އައު ސަރުކާރުގެ، މިނިސްޓްރީ އޮފް ސްޕޯޓްސް، ފިޓްނަސް އެންޑް ރެކްރިއޭޝަންގެ ސްޓޭޓް މިނިސްޓަރުގެ މަޤާމަށް، ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ވަނީ، ވޮލީ ބޯޅަ އެސޯސިއޭޝަން އޮފް މޯލްޑިވްސް (ވީއޭއެމް)ގެ ކުރީގެ ރައީސް މުޙައްމަދު ރިޔާޟް ޢައްޔަން ކުރައްވައިފަ އެވެ.

ނަމަވެސް ކުޅިވަރުގެ ޚިދުމަތްތެރިޔާ، ކުޅިވަރުގެ އެފަދަ މަތީ މަޤާމަކަށް ޢައްޔަން ކުރެއްވީއިރު، މިކަމުގެ ފަހަތުގައި ބޮޑު މަސްލަހަތު ފުށޫ އެރުންތަކެއް އޮތްކަން ހާމަވެއްޖެ އެވެ. އިކޮނޮމިކް މިނިސްޓްރީގައި ރަޖިސްޓްރީ ކޮށްފައިވާ، ގްރީންލައިން މޯލްޑިވްސް އަކީ ރިޔާޟްގެ ވިޔަފާރި އެކެވެ. އެ ކުންފުނީގެ އޯނަރުގެ ގޮތުގައި ފެންނަން އޮތީ ރިޔާޟްގެ ނަމެވެ. ކުޅިވަރު ވުޒާރާގެ ސްޓޭޓް މިނިސްޓަރަކަށް ރިޔާޟް ޢައްޔަން ކުރައްވާފައިވާއިރު، މިދިޔަ ސަރުކާރުން އިއުލާންކުރި ބައެއް މަސައްކަތްތަކަށް ބިޑުކޮށް، ރިޔާޟްގެ ކުންފުނިން ވަނީ މަސައްކަތް ނަގައިފަ އެވެ. އޭގެ ތެރެއިން ބައެއް މަސައްކަތްތަކަކީ މިހާރު ވެސް ހިނގަމުން ދާ މަސައްކަތްތަކެވެ.

އޭގެ ތެރެއިން، "ރާއްޖެ ޓީވީ" އަށް ލިބިފައިވާ ލިޔެ ކިޔުންތަކުން ހާމަވެފައިވާ ގޮތުގައި، ތިލަދުންމަތީ އުތުރުބުރީ ދިއްދޫގައި އަައުޓްޑޯ ވޮލީ ކޯޓު ޤާއިމު ކުރުމުގެ މަސައްކަތް ހަވާލުކޮށްފައި ވަނީ އެ ކުންފުންޏާ އެވެ. ގްރީންލައިނާ އެ މަސައްކަތް ހަވާލުކޮށްފައި ވަނީ، 1،224،143.06 (އެއް މިލިއަން، ދެ ލައްކަ ސައުވީސް ހާސް، ސަތޭކަ ސާޅީސް ތިން ރުފިޔާ، ހަ ލާރި)ގެ އަގަކަށެވެ. ކުޅިވަރު ވުޒާރާ އާއެކު އެ ކުންފުނީގެ ފަރާތުން ސޮއި ކޮށްފައި އޮތީ، ޕްރޮޖެކްޓްސް ޑިރެކްޓަރު ޢަބްދުﷲ ޞާލިޙް އެވެ.

މީގެ އިތުރުން ބައެއް އެހެން މަސައްކަތްތައް ވެސް ވަނީ އެ ކުންފުންޏާ ހަވާލުކޮށްފަ އެވެ. އޭގެ ތެރޭގައި ހައްދުންމަތީ ގަމުގައި އައުޓްޑޯ ވޮލީ ކޯޓު ޤާއިމު ކުރުން ހިމެނެ އެވެ. ނަމަވެސް، މުއްދަތު ފަހަނައަޅާ ދިޔައިރު ވެސް އެ ކުންފުންޏަށް ފެށިފައި ނުވާތީ، ކުޅިވަރު ވުޒާރާ އިން ވަނީ އެއްބަސްވުން ބާތިލުކޮށްފަ އެވެ. އެއަށްފަހު އެ މަސައްކަތް ވަނީ އެހެން ކުންފުންޏަކާ ހަވާލުކޮށްފަ އެވެ. ރިޔާޟް އެ ވުޒާރާއެއްގެ ސްޓޭޓް މިނިސްޓަރުކަން އަދާކުރައްވަމުން އަންނަ ކުޅިވަރު ވުޒާރާ އިން، ރިޔާޟްގެ ކުންފުންޏަށް މަސައްކަތް ހަވާލު ކޮށްފައި އޮތުމަކީ މަސްހަލަތު ފުށޫއަރާ ކަމެކެވެ.

މިކަމާ ގުޅިގެން ރާއްޖެ ޓީވީން ސުވާލު ކުރެއްވުމުން ރިޔާޟް ވިދާޅުވީ، ސްްޓޭޓް މިނިސްޓަރުގެ މަޤާމަށް ޢައްޔަން ކުރެއްވުމާއެކު، އެ އެއްބަސްވުންތައް ބާތިލް ކުރުމަށް، ކުޅިވަރު ވަޒީރުގެ އަރިހުގައި އެދިފައިވާނެ ކަމަށެވެ. އެހެން އެދިފައި ވަނީ، ފުށޫ އެރުންތަކެއް އުޅޭނެ ކަމަށް ޤަބޫލު ކުރެވޭތީ ކަމަށް ވެސް އޭނާ ވިދާޅުވި އެވެ.

އެހެން ނަމަވެސް، މިފަދަ ކަންކަމުގައި އަމަލު ކުރުން އެންމެ ރަނގަޅު ގޮތަކީ، މަގާމަށް ޢައްޔަން ކުރެއްވުމުގެ ކުރިން ވެސް އެއްބަސްވުންތައް ބާތިލް ކުރުމެވެ. ނުވަތަ މަސައްކަތްތައް ދޫކޮށްލުމެވެ. އެހެން ނަމަވެސް، އެކަމުގެ ސަބަބުން ވެސް ދައުލަތަށް ގެއްލުންތަކެއް ދައްކާނެ އެވެ. އަނެއްކޮޅުން، އެއްބަސްވުން ބާތިލު ކުރުމަށް އެދުނު ނަމަވެސް، އެ ކުންފުުންޏާ ހަވާލުކޮށްފައިވާ މަސައްކަތްތައް ނިމުނު ކަމެއް ނުވަތަ ނޫން ކަމަށް ވެސް ޔަގީނެއް ނުވެ އެވެ.