ސައޫދީގެ އަންހެން ޓީމަށް އެހީވާން ކޯޓޭސް ހުރީ ފުރިހަމަ އަށް ތައްޔާރަށް

ސައޫދީ އަރަބިއްޔާގެ އަންހެން ފުޓުބޯޅަ ކުރިއެރުވުމުގައި މަސައްކަތްކޮށް، އެކަމަށް އެހީތެރިވުމަށް ފުރިހަމަ އަށް ތައްޔާރަށް ހުރި ކަމަށް ސައޫދީ ޤައުމީ އަންހެން ފުޓުބޯޅަ ޓީމުގެ ކޯޗުކަމާ ހަވާލުވި ސްޕެއިންގެ ލުއިސް ކޯޓޭސް ބުނެފިއެވެ.

އޭނާ މިހެން ބުނީ ސައޫދީގެ ޤައުމީ އަންހެން ޓީމާ ހަވާލުވުމަށްފަހު ވާހަކަދައްކަމުންނެވެ. އޭނާ ބުނީ ސައޫދީގެ އަންހެން ޓީމު ލީޑުކޮށް، ސައޫދީގެ އަންހެން ފުޓުބޯޅަ ކުރިއެރުވުމަށް އެހީތެރިވުމުގެ މަސްއޫލިއްޔަތާ ހަވާލުވެވުމަކީ ލިބުނު ބޮޑު ޝަރަފެއް ކަމަށެވެ. އަދި އެ ދަތުރު ފަށައިގެން ކުރިއަށް ގޮސް، ހިތްވަރާއި އަމާނާތްތެރިކަމާއެކު މަސައްކަތް ކުރުމަށް ކެތްމެދުވެފައި ހުރި ކަމަށެވެ. އޭނާ ދެކޭ ގޮތުގައި ފާއިތުވި އަހަރުތަކުގައި ވެސް ސައޫދީގެ އަންހެން ޓީމުން ވަނީ އެކަށީގެންވާ މަސައްކަތްތަކެއް ކޮށްފައެވެ. މިހާރު ދެން އޮތީ، އެ މަސައްކަތް އިތުރަށް ކުރިއަށް ޖައްސާލުން ކަމަށް ވެސް އޭނާ ޤަބޫލުކުރެއެވެ.

މީގެ އިތުރުން އޭނާ ބުނީ ސައޫދީގައި ކުޅެމުން އަންނަ އަންހެން ކުޅުންތެރިންނާއި ބައިނަލްއަޤުވާމީ މައިދާނުގައި ކުޅުންތެރިން ހިމެނިގެން ކުޅެމުން އަންނަކަމީ، އެ ޤައުމުގައި ފުޓުބޯޅައިގެ އުންމީދީ މާހައުލެއް އޮތް ކަމުގެ އިޝާރާތެއް ކަމަށެވެ. ހަމައެގޮތަށް، ސައޫދީގެ އަންހެން ލީގު ވަރުގަދަވަމުން އަންނަ ކަމަށާއި، އެއީ ވެސް ކުރިއެރުމެއް ކަމަށް އޭނާ ވަނީ ފާހަގަކޮށްފައެވެ. އިތުރަށް އޭނާ ބުނީ، އެކަމުގެ ތެރެއިން ސައޫދީ ޤައުމީ ޓީމު މިހާރު އޮތް ހިސާބަށްވުރެ، ކުރިއަށް ގެންދެވޭނެ ކަމުގެ ޔަޤީންކަން އޮތް ކަމަށެވެ.

ސައޫދީ އަރަބިއްޔާގެ ފުޓުބޯޅަ ފެޑެރޭޝަން އަދި އެ ޤައުމުގެ ސަރުކާރުން ވެސް އަންނަނީ އަންހެން ފުޓުބޯޅަ ކުރިއަރުވައި، ވަރުގަދަ ކުރުމަށް ގިނަ މަސައްކަތްތަކެއް ކުރަމުންނެވެ. އެގޮތުން ސަރުކާރުގެ ބަޖެޓުން ވެސް އަންހެން ފުޓުބޯޅަ އަށް ވަކި އިންސައްތައެއް ޚަރަދު ކުރުމަށް ވަނީ ނިންމައިފައެވެ.