ތާރީޚުގެ ތެރެއިން 500 އަހަރު ކުރީގެ ވާހަކަތަކެއް ކިޔައިދިން ދަގަނޑު އަތް

އުފެދުމުގައި ހުރި ގޮތެއްގެ ސަބަބުން ނުވަތަ ކުރިމަތިވާ ހާދިޘާއަކާ ހެދި ހަށިގަނޑުގައި ހުންނަ ނުކުޅެދުންތެރިކަން ފިލުވާލުމަށްޓަކައި މަސްނޫޢީ ގުނަވަންތައް ބޭނުން ކުރަމުން އަންނަ ތާ އަހަރުތަކެއް ވެއެޖެއެވެ. ހީކުރެވިފައި އޮތް ވަރަށް ވުރެ، މާސްނުޢީ ގުނަވަންތަކުގެ ތާރީޚަކީ ދިގު ތާރީޚެކެވެ.

ނިމިގެން މި ދާ 2023 ވަނަ އަހަރުގެ ހޫނު މޫސުމުގެ ދުވަސްތަކުން ދުވަހެކެވެ. ޖަރުމަނުވިލާތުގެ ދެކުނުގެ ސަރަޙައްދުގައި ކޮންސްޓްރަކްޝަން މަސައްކަތް ކުރިއަށް ދިޔަ ސައިޓަކުން، މަސްނޫޢީ އަތަކަށް ގިނަ ބައެއްގެ ސަމާލުކަން ހުއްޓިގެން ދިޔައެވެ. ސަބަބެއް ނެތިއެއް ނޫނެވެ. އެ އަތަކީ 500 އަހަރުވެފައި ވާ އަތެކެވެ. މިއުނިކްއާ މާ ދުރު ނޫން ހިސާބަކުން ފެނުނު މަސްނޫޢީ އަތް އުފައްދާފައި ވަނީ ދަގަނޑު ބޭނުން ކޮށްގެންނެވެ. އެ އަތް އަޅުވާފައި އޮތީ ދިޔައީ މެދުޒަމާން ނުވަތަ މިޑީވަލްއޭ ކިޔާ ޒަމާނުގައި ވަޅުލި ޤަބުރެއްގައެވެ.

ކޮންސްޓްރަކްޝަން ސައިޓުން ނެގި ޤަބުރު ކަށިގަނޑުގެ ވަނަވަރު ބެލުމަށް ރޭޑިއޯކާބަން ޑޭޓިންގް ދިރާސާތައް ވަނީ ހަދާފައެވެ. ދިރާސާގެ ހޯދުންތައް އެނގުނު ގޮތުގައި، އެމީހަކީ ޢުމުރުން 30 އަހަރާއި 50 އަހަރާ ދެމެދު ޢުމުރުފުރާގެ ފިރިހެނެކެވެ. އެމީހަކު މަރުވެފައި ވަނީ މީލާދީ ސަނަތުން 1450 އާއި 1620 ވަނަ އަހަރާ ދެމެދު ހިސާބެއްގައެވެ.

އާޘާރުތަކުގެ ޢިލްމީ މާޚިރު ނުވަތަ އާކިލޮޖިސްޓް، އާމިރާ ޢާޟިޔާ ފާހަގަ ކުރި ގޮތުގައި، ޖަރުމަނުވިލާތުން މި ފެނުނު މަސްނޫޢީ އަތަކީ، ހީކުރި ވަރަށް ވުރެ މުހިންމު ހޯދުމެކެވެ.

މާޒީގެ ތެރެއިން މި ފެނުނު އަތް ނިސްބަތްވާ ދުވަސްވަރަށް ރިޢާޔަތް ކުރާ އިރު، މެދުތެރޭ ޔޫރަޕްގެ ހިސާބުތަކުން މިހާތަނަށް ފެނިފައި ވަނީ ގާތްގަނޑަކަށް އެންމެ 50 އަކަށް މަސްނޫޢީ ނުވަތަ އަތްތިލައެވެ.

ޖަރުމަނުވިލާތުގެ ކޮންސްޓްރަކްޝަން ސައިޓަކުން ފެނުނު މަސްނޫޢީ ދަގަނޑު އަތް ލައްވާފައި ވަނީ، އެމީހާގެ ވާތުން އުނިވެފައި ވާ އިނގިއްޔެއްގެ ބަޔަކަށެވެ. އެ ބައި އުނިވެފައި ވަނީ، އެ ގުނަވަން ބުރިކޮށްލުމުގެ ސަބަބުން ކަމުގައިވުން އެކަށީގެންވާކަމަށްވެސް ބުރަވެވެއެވެ.

ގިނަ ބަޔަކު ވަޅުލާފައި ވާ ވަޅުގަނޑެއްގެ ތެރެއިން ފެނުނު މީހާގެ ޝަޚްސާ ބެހޭ އެއްވެސް ވަނަވަރެއް އަދި ސާފެއް ނުވެއެވެ. އޭނާގެ އަތް ބުރިވީ ކިހިނެއްކަމެއްވެސް ކަށަވަރެއް ނުވެއެވެ.

އެނގޭ ކަމަކީ، އެ ދުވަސްވަރަކީ އެކި ކަހަލަ ކުރިމަތިލުންތަކާއި ހަމަނުޖެހުންތަކުގައި މީސްމީހުންގެ ހަށިގަނޑުގެ މުހިންމު ގުނަވަންތައް ބުރިބުރިވެގެން ދިޔަ ދުވަސްވަރެއް ކަމެވެ.