ޗީބޯ ކައިރީ ހިންގި މާރާމާރީއާ ގުޅިގެން ތިން މީހަކު ހައްޔަރުކޮށްފި

ހެންވޭރު ޗީބޯ ކައިރީ ހިންގި މާރާމާރީއެއްގައި ބައިވެރިވިކަމުގެ ތުހުމަތުގައި ތިން މީހަކު ފުލުހުންގެ ބެލުމުގެ ދަށަށް ގެންގޮސްފިއެވެ.

އެ މާރާމާރީއާ ގުޅިގެން ފުލުހުން ބުނީ، މާރާމާރީގެ ރިޕޯޓު ލިބުނީ، ބުދަ ދުވަހުގެ ހަވީރު 17:03 ހާއިރު ކަމަށެވެ. އެ މާރާމާރީއާ ގުޅިގެން އެއްވެސް މީހަކަށް އަނިޔާއެއް ލިބުނުކަމުގެ މައުލޫމާތު ލިބިފައިނުވާކަމަށް ފުލުހުން ބުނުއެވެ.

މާރާމާރީއާ ގުޅިގެން ހައްޔަރުކުރީ އުމުރުން 18 އަހަރާއި، 22 އަހަރާއި، 24 އަހަރުގެ ތިން މީހުން ކަމަށް ފުލުހުން ބުނެއެވެ.

ސޯޝަލް މީޑިއާގައި މި މާރާމާރީ ހިންގާ ވީޑިއޯ ވަނީ ދައުރުވެފައެވެ. ދައުރުވި ވީޑިއޯއަކުން ފެންނަ ގޮތުގައި، މާރަމާރީ ހިނގި ވަގުތު އެ ސަރަހައްދުގައި ފުލުހުންނާއި އާންމުންގެ ގިނަ ބަޔަކު އެއްވެފައި ތިބެއެވެ.

ވީޑިއޯ އިން ފެންނަ ގޮތުގައި ފުލުހުންނަށް ފިލަން ދެ މީހަކު މަސައްކަތް ކުރެއެވެ. އެ ދެ މީހުން ފިލަންވެގެން ސައިކަލެއްގައި ވަރަށް ބާރަށް ދުއްވާފައި ދަނިކޮށް، އެ މީހުންގެ ކުރިމަތިން ދުއްވާފައި ދިޔަ އެހެން ސައިކަލެއްގައި ޖެހި ބިން މައްޗަށް ވެއްޓެވެ. އަދި އެ ދެމީހުން ތެދުވެ ދުއްވައި ގަންނަނިކޮށް އެތަނުން އެކަކު ފުލުހުން ހިފަހައްޓައެވެ. ދެވަނަ މީހާ ހިފަހައްޓަން ފުލުހުން ދުވާތަން ވެސް އެ ވީޑިއޯ އިން ފެނެއެވެ.

މިމައްސަލަ ފުލުހުން އަންނަނީ ތަހުގީގުކުރަމުންނެވެ.