ކ.ހުރާއަށް ވަޑައިގެންނެވި ސަރުކާރުގެ ވަފުދަށް މަރުހަބާ ދެންނެވުމަށް ކުރީގެ ރައީސް އަދި ޖަލު ހުކުމެއް ތަންފީޒު ކުރައްވަމުން ގެންދަވާ އަބްދުﷲ ޔާމީންގެ ނަންޖަހާފައިވާ ހުސްގޮނޑިކޮޅު ނެރެފިއެވެ.

ޕީޕީއެމް/ޕީއެންސީގެ ލީޑާޝިޕްގެ ބައެއް ބޭފުޅުން ކ.އަތޮޅުގެ ރަށްތަކަށް ކުރައްވާ ދަތުރުފުޅުގެ ތެރެއިން ހުކުރު ދުވަހުގެ ހަވީރު ވަނީ ކ.ހުރާއަށް ވަޑައިގަންނަވާފައެވެ. ސަރުކާރުގެ މިޓީމުގައި 13 މެންބަރުން ހިމެނިވަޑައިގަންނަވައެވެ. މިދަތުރަކީ ޕީއެންސީއަށް މެންބަރުން އިތުރު ކުރުމަށް ކުރައްވާ ދަތުރެއް ކަމަށް މައުލޫމާތު ލިބެއެވެ.

ސަރުކާރުގެ 13 މެންބަރުންގެ ވަފުދެއް ހުރާއަށް ވަޑައިގަތުމާއި ގުޅިގެން ރައްޔިތުން ވަނީ އެބޭފުޅުންގެ ފަހަތްޕުޅުން ހުސްގޮނޑިކޮޅު ހިފައިގެން ހިނގާފައެވެ. އަދިވެސް ޔާމީން ހުންނެވީ ނުހައްގު ޖަލު ހުކުމެއްގައި ކަމަށް ގޮވާލާފައިވެއެވެ. މީގެ އިތުރުން ޕީޕީއެމް ހިންގުމަށް ހުރަސްއަޅާފައިވާ ކަމަށް ބުނެ، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސްޕެޝަލް އެޑްވައިޒަރު އަދި ވެރިކަން ކުރާ ޕާޓީ ޕިއެންސީގެ ޗެއާޕާސަން އަބްދުއްރަހީމް އަބްދުﷲއަށް ފާޑުކިޔާފައިވެއެވެ.

ރައީސް މުއިއްޒުގެ ސަރުކާރާ ހަވާލުވެ އެއްމަސްނުވަނީސް ރައްޔިތުންނަށް ދަތިކުރާ ކަމަށާއި، ޔާމީންގެ ފިކުރަށް ތާއީދުކުރާ މީހުން ސިޔާސީ މަސައްކަތްތަކުން ދުރަށް ޖައްސަމުންދާ ކަމަށް ރައްޔިތުން ގޮވާލާފައިވެއެވެ.

ސޯޝަލް މީޑިއާގައި ދައުރުވަމުންދާ ވީޑިއޯތަކުގައި އެބޭފުޅުންނަށް މަރުހަބާ ދެންނެވުމަށް ގިނަ އަދަދެއް ރައްޔިތުން ބަނދަރު ސަރަހައްދަށް ނުކުމެފައެއް ނުވެއެވެ. ނަމަވެސް ރިޔާސީ އިންތިޚާބު 2023 ގެ ކެންޕޭންގެ ތެރޭގައި ރައީސް.ޑރ މުއިއްޒު ވަޑައިގެންނެވުމުން އެރަށުގެ ރައްޔިތުން ވަނީ ވަރަށް ހޫނު މަރުހަބާއެއް ދަންނަވާފައެވެ.

ޕީއެންސީއަށް މެންބަރުން އިތުރުކުރުމުގެ މަސައްކަތް ފަށާފައިވާއިރު، ޔާމީން އިސްވެ ހުންނަވައި މިހާރު ވަނީ ޕީޕަލްސް ނޭޝަނަލް ފްރަންޓް (ޕީއެންއެފް)ގެ ނަމުގައި ސިޔާސީ ޕާޓީއެއް އުފައްދާފައެވެ. ޔާމީންގެ ލެގަސީގައި ރައީސް މުއިއްޒު ވެރިކަމަށް ވަޑައިގެންނެވި ނަމަވެސް މިހާރު އެމަނިކުފާނު އެކަން މަތިން ހަނދުމަފުޅު ނެތް ކަމަށާއި، އަނިޔާވެރިވެފައިވާ ކަމަށް ޔާމީންނަށް ތާއީދުކުރާ ސަޕޯޓަރުން ދަނީ ބުނަމުންނެވެ.