޢުގެ އެއްބާރުލުމަށް ބޭނުންޖެހިފައިވާ މިންވަރު ދައްކުވައިދޭ މިސާލުތައްކަން އެމަނިކުފާނު ފާހަގަކުރެއްވިއެވެ.
ރައީސުލްޖުމްހޫރިއްޔާގެ ނައިބުގެ ވާހަކަފުޅުގައި މައިގަނޑު 5 ނުކުތާއެއް ފާހަގަކުރެއްވިއެވެ. އެގޮތުން ފުރަތަމަ ކަމަކަށް، އިންސާނީ ޙައްޤަކީ އިތުރު ބަޙުޘެއް ނުކޮށް ލިބެންޖެހޭ ޙައްޤެއްކަމާއި، އަދި އެއީ ފަރުދެއްގެ ކަރާމާތް ރައްކާތެރިކުރުމަށް އެންމެ ކުޑަ މިންވަރުކަން އެމަނިކުފާނު ފާހަގަކުރެއްވިއެވެ. ދެވަނަ ކަމަކަށް އިންސާނީ ޙައްޤުތައް ކުރިއެރުވުމުގެ މަސައްކަތް ކުރިއަށްގެންދަންވާނީ ސަރުކާރާއި، ވިޔަފާރިތަކާއި، މަދަނީ ޖަމްޢިއްޔާ ޖަމާޢަތްތަކާއި، ބައިނަލްއަޤްވާމީ މުއައްސަސާތަކާއި، ވަކިވަކި ފަރާތްތައް ހިމެނޭހެން، ވަށާޖެހޭ ގޮތެއްގައި ކަމުގައި ރައީސުލްޖުމްހޫރިއްޔާގެ ނައިބު ވިދާޅުވިއެވެ. ތިންވަނަ ކަމަކަށް، އިންސާނީ ޙައްޤުތަކާގުޅޭ ޢިލްމުތައް ހުރިހާ ފަންތިއެއްގައި ފެތުރުމެވެ. އަދި ހަތަރުވަނަ ކަމެއްގެ ގޮތުގައި، ތަރައްޤީއާއި ޞުލްޙަމަސަލަސްކަމާއި ސަލާމަތްކަން ކުރިއަރުވައި، މުޖުތަމަޢުތަކުގެ ރައްކާތެރިކަން ކަށަވަރުކުރުމުގައި މަލްޓިލެޓަރަލިޒަމާއި ވަކި ހަމަތަކެއްގެ މައްޗަށް ބިނާވެގެން ބައިނަލްއަޤްވާމީގޮތުން ކަންކުރަމުން އަންނަ އުޞޫލުތައް ބަލައިގަނެ ކުރިޔަށްދިއުމަކީ ކޮންމެހެން ކުރަންޖެހޭކަމެއްކަން އެމަނިކުފާނު ފާހަގަކުރެއްވިއެވެ. އަދި ފަހު ކަމެއްގެ ގޮތުގައި، ކުރިމަގަށް ކުރެވޭ އުންމީދުތައް އާކުރުމުގެ ގޮތުން އަދި ހުރިހާ ފަރާތްތަކެއްގެ ބައިވެރިވުން އިތުރުކުރުމާއެކު، ކަންކަން ނިންމުމަށް މަގުފަހިކުރުމުގެ ގޮތުން އިންސާނީ ޙައްޤުތަކާއި މޫސުމަށް އަންނަ ބަދަކުތަކާގުޅޭ ވާހަކަތަކުގައި ޒުވާނުންގެ ބައިވެރިވުން އިތުރުކުރަންޖެހޭކަން ފާހަގަކުރެއްވިއެވެ.
"ހިއުމަން ރައިޓްސް 75"ގެ މަތީ ފަންތީގެ ޙަރަކާތްތަކަކީ އދ.ގެ އިންސާނީ ޙައްޤުތަކާބެހޭ ހައިކޮމިޝަނަރުގެ އޮފީހާއި ސްވިޒަރލެންޑްގެ ސަރުކާރު ގުޅިގެން، އިންސާނީ ޙައްޤުތައް ރައްކާތެރިކުރުމާބެހޭ ބައިނަލްއަޤްވާމީ މުޢާހަދާ، "ޔުނިވަރސަލް ޑިކްލަރޭޝަން އޮފް ހިއުމަން ރައިޓްސް" އަށް 75 އަހަރު ފުރުމުގެ މުނާސަބާ ފާހަކުރުމުގެ ގޮތުން ބާއްވާ ޙަރަކާތްތަކެކެވެ.
ދިވެހިރާއްޖެއަކީ އދ.ގެ ހިއުމަންރައިޓްސް ކައުންސިލުގެ މެންބަރު ޤައުމެކެވެ. އަދި ކައުންސިލުގެ އޭޝިއާ ޕެސިފިކް ސަރަޙައްދުގެ ނައިބު ރައީސްގެ މަޤާމު މިހާރު ފުރަމުން ދަނީވެސް ދިވެހިރާއްޖެއިންނެވެ.
