ހ. ސޯސަން މަންޒިލް ގޭގެ ހަވަނަ ފަންގިފިލާގައި މަސްތުވާތަކެތި ގެންގުޅެ، ބޭނުންކޮށް، އެތަކެތީގެ ވިޔަފާރިކުރި ކަމަށް ތުހުމަތުކުރެވޭ ފުލުހުންގެ ޑްރަގް އެންފޯސްމަންޓް ޑިޕާޓްމެންޓްގެ އޮފިސަރު، ޙަސަން ޝުޖާޢުގެ މައްޗަށްގެ ޕްރޮސެކިއުޓަރ ޖެނެރަލް (ޕީޖީ)ން ދެ ދަޢުވާއެއް އުފުލައިފިއެވެ.
މި މައްސަލާގައި ޝުޖާޢުގެ މައްޗަށް ދެ ދަޢުވާއެއް އުފުލާފައިވާއިރު، މައްސަލާގައި ތުހުމަތުކުރެވޭ މީހުންގެ ތެރެއިން މަރްޔަމް ޞަފާގެ މައްޗަށް ވެސް ދެ ދަޢުވާއެއް ވަނީ އުފުލާފައެވެ. އެއީ މަސްތުވާއެއްޗެއް ޓްރެފިކް ކުރުމުގެ ކުށުގެ ދަޢުވާއާއި، ކެނަބިހުން މުޢާމަލާތުކުރުމުގެ ކުށުގެ ދަޢުވާއެވެ.
މީގެ އިތުރުން، މަރްޔަމް ޞަފާގެ މައްޗަށް، ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގައި ކުރުމުގެ ކުށުގެ ދަޢުވާވެސް ވަނީ ހުށަހަޅާފައެވެ. އަދި އެ މައްސަލާގައި ހިމެނޭ އިތުރު މީހުން ކަމަށްވާ ޙުސައިން ރަޝީދުގެ މައްޗަށް، މަސްތުވާއެއްޗެއް ޓްރެފިކްކުރުމުގެ ކުށުގެ ދަޢުވާއާއި، ކެނަބިހުން މުޢާމަލާތުކުރުމުގެ ކުށުގެ ދަޢުވާގެ އިތުރުން، ޠިބްޔާނު އަޙްމަދު އަދި އަޙްމަދު ރާޖިޙުގެ މައްޗަށްވެސް، މަސްތުވާއެއްޗެއް ޓްރެފިކް ކުރުމުގެ ކުށުގެ ދަޢުވާ އުފުލާފައިވެއެވެ.
މީގެ އިތުރުން އެ މައްސަލާގައި ހިމެނޭ އިސްމާޢީލް މުނައްވަރުގެ މައްޗަށް، ކެނަބިހުން މުޢާމަލާތުކުރުމުގެ ކުށުގެ ދަޢުވާ، ކްރިމިނަލް ކޯޓަށް ވަނީ ހުށަހަޅާފައެވެ.
މި މައްސަލާގައި ތުހުމަތުކުރެވުނު އިބްރާހީމް ރިޝްވާނާއި، މުޙައްމަދު މުޢައްމަރާއި، ހުނޭސާ އާދަމް ނަޞީރާއި، މަރްޔަމް ސާމިޙާއާއި، ޙަސަން ސާއިމާއި، އާމިނަތު ރިޝްފާގެ މައްޗަށް، ޖިނާއީ ކުށެއްގެ ދަޢުވާއެއް ކޮށް، ކުށް ސާބިތު ކުރެވޭވަރަށް ހެއްކާއި ޤަރީނާ ލިބިފައިނުވާތީ، އެމީހުންގެ ބައި އިތުރަށް ކުރިއަށް ނުގެންދިއުމަށް ނިންމައި، ޕީޖީން ވަނީ އަނބުރާ ފޮނުވާލާފައެވެ.
