ބީޖީ އެކެޑަމީގެ ތިން ޓީމެއް މެލޭޝިޔާ މުބާރާތަކަށް ދަނީ

ބީޖީ އެކެޑަމީގެ ތިން ޓީމެއް މެލޭޝިޔާގައި އޮންނަ މުބަރާތަކަށް ދާން ތައްޔާރުވެއްޖެއެވެ.

ބީޖީ އެކެޑަމީގެ ޓީމްތައް ވާދަކުރަނީ މެލޭޝިޔާގެ ރޯޔަލް ސެލަންގޯ ކްލަބުން ބާއްވާ ޔޫތު މުބާރާތެއްގައެވެ. ޑިސެމްބަރު 2-3 އަށް މެލޭޝިޔާގައި އޮންނަ މުބާރާތަށް ބީޖީގެ ތިން ޓީމް ބުދަ ދުވަހު އެގައުމަށް ދާނެއެވެ. މުބާރާތުގައި ވާދަކުރަނީ ބީޖީގެ 8 އަހަރުން ދަށާއި, 10 އަހަރުން ދަށާއި, 12 އަހަރުން ދަށުގެ ޓީމެވެ. ތިން އުމުރު ފުރައިން އެ އެކެޑަމީގެ 36 ކުޅުންތެރިން މުބާރާތުގައި ވާދަކުރާނެއެވެ. މިއީ ރޯޔަލް ސެލަންގޯ ކްލަބުން ބާއްވާ ޖޫނިއަރ ސޮކަރ ޑިވެލޮޕްމަންޓް ޕްރޮގްރާމެކެވެ. މިއީ އެކްލަބުން މިޕްރޮގްރާމް ކުރިއަށް ގެންދާ 17 ވަނަ ފަހަރެވެ.

މީގެކުރިންވެސް ބީޖީ އެކެޑަމީން ވަނީ މިމުބާރާތުގައި ވާދަކޮށް ރަނގަޅު ކާމިޔާބީތަކެއް ހޯދާފައެވެ. އެގޮތުން 2019 ވަނަ އަހަރު ވާދަކޮށް 10 އަހަރުން ދަށުގެ ބައިން 3 ވަނަ, 12 އަހަރުން ދަށުގެ ބައިން 2 ވަނަ ހޯދިއެވެ. އަދި 2022 ވަނަ އަހަރު 10 އަހަރުން ދަށާއި, 12 އަހަރުން ދަށުގެ ބައިންވެސް 3 ވަނަ ހޯދިއެވެ.

ބީޖީ އެކެޑަމީން ވަނީ މިއަހަރު މިހާތަނަށް އިންޓަރނޭޝަނަލް ތިން މުބާރާތެއްގައި ވަދަކޮށްފައެވެ. މިމުބާރާތުގައި ބީޖީ އެކެޑަމީން ވާދަކުރަނީ އެކެޑަމީ ދަރިވަރުންގެ ބެލެނިވެރިންގެ އެހީތެރިކަމާއެކުއެވެ. ބީޖީ އެކެޑަމީ އަކީ 2014 ވަނަ އަހަރު 23 ކުދިންނާ އެކު ފެށި އެކެޑަމީ އެކެވެ.