ވަރިވާން ދިޔަ އަންހެނަކަށް ޒާތީ މެސެޖް ފޮނުއްވި މެޖިސްޓްރޭޓް ހާޒިރުކުރި ކޮމިޓީ ސިއްރު

ވަރިވާން ދިޔަ އަންހެނަކަށް ޒާތީ މެސެޖް ފޮނުއްވި މެޖިސްޓްރޭޓް އަލީ އާދަމް ހާޒިރުކުރި ކޮމިޓީ ބައްދަލުވުން ސިއްރުކޮށްފިއެވެ.

ހދ ޖުޑީޝަލް ދާއިރާގެ އިސް މެޖިސްޓްރޭޓް އަލީ އާދަމް ފަނޑިޔާރުކަމުން ވަކިކުރުމާ ގުޅޭގޮތުން މަޖިލީހަށް ފޮނުވާފައިވާ މައްސަލާގައި ކޮމިޓީ ބައްދަލުވުން ބޭއްވިނަމަވެސް، އަލީ އާދަމަށް ކޮމިޓީއަށް ވަޑައިގަތުމަށް ދެންނެވުމުން، އަލީ އާދަމް ފުރަތަމަ ވިދާޅުވެފައިވަނީ، ވަކީލަކާއެކު ވަޑައިގަންނަވަން ބޭނުންފުޅުވާކަމަށެވެ.

އެހެންނަމަވެސް ހޯމަ ދުވަހު އިތުރު ސިޓީއެއް ކޮމިޓީއަށް ފޮނުއްވާފައިވާއިރު، ސިޓީގައި ވަނީ މައްސަލަ އިތުރަށް ދިރާސާކުރުމަށް ވަގުތު ބޭނުންފުޅުވާ ކަމަށެވެ.

އަދި، ބުދަ ދުވަހުގެ ކޮމިޓީއަށް ވަޑައިގެން އަލީ އާދަމް ވަނީ މައްސަލައަށް ޖަވާބުދާރީވެވަޑައިގެންފައެވެ.

ނަމަވެސް މި ބައްދަލުވުން ކުރިއަށް ގެންދިޔައީ ސިއްރުކޮށްގެންނެވެ.

އެނގިފައިވާ ގޮތުގައި މި ބައްދަލުވުމުގައި މެންބަރުން އަދި މި މައްސަލައަށް ވަކި ގޮތެއް ނިންމާފައެއް ނުވެއެވެ.

އިސް މެޖިސްޓްރޭޓު ޢަލީ އާދަމް 19 ނޮވެންބަރު 2023 ވަނަ ދުވަހުން ފެށިގެން ޤާނޫނު ނަންބަރު 2008/10 (ޖުޑީޝަލް ސަރވިސް ކޮމިޝަންގެ ޤާނޫނު) ގެ 1-32 ވަނަ މާއްދާގެ (ހ) ގެ (2) ވަނަ ނަންބަރުގެ ދަށުން މެޖިސްޓްރޭޓްކަމުގެ މަޤާމަށް ބަދަލުކުރުމަށް ޖުޑީޝަލް ސަރވިސް ކޮމިޝަނުން ވަނީ ނިންމާފައެވެ.