މަޖިލީހުގެ ނާއިބްރައީސްކަމަށް އެމްޑީޕީން ސައްލެ، ރޮޒޭ އަދި ޖާބިރު: ޕީޖީ ގްރޫޕުން ސިއްރު ވޯޓެއް ނަގަނީ

ރައްޔިތުންގެ މަޖިލީހުގެ ހުސްވެފައިވާ ނާއިބްރައީސްކަމުގެ މަޤާމަށް އެމްޑީޕީގެ ފަރާތުން 3 މެންބަރަކު ވާދަކުރެއްވުމަށް ނިންމަވައިފިއެވެ.

މި މަޤާމަށް އެމްްޑީޕީގެ ފަރާތުން ވާދަ ކުރައްވަނީ ހޯރަފުށީ ދާއިރާގެ މެންބަރު އަހުމަދު ސަލީމް، އައްޑޫ މީދޫ ދާއިރާގެ މެންބަރު ރޮޒައިނާ އާދަމް، އަދި ކާށިދޫ ދާއިރާގެ މެންބަރު އަބްދުﷲ ޖާބިރުއެވެ.

އެމްޑީޕީ ޕީޖީ ގްރޫޕުން ވަނީ އެ ޕާޓީގެ ފަރާތުން ވާދަ ކުރައްވާނެ ކެންޑިޑޭޓަކު ކަނޑައެޅުމަށް ސިއްރު ވޯޓެއް ނެގުމަށް ނިންމާފައެވެ.

މަޖިލީހުގެ ނާއިބްރައީސް އިންތިޚާބު ކުރުމަށް އާދީއްތަ ދުވަހުގެރޭ ޖަލްސާއެއް ބޭއްވުމަށް ނިންމާފައިވަނީ، އެ މަގާމުން ގަލޮޅު އުތުރު ދާއިރާގެ މެންބަރު އީވާ އަބްދުﷲ އިސްތިއުފާ ދެއްވާފައިވާތީއެވެ.