ރައީސުލްޖުމްހޫރިއްޔާ ދިވެހި ސިފައިންނާ ފުރަތަމަ ފަހަރަށް ބައްދަލު ކުރައްވައިފި

ދިވެހިރާއްޖޭގެ ދެވަނަ ޖުމްހޫރިއްޔާގެ އަށްވަނަ ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ، ޑރ. މުޙައްމަދު މުޢިއްޒު ދިވެހި ސިފައިންނާ ފުރަތަމަ ފަހަރަށް ބައްދަލު ކުރައްވައިފިއެވެ.

ދިވެހި ސިފައިންގެ ފަރާތުން ވަނީ މިދިޔަ ހުކުރު ދުވަހު އެމަނިކުފާނަށް މަރުހަބާ ކިޔައިފައެވެ. އެގޮތުން މި މަރުހަބާ ކިޔާފައިވަނީ ދިވެހިރާއްޖޭގެ ރައީސުލްޖުމްހޫރިއްޔާކަމުގެ ޤާނޫނީ ހުވާކުރެއްވުމަށް ފަހު ނޮވެންބަރު 17 ވަނަ ދުވަހު، ދިވެހިރާއްޖޭގެ ޤައުމީ ދިފާޢީ ބާރުގެ މައިމަރުކަޒު، ބަންޑާރަކޮށްޓަށް އެމަނިކުފާނު ކުރެއްވި ފުރަތަމަ ޒިޔާރަތުގައެވެ.

ބަންޑާރަ ކޮށިން އެމަނިކުފާނަށް މަރުހަބާ ދެންނެވީ ޗީފް އޮފް ޑިފެންސް ފޯސް މޭޖަރ ޖެނެރަލް ޢަބްދުއްރަޙީމް ޢަބްދުއްލަތީފް އާއި ކުރީގެ ޗީފް އޮފް ޑިފެންސް ފޯސް ލެފްޓިނެންޓް ޖެނެރަލް (ރިޓަޔަރޑް) އަބްދުﷲ ޝަމާލްގެ އިތުރުން ޤައުމީ ދިފާއީ ބާރުގެ ޖެނެރަލް އޮފިސަރުންނެވެ. ދިވެހި ސިފައިންގެ ހަތްކޮޅުގައި ބަންޑާރަކޮށްޓަށް އެމަނިކުފާނު ވަޑައިގެންނެވުމުން، އެމަނިކުފާނުގެ ޝަރަފުގައި ދިވެހި ސިފައިން ވަނީ ގާޑް އޮފް އޮނަރއެއް އަރުވާފައެވެ.

މި ޒިޔާރަތުގައި، ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ ވަނީ، ޤައުމީ ދިފާޢީ ބާރުގެ ޖެނެރަލް އޮފިސަރުންނާއި، ސީނިއަރ އޮފިސަރުންނާއި ވޮރަންޓް އޮފިސަރުންނާއި، އެންލިސްޓެޑް ސިފައިންނާ ބައްދަލުކުރައްވައިފާ ކަމަށް އެމްއެންޑީއެފުން ބުންޏެވެ.

އެމްއެންޑީއެފުން ވަނީ ރައީސުލްޖުމްހޫރިއްޔާގެ އިތުރުން އަލަށް ޑިފެންސް މިނިސްޓަރު ކަމަށް އައްޔަން ކުރެއްވި ޣައްސާން މައުމޫނަށް ވެސް ހޮނިހިރު ދުވަހު މަރުހަބާ ކިޔައިފައެވެ. އެގޮތުން ބަންޑާރަކޮށްޓަށް ކުރެއްވި ފުރަތަމަ ޒިޔާރަތުގައި މިނިސްޓަރުގެ ޝަރަފުގައި ވެސް ސިފައިން ވަނީ ގާޑް އޮފް އޮނަރއެއް އަރުވައިފައެވެ.