ކޭން ރެކޯޑް މުގުރަނީ، ބަޔާން ތާވަލްގެ އެއްވަނަ އަށް!

ޖަރުމަނުގައި ރެކޯޑް މުގުރަމުންދާ އިނގިރޭސި ކެޕްޓަން ހެރީ ކޭން ޖެހި ހަމައެކަނި ލަނޑުން މޮޅުވެ, ބަޔާން މިއުނިކް ތާވަލްގެ އެއްވަނަ އަށް ޖެހިލައިފިއެވެ.

ލީގު ތާވަލްގެ އެއްވަނަ އަށް ބަޔާން ޖެހިލީ އެފްސީ ކޮލޯން 1-0 ން ބަލިކޮށް ހޯދި ތިން ޕޮއިންޓާއެކު ޖުމްލަ 32 ޕޮއިިންޓާ އެކުއެވެ. ނަމަވެސް އެއީ ދެވަނާގައި އޮތް ބަޔާ ލެވަކޫސަން އަށްވުރެ އިތުރަށް މެޗެއް ކުޅެގެންނެވެ. މެޗު ހަމަކުރާއިރު އެއްވަނާގައި އޮތުމުގެ ފުރުޞަތު ބޮޑީ މިސީޒަންގައި އާދަޔާ ހިލާފް ފޯމެއް ދަމަހައްޓަމުން އަންނަ ބަޔާ ލެވަކޫސަން އަށެވެ. މެޗުގެ 20 ވަނަ މިނިޓްގައި ކޭން ޖެހި ގޯލަކީ މިސީޒަންގައި ބަޔާން އަށް ބަދަލުވެ ލީގުގައި ޖެހި 18 ވަނަ ގޯލެވެ. އެއީ އެންމެ 12 މެޗުންނެވެ. މީގެކުރިން އިނގިރޭސި ކުޅުންތެރިއަކަށް ޖަރުމަނު ލީގުގައި އެއް ސީޒަނެއްގައި 18 ގޯލް ޖެހިފައެއް ނުވެއެވެ.

ޖަރުމަނު ލީގުގައި މިސީޒަންގައި ބަލިނުވެ ހިފަހައްޓަމުން އަންނަ ދެޓީމަކީ ބަޔާން މިއުނިކާއި, ބަޔާ ލެވަކޫސަން އެވެ. ބަޔާ ލެވަކޫސަން އަށް ކުރިއަށް އޮތީ ވާޑާ ބްރޭމަންއާ ވާދަކުރާ މެޗެވެ.