އާޒިމް ނާޖާއިޒު މާލީ މަންފާއެއް ހޯދާފައިވާކަމަށް ބުނެ "ދިޔަރެސް" އިން ފަތުރަނީ ދޮގު ޚަބަރެއް: އެމްޓީސީސީ
މައްސަލައިގެ ހަގީގަތް ހާމަ ކުރުމަށް އެ މައްސަލަ ބަލައިދިނުމަށް އެމްޓީސީސީން ވަނީ އޭސީސީގައި އެދިފައި
ގްރޭޓަރ މާލޭގެ އާއްމު ދަތުރުފަތުރުގެ ޚިދުމަތުގެ ޓިކެޓިންގ ނިޒާމް އާރްޓީއެލް ޓްރެވެލް ޕްލެޓްފޯމަށް ވަނީ ބަދަލުކޮށްފައި
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) ގެ ސީއީއޯ އާދަމް އާޒިމް ނާޖާއިޒް މަންފާއެއް ހޯދާފައިވާކަމަށް ތުހުމަތުކޮށް "ދިޔަރެސް" ނޫހުން އާއްމުކޮށްފައިވަނީ ދޮގު ޚަބަރެއް ކަމަށް އެ ކުންފުނިން ބުނެފިއެވެ.
އެމްޓީސީސީން ހޯމަ ދުވަހުގެ ރޭ ނެރުނު ބަޔާނެއްގައި ބުނީ އެ ކުންފުންޏަކީ ރާއްޖޭގެ ތަފާތު އެކި ސިނާއަތްތަކުގައި ފުޅާދާއިރާއެއްގައި ވިޔަފާރީގެ ހަރަކާތް ކުރިއަށްގެންދާ ކުންފުންޏަކަށް ވެފައި އެ ކުންފުނިން އަބަދުވެސް މަސައްކަތްކޮށްފައިވާނީ ކުންފުނީގެ އާމްދަނީ އާއި ފައިދާ އަދި ހިއްސާދާރުންނަށް ލިބޭ ނަފާ އިތުރުކުރުމާއެކު ކުންފުނީގެ ވަނަވަރު އިތުރަށް ތަރައްޤީކުރުމުގެ އިދާރީ ސަގާފަތާއި އިދާރީ ސުލޫކުގެ އަސާސް އިސްކުރުމުގެ ރޫހުގައިކަމަށެވެ. އެކަން ވޭތުވެދިޔަ 4 އަހަރު ހާސިލްކޮށްފައިވާ ކާމިޔާބީ އާއި އާންމުކޮށްފައިވާ މާލީ ނަތީޖާ އަދި އަހަރީ ރިޕޯޓްތަކުން ސާފުކޮށް ފެންނަން ހުންނާނެ ކަމަށް ބުންޏެވެ.
އެ މަސައްކަތާއެކުވެސް ރައްޔިތުންނަށް އޮޅުވާލައި އެމްޓީސީސީ ބަދުނާމު ކުރުމުގެ ނިޔަތުގައި ބައެއް ފަރާތްތަކުން ހަގީގަތާއި ޚިލާފު ޚަބަރު ފަތުރަމުންދިއުމަކީ ހިތާމައެއްކަން އެ ކުންފުނިން ފާހަގަކުރެއެވެ. އެގޮތުން މި މަހުގެ 27 ވަނަ ދުވަހު "ދިޔަރެސް" ނޫހުން އާއްމުކޮށްފައިވާ "އާޒިމް ފަހުކަމަކަށް ވެސް ބޮޑު ވައްކަމެއް، ބޮޑު ހިލަ ޓަނަކުން 11 ޑޮލަރު އަމިއްލަ ޖީބަށް!" ޚަބަރަކީ ކަނޑައެޅިގެން ހަގީގަތާ ޚިލާފު ދޮގު ޚަބަރެއް ކަމަށް ވެސް އެބަޔާނުގައި ބުނެފައިވެއެވެ.
އެމްޓީސީސީން ބުނީ އެ ޚަބަރަކީ ރައްޔިތުންގެ ހިތުގައި ކުންފުންޏާއި ކުންފުނީގެ އިސްވެރިންނަށް ލިބިފައިވާ އިތުބާރާއި ލޯބި ފަނޑުކޮށްލުމަށް ގަސްތުގައި ކޮށްފައިވާ ނާތަހުޒީބީ އަމަލެއްކަމަށެވެ. އަދި އެ ކުންފުނީގެ އިސް ވެރިންތަކެއް ނާޖާއިޒު މާލީ މަންފާ ލިބޭނެހެން އަމަލުކޮށްފައިވާކަމަށް ތުހުމަތުކުރާއިރު އެއީ އެއްވެސް އަސާސެއް އަދި ބުރަދަނެއް ނެތް ދޮގު ވާހަކަތަކެއްކަމަށް އެ ކުންފުނިން ބުންޏެވެ.
ކުންފުނިން ކުރިއަށްގެންދާ މަޝްރޫއުތަކަށް ބޭނުންވާ ތަކެއްޗާއި އަދި ކުންފުނީގެ އެކިއެކި ބޭނުމަށް ގެނެވޭ މުދަލުގެ މުއާމަލާތުތަކަކީ ބޯޑުން ފާސްކޮށްފައިވާ ޕްރޮކިއުމަންޓް ޕޮލިސީއާ އެއްގޮތަށް ކުރިއަށްދާ މުއާމަލާތްތަކެއްކަން އެމްޓީސީސީން ފާހަގަކުރެއެވެ. އަދި ކޮންމެ މުއާމަލާތެއްގައިވެސް އަމަލުކޮށްފައިވާނީ ރަނގަޅު ގަވަރނަންސްގެ ތެރެއިންކަމަށާއި ވިޔަފާރީގައި ގެންގުޅޭ ބައިނަލްއަގުވާމީ ބެސްޓް ޕްރެކިޓްސްގެ ހަމަތަކާއި މިންތަކާ އެއްގޮތްވާގޮތުގެ މަތިންކަމަށް ވެސް އެ ކުންފުނިން ބުންޏެވެ.
އެ ޚަބަރާ ގުޅިގެން ރައްޔިތުންނަށް އެކަމުގެ ހަގީގަތް ސާފުކޮށްދިނުމަށް އޭސީސީ އިން ތަހުގީގެއް ހިންގައިދިނުމަށް ވެސް އެމްޓީސީސީން ވަނީ މިހާރު އެދިފައެވެ.
"ދިޔަރެސް" އިން އެކި ފަހަރުމަތިން އެމްޓީސީސީ އާއި އެ ކުންފުނީގެ ވެރިން ބަދުނާމުވާގޮތަށް ދޮގު ޚަބަރު ފަތުރާފައިވާކަން ފާހަގަކޮށް އެމްޓީސީސީން ބުނީ އެއްވެސް ހެއްކެއްނެތި އެފަދަ ތުހުމަތު އަޅުވަމުން ދިއުމަކީ އަބުރު ކަތިލުމުގެ ނުބައި ރޫހުގައި ކުރަމުން އަންނަ ކަމެއް ކަަމަށެވެ. މިއީ ޒާތީ ތައައްސުބް އިސްކޮށް، ސިޔާސީ މަންފާއެއް ހޯދުމުގެ ވިސްނުމުގައި ކުރާ ކަމެއް ކަމަށާއި މިފަދަ ކަންކަން މަދު ފަރާތްތަކުން ކުރަމުންގެންދިއަ ނަމަވެސް ޖުމުލަކޮށް މީޑިއާގެ ވަސީލަތްތަކުން ޒިންމާދާރު ނޫސްވެރިކަމެއް ކުރަމުން ގެންދާކަންއެމްޓީސީސީން ފާހަގަކުރެއެވެ.
އެމްޓީސީސީން ވަނީ އެ ކުންފުންޏާއި ކުންފުނީގެ ވެރިން ބަދުނާމު ވާގޮތަށް އަދި އާންމު ރައްޔިތުންގެ މެދުގައި ކުންފުންޏަށް އޮތް އިތުބާރު ގެއްލޭ ގޮތަށް، ހަގީގަތާ ޚިލާފު ދޮގު ޚަބަރު ނުފެތުރުމަށް "ދިޔަރެސް" ނޫހަށް އިލްތިމާސްކޮށްފައެވެ.
